Emɔs 4 - Krio Fɔs Oli Baybul

¹ Una lisin o, una dɛn na dɛn mawnten dɛn na Sameria we fat lɛk dɛn kaw na Beshan, we de fɔ mek dɛn de siz advantej pan poman, bikɔs una de mɔna una man dɛn se dɛn fɔ de kɛr wayn go fɔ una fɔ de drink!

² PAPA GƆD we na GƆD dɔn swɛ to insɛf se, “Di tɛm de kam we na uk dɛn go tek kech una, dɛn go fishin una wan wan wit uk.

³ Na drɛg dɛn go drɛg una pas midul dɛn krak wɔl, ɛn kɛr una go na Mawnt Amɔn.” Na mi PAPA GƆD dɔn tɔk so.

Izrɛl Nɔ Gri Fɔ Lan Sɛns

⁴ “Una go na Bɛthɛl lɛ una go du mɔ bad; una go bak na Gilgal ɛn go du wetin pas dat. Una mek di sakrifays we una kin mek ɛvri mɔnin, dɔn una pe una tayth ɛvri tri de.

⁵ If una want sɛf una kin bek bred we gɛt yist ɛn mek sakrifays wit am, dɔn una kin blɔf se una de gi PAPA GƆD mɔ pas wetin una fɔ gi am - una blɔf nɔ, una dɛn Izrɛlayt dɛn, bikɔs na dat una lɛk fɔ du.

⁶ “A mek aŋri de na ɔl dɛn siti. A nɔ mek wan sid rɛs sɛf de fɔ it, pan ɔl dat, una nɔ klɔk mi.

⁷ A ol di ren mek wan drɔp nɔ fɔdɔm di tɛm we una plant dɛn fɔ gro. A mek ren kam na wan siti, ɛn mek ren nɔ kam na di ɔda wan. Wan fam gɛt wata ɛn di ɔda wan nɔ gɛt natin ɛn dray.

⁸ Ɔlman bin de wirɔn ɔp ɛn dɔŋ frɔm siti to siti fɔ wata, bɔt nɔbɔdi nɔ gɛt bɛtɛ wata fɔ drink. Pan ɔl dat, una nɔ klɔk mi.

⁹ “Bɔku bɔku tɛm a de mek bad sik dɛn pwɛl una greps gadin, it ɔl una fig ɛn ɔliv tik. Pan ɔl dat, una nɔ klɔk mi.

¹⁰ “A sɛn bɔku bɔku waala pan una lɛk aw a bin du na Ijipt. A mek una yɔŋman dɛn day na wa ɛn mek dɛn kapchɔ una ɔs dɛn. Dɔn a mek una kamp dɛn de smɛl wit soso dedebɔdi. Pan ɔl dat, una nɔ klɔk mi.

¹¹ “A nyakanyaka una lɛk aw a bin nyakanyaka Sɔdɔm ɛn Gomɔra. Una bin tan lɛk af tik we dɛn pul na faya. Pan ɔl dat, una nɔ klɔk mi. “Na so mi PAPA GƆD se.

¹² “So, na naw misɛf de kam andul una na Izrɛl; ɛn bikɔs ɔf aw a de kam dil wit una, una tay una trɔsis o, Izrɛl fɔ brakɛt una PAPA GƆD!”

¹³ Di wan we mek dɛn mawnten ɛn di briz. Di wan we de sho wetin de nain bɛlɛ to mɔtalman; we de tɔn de to nɛt, we de rul di wanol wɔl. Nain nem PAPA GƆD, PAPA GƆD Ɔlmayti!