Emɔs 8 - Krio Fɔs Oli Baybul

Vishɔn Bɔt Wan Baskit Frut

¹ PAPA GƆD we na GƆD sho mi ɔda vishɔn. Insay dis vishɔn a si wan baskit frut.

² PAPA GƆD aks mi wetin a si. A ansa am se na wan baskit frut. Dɔn i tɛl mi se na Izrɛl in dɔn wan dɔn kam so. I se in nɔ go chenj in maynd igen, in mɔs pɔnish dɛn.

³ I se da de de di gladi siŋ we dɛn go de siŋ na di kiŋ in os go tɔn bɛrin. I se na dedebɔdi dɛn go lidɔm ɔlsay. I se wan sawnd dɛn nɔ gɛt fɔ yɛri we dɛn de trowe di dedebɔdi dɛn na do.

Masibo Na Izrɛl

⁴ Una lisin o, una we de tinap na poman ed ɛn siz advantej pan dɛn na di kɔntri.

⁵ Una kin tɔk na una at se ustɛm di nyu mun fɛstival go dɔn ɛn ustɛm di sabat de go dɔn lɛ una go bigin sɛl wetin una plant. Una kin de grɔmbul se mek di de mekes dɔn so dat una go bigin sɛl bak, we una go ova inchaj di pipul, kruk pan una mɛzhɔmɛnt ɛn rog una kostamɛnt dɛn,

⁶ so dat una go sɛl po ma fɔ mɔni ɛn begaman fɔ wan pia sandal ɛn sɛl di rɛs chaf chaf gi pipul.

⁷ PAPA GƆD we na GƆD fɔ Izrɛl dɔn swɛ. I se, “A nɔ go fɔgɛt una wikɛd we,

⁸ so di grɔn go plit opin ɛn di wanol kɔntri go de pan masibo, a go de mek lɛk aw swɛlin de mek na Riva Nayl.

⁹ Wande wande a go mek di san go dɔŋ santɛm dɔn di ples dak de tɛm. Na mi PAPA GƆD we na GƆD dɔn tɔk so.

¹⁰ A go tɔn ɔl una gladi-gladi to bɛrin ɛn chenj una gladi siŋ to bɛrin siŋ. A go mek una krep una ed ɛn wɛr saklɔth, una go tan lɛk we man ɛn uman de kray fɔ dɛn waŋren pikin. Da de de go bita fɔ una sote go.”

¹¹ “Wande wande a go mek nɔn it nɔ de fɔ it. Pipul go aŋri bɔt nɔto fɔ bred; dɛn go tɔsti bɔt nɔto fɔ wata. Dɛn go aŋri ɛn tɔsti fɔ yɛri PAPA GƆD in mɛsej. Na mi PAPA GƆD we na GƆD de tɔk.

¹² Pipul go de wirɔn frɔm di Rɛd Si to di Mɛditarenian ɛn ɔlɔbɔt frɔm nɔth to ist. Dɛn go de fɛn usay PAPA GƆD wɔd de bɔt dɛn nɔ go gɛt am.

¹³ Da de de, ivin dɛn yɔŋman ɛn yɔŋuman dɛn go fent wit tɔsti.

¹⁴ Dɛn wan we de swɛ to dɛn lay lay gɔd we de na Sameria we de se dɛn swɛ to di gɔd na Dan ɔ dɛn swɛ to di gɔd na Biashiba, dɛn ɔl go fɔdɔm ɛn nɔ grap igen”