Emɔs 6 - Krio Fɔs Oli Baybul

PAPA GƆD Go Pwɛl Izrɛl Kpatakpata

¹ Waala go mit una dɛn bigman dɛn we liv izi layf na Zayɔn, una dɛn agbagba dɛn we fil se ɔltin ɔrayt wit una na Sameria, una dɛn bigman dɛn na da wɔndaful kɔntri we nem Izrɛl, we na una di pipul kin de go to fɔ ɛp dɛn!

² Una de tɛl di pipul dɛn se lɛ dɛn go luk na Kalnɛ, dɔn lɛ dɛn go luk bak na Amath we na big siti, dɔn igen lɛ dɛn go dɔŋ na Gath we na di Filistin dɛn siti, lɛ dɛn go si if ɛniwan pan dɛn siti de pawaful lɛk Izrɛl ɛn Juda ɔ if dɛn gɛt land lɛkɛ una.

³ Una nɔ want fɔ de tink bɔt di dombolo we gɛt fɔ mit una, ɛn di we ɛn mana we una de du tiŋs go mek di waala ɔ dombolo mit una jisnɔ.

⁴ Waala go mit dɛn wan dɛn we de kak na ayvri bed ɛn strɛch dɛnsɛf na dɛn kawch dɛn, de it yɔŋ ship bif pan di ship dɛn, ɛn yɔŋ kaw we kɔmɔt na di wɔrɛ.

⁵ Una de ple myuzik ɛn siŋ lɛk Kiŋ Devid wit in ap.

⁶ Una de drink wayn na kalbas ɛn spre dɛn dia pafyum ɛn nɔ bisin sɛf bɔt di waala we gɛt fɔ mit Izrɛl.

⁷ Wɛl, na una fɔs go tes di waala fɔ go ɛgzayl, dɔn da tɛm de naw ɔl di ladida go tap.

⁸ PAPA GƆD we na GƆD dɔn swɛ to insɛf ɛn gi dis siriɔs wɔnin: “A et di kak we di Izrɛlayt dɛn de kak fɔ dɛn fayn fayn simɛnt os; a go mek dɛn ɛnimi dɛn kapchɔ di siti ɛn tek ɔl wetin de de.”

⁹ If na tɛn man lɛf biɛn de ayd na wan os, dɛn ɔl go day.

¹⁰ Na di dayman in fambul we lɛf go go bɛr am. Di pɔsin we de go bɛr go de aks if nɔbɔdi nɔ lɛf insay di os. Di wan we de insay di os go ansa se nɔ, ɛn tɛl di ɔda pɔsin fɔ sɛt in mɔt, lɛ dɛn bikyaful nɔ fɔ kɔl PAPA GƆD in nem.

¹¹ Wɛn PAPA GƆD gi ɔda, big ɛn smɔl os go brok pispis.

¹² Ɔs go de galɔp pantap rɔk? Fama kin yuz kaw dɛn fɔ dig na di si? Bɔt una dɔn tɔn jɔstis to pɔyzin ɛn gi rayt to udat rɔŋ.

¹³ Una de blɔf se una dɔn kech Lɔdiba. Una de bost se una gɛt trɛnk fɔ kapchɔ Kanaim.

¹⁴ PAPA GƆD we na PAPA GƆD Ɔlmayti insɛf tɔk se, “Una dɛn Izrɛlayt dɛn, a de sɛn fɔrin ami fɔ tek una kɔntri. Dɛn go aras una frɔm Amath na di nɔth te go dɔŋ na di watasay na Araba na di Sawt.”