Emɔs 7 - Krio Fɔs Oli Baybul

Vishɔn Bɔt Lokɔs

¹ A si wan vishɔn we PAPA GƆD we na GƆD sho mi: a si i mek bɔku bɔku lokɔs we apia afta dɛn dɔn kɔt di kiŋ in yon shia pan di plant fɔ di ɔs dɛn, dɔn di plant dɛn bigin fɔ gro bak.

² A si di lokɔs dɛn de it ɔl di grin plant dɛn na di land. Na de a beg se, “PAPA GƆD we na GƆD, duya fɔgiv yu pipul. Aw dɛn go liv? Dɛn so smɔl ɛn wik.”

³ PAPA GƆD chenj in maynd ɛn tɔk se, “Wetin yu dɔn si so nɔ go bi igen”

Vishɔn Bɔt Faya

⁴ A si ɔda vishɔn we PAPA GƆD we na GƆD sho mi: a si i de rɛdi fɔ pɔnish in pipul wit faya. Di faya bigin kech ɔnda di big oshɔn ɛn bigin bɔn di grɔn.

⁵ Na de a tɔk se PAPA GƆD we na GƆD lɛf, aw di pipul go liv? Dɛn smɔl ɛn wik.

⁶ PAPA GƆD we na GƆD chenj in maynd ɛn tɔk se dis sɛf nɔ go bi igen

Vishɔn Bɔt Plɔm Layn

⁷ PAPA GƆD mek a si ɔda vishɔn: a si i tinap nia wan wɔl we na plɔm layn dɛn yuz fɔ bil am, dɔn i ol di plɔm layn nain an,

⁸ ɛn aks mi se, “Emɔs, wetin yu si?” A ansa se na plɔm layn. Na de i se in de yuz am fɔ sho se in pipul tan lɛk wɔl we dɛn nɔ yuz plɔm layn fɔ bil. I se in go pɔnish dɛn ɛn i nɔ go chenj in maynd igen

⁹ I se ɔl di say dɛn we na de Ayzak in jɛnareshɔn dɛn de wɔship go pwɛl. I se ɔl di oli ples dɛn we Izrɛl de wɔship go pwɛl. I se in go dɔnawe wit Kiŋ Jɛroboam in kindɔm.

Emɔs Ɛn Amazaya

¹⁰ Amazaya we de mek sakrifays fɔ pipul sin na Bɛthɛl, sɛn ripɔt to Kiŋ Jɛroboam na Izrɛl se, Emɔs dɔn jɔyn pipul dɛn fɔ tɔn agens am. Wetin i tɔk, luk an yanda.

¹¹ I se Emɔs de tɔk se Jɛroboam go day na wa, dɔn dɛn go kech di pipul kɛr dɛn go as rɛfyuji na ɔda kɔntri.

¹² Amazaya tɛl Emɔs se, yu man we de tɛl pipul di fyuchɔ, rɔnawe go Juda go prich de, na de dɛn go pe am fɔ dat.

¹³ I tɛl Emɔs se lɛ i nɔ tɔk wan mɔ wɔd igen na Bɛthɛl bikɔs na de di kiŋ de wɔship, ɛn na de sɛf di wanol kɔntri in PAPA GƆD in os de.

¹⁴ Emɔs ansa am se in nɔ de prich fɔ mɔni. Sɛf, na kaw ship ɛn got i bin de mɛn ɛn de plant fig tik.

¹⁵ Bɔt na PAPA GƆD pul am kɔmɔt pan di mɛn ship wok ɛn tɛl am se lɛ i go prich to di Izrɛlayt dɛn.

¹⁶ So naw in de tɛl am wetin PAPA GƆD se bikɔs i de tap am nɔ fɔ tɔk wetin PAPA GƆD tɛl am fɔ tɔk, lɛ i nɔ go prich bad bɔt Izrɛl.

¹⁷ I se PAPA GƆD de tɛl in di Amazaya se, in wɛf go tɔn rare gyal na di siti ɛn dɛn go kil ɔl in pikin dɛn na wa. I se dɛn go sheb in kɔntri ɛn gi am to ɔda pipul ɛn na kɔntri we nɔ no bɔt PAPA GƆD, i go day. I se dɛn go kech di Izrɛlayt dɛn ɛn kɛr dɛn go na ɔda kɔntri.