Emɔs 5 - Krio Fɔs Oli Baybul

PAPA GƆD Tɛl Izrɛl Fɔ Kam Bak To Am

¹ Una dɛn Izrɛlayt dɛn, una lisin o, una lisin to dis bɛrin siŋ we a de siŋ fɔ una:

² Izrɛl we bin inosɛnt dɔn fɔdɔm. I nɔ de grap igen I lidɔm na grɔn lɛk bif, nɔbɔdi nɔ de fɔ es am ɔp.

³ PAPA GƆD we na GƆD tɔk se: “Izrɛl sɛn wan tawzin sojaman fɔ go fɛt na wa bɔt na ɔndrɛd nɔmɔ tɔn bak; wan ɔda siti sɛn wan ɔndrɛd sojaman bɔt na tɛn nɔmɔ tɔn bak.”

⁴ PAPA GƆD tɔk to Izrɛl se: “Una kam bak to mi fɔ lɛ una go gɛt layf;

⁵ Una nɔ go na Bɛthɛl fɔ go pre, dɛn gɛt fɔ le ambush de fɔ una; ɛn una nɔ go sɛf na Gilgal bikɔs dɛn gɛt fɔ kɛr ɔlman we de de go ɛgzayl. Una nɔ fɔ go na Biashiba go wɔship mi.”

⁶ Una go bak to PAPA GƆD fɔ lɛ una go gɛt layf, ɔ nɔ so i go kam dɔŋ lɛk faya kam bɔn di Izrɛlayt dɛn, ɛn nɔbɔdi nɔ go lɛf fɔ ɔt di faya na Bɛthɛl.

⁷ E una we de tɔn rayt to rɔŋ, una we de twis twis pan kes!

⁸ Di wan we mek ɛvin ɛn dɛn sta, we de tɔn nɛt to de, ɛn de to nɛt, we de tek di wata na di si, ɛn wata di grɔn, nain nem PAPA GƆD,

⁹ nain de dɔnawe wit dɛn wan we gɛt trɛnk ɛn brok dɛn wɔl.

¹⁰ Una et dɛn wan we de tɛl una na kot se una rɔŋ ɛn nɔ lɛk udat de tɔk tru.

¹¹ Una de tek aramu na poman an ɛn fos dɛn fɔ gi una rɔ wit; fɔ da aramu we una dɔn tek fɔ bil ston os, so una nɔ go slip insay di os. Da vayn gadin sɛf we una dɔn mek, una nɔ go tes di wayn.

¹² A de si ɔl di bɔku dabaru we una de ple, ɛn di bad bad tin dɛn we una de du. Una we de brayb ɛn siz advantej pan pɔsin we de waka tret na PAPA GƆD in yay, wɛn una de jɔj kes, una de gi poman rɔŋ.

¹³ O - o! Dat min se dɛn wan we gɛt sɛns fɔ sɛt mɔt ɛn mek lɛk se dɛn nɔ si ɔl di bad bad tin dɛn we de bi.

¹⁴ Noto bad una fɔ de du naw, na gud, fɔ lɛ una go gɛt layf, dɔn PAPA GƆD, PAPA GƆD Ɔlmayti go de wit una lɛkɛ aw una tink se i de wit una.

¹⁵ Una lɛf fɔ du bad, una du gud; una mek fia ple na kot, sɔntɛm da tɛm de PAPA GƆD, PAPA GƆD Ɔlmayti go sɔri fɔ di wan dɛn we lɛf pan di Izrɛlayt dɛn.

¹⁶ Dis na wetin PAPA GƆD, we na GƆD Ɔlmayti PAPA GƆD se bikɔs ɔf traŋayes: “Big big kray go de na ɔl dɛn trit ɛn kɔna. Ɔlman go de ala “woyo, woyo!” Dɛn go sɛn kɔl dɛn ɔdinari fama dɛn ɛn dɛn pipul we dɛn kin pe fɔ kray na bɛrin fɔ kray fɔ una.

¹⁷ Na soso kray go de na dɛn vayn frut fam sɛf we dɛn nɔba kray. Na misɛf go du dis fɔ pɔnish una. “Na so PAPA GƆD se.

¹⁸ Alaki go mit una we de wet fɔ PAPA GƆD in jɔjmɛnt! Una de wet fɔ da de de bɔt us gud i go du una? Na daknɛs nɔmɔ go kɔba una, layt nɔ gɛt fɔ de.

¹⁹ Da de de go tan lɛk we man de rɔnawe pan layɔn dɔn i go bɔs pan tayga; ɔ as i rɔn go nain os fɔ go ayd, snek go bɛt am we i liŋ na wɔl de blo.

²⁰ Una dɔn si naw se di de we PAPA GƆD go gi jɔjmɛnt na soso daknɛs go de de? Yɛs, na tin go bi da de de.

²¹ “A et wetin una de du! A nɔ wan si di rɔbish we una de pan se una de wɔship mi.

²² Una grap mek animal sakrifays ɛn sid sakrifays to mi. A nɔ want am. I lɛk una briŋ dɛn fat fat animal fɔ mek sakrifays to mi, a nɔ go luk una sɛf.

²³ Una kɔmɔt bifo mi wit una nɔnsɛns siŋ dɛn! A nɔ wan yɛri una ap ɛn a nɔ de lisin sɛf.

²⁴ Una mek jɔstis ɛn fia ple de flo lɛkɛ riva, una du wetin rayt ɔl di tɛm, lɛ i bi lɛk wata we nɔ de dray.

²⁵ “E bo una dɛn Izrɛlayt dɛn! Noto sakrifays ɛn ɔfrin una bin de gi mi fɔ sho se una fethful to mi di tɛm we a bin kɛr una go na di land we pɔsin nɔ go ebul tap fɔ fɔti ia.

²⁶ Bɔt naw, una go gɛt fɔ tot una gɔd we nem Sakuth we nain na una kiŋ gɔd, ɛn Kaywan, we insɛf na una sta gɔd go

²⁷ wɛn a de sɛn una go ɛgzayl biɛn Damaskɔs. “Na so PAPA GƆD we na PAPA GƆD Ɔlmayti se.