Emɔs 9 - Krio Fɔs Oli Baybul

PAPA GƆD Gi Jɔjmɛnt

¹ A si PAPA GƆD nia di ɔlta. I gi ɔda se: “Una nak di pila dɛn na PAPA GƆD in os mek di fawndeshɔn dɛn go shek. Una brok dɛn lɛ dɛn fɔdɔm na di pipul dɛn ed. A go kil ɔl di pipul na wa, ɛn nɔbɔdi nɔ go rɔnawe.

² I lɛk dɛn dig go ayd na nɛks wɔl, na de a go kech dɛn; ɔl we dɛn klem go ɔp klawd, na frɔm de go briŋ dɛn kam dɔŋ.

³ If dɛn go ayd ɔp na Mawnt Kamɛl, a go fɛn dɛn ɛn kech dɛn. If dɛn go ayd ɔnda di si, a go tɛl di si mɔnsta fɔ bɛt dɛn.

⁴ If dɛn ɛnimi dɛn kech dɛn ɛn kɛr dɛn go as rɛfyuji, a go mek dɛn kil dɛn ɔl. A dɔn mekɔp mi maynd fɔ dɔnawe wit dɛn kpatakpata. A nɔ go sev dɛn.”

⁵ PAPA GƆD we na PAPA GƆD Ɔlmayti de tɔch di grɔn nɔmɔ ɛn i go mɛlt; ɔl udat de de, go kray Di wɔl go tan lɛk sisɔ; i go go ɔp ɛn kan dɔŋ lɛk riva nayl wata.

⁶ Di wanol wɔl de tɔnɔbɔ lɛk Riva Nayl. I de bil in os na ɛvin ɛn put di skay oba di ath. I tek wata kɔmɔt na di si ɛn tɔn am na di ath. In nem na PAPA GƆD.

⁷ PAPA GƆD tɔk se: “Una dɛn Izrɛlayt dɛn, lɛkɛ aw una kin de tink bɔt dɛn pipul na Ithiopia na so a kin de tink bɔt una. Lɛkɛ aw a pul di Filistin dɛn kɔmɔt na Krit ɛn di Sirian dɛn na Kir, na so a pul una kɔmɔt na Ijipt.

⁸ Mi, PAPA GƆD we na GƆD, tek yay de luk dis Izrɛl we de kɔmit sin so, ɛn a go pul dɛn kɔmɔt na di wɔl kpatakpata. Bɔt nɔmɔ a nɔ go kil ɔl Jekɔb in jɛnareshɔn.

⁹ “A go gi ɔda ɛn shek di pipul na Izrɛl lɛkɛ sid na shifta. A go shifta dɛn ɔl ɛn pul ɔl di wan dɛn we na yuslɛs mɔtalman.

¹⁰ Ɔl di wan dɛn we de kɔmit sin go day na wa, miks wit ɔl dɛn wan we de se PAPA GƆD nɔ go mek ɛnitin bad mit dɛn.”

Wan De Wan De Izrɛl Go Tan Lɛk Aw I Bin Tan

¹¹ PAPA GƆD tɔk se, “Wande wande, a go mek Devid in kindɔm, we dɔn tan lɛk os we dɔn brok, tinap bak. A go ripia di wɔl dɛn ɛn bil dɛn bak. A go mek lɛ i tan lɛk aw i bin tan lɔntɛm.

¹² Dɔn di Izrɛlayt dɛn go tek wetin lɛf na Idɔm ɛn gi di ɔda kɔntri dɛn we bin de ɔnda mi. “Na PAPA GƆD we dɔn tɔk go mek dis apin.

¹³ PAPA GƆD se, “Wande wande, di plant go so de gro dat dɛn go jɛs de avɛst ɛn di wayn go so de bɔku wan dat wayn go de mit wayn; fayn fayn wayn go bɔsawt na di mawnten, ɛn ɔl go flo kam dɔŋ di il dɛn.

¹⁴ A go briŋ mi pipul kam bak na dɛn land, dɛn go bil dɛn siti bak ɛn tap de; dɛn go plant vayn ɛn drink in wayn, dɛn go plant ɛn it wetin dɛn plant.

¹⁵ A go put mi pipul na di land we a gi dɛn, ɛn nɔbɔdi nɔ go pul dɛn kɔmɔt de igen” Na mi PAPA GƆD dɔn tɔk so.