Emɔs 3 - Krio Fɔs Oli Baybul

¹ Una dɛn Izrɛlayt dɛn, una lisin gud o wetin PAPA GƆD tɔk bɔt una! Una we na una i pul kɔmɔt na Ijipt:

² “Na una a pik pan ɔl dɛn pipul na di wɔl, so a go pɔnish una gud fashin fɔ wetin una du.”

Di Prɔfɛt In Wok

³ Una dɔn wande si tu man we nɔ gri de waka?

⁴ Layɔn go de ala na bush we i nɔ kech nɔn bif? Bebi layɔn de kray insay in ol we i nɔ gɛt natin fɔ it?

⁵ Bɔd de go na trap we dɛn nɔ sɛt fɔ kech am? Trap go fak fɔ kech we bif nɔ tɔch am?

⁶ Pipul go yɛri ɔn fɔ wa dɛn nɔ fred? Wɛn dombolo fɔdɔm na di siti, nɔto mi, PAPA GƆD de mek i bi?

⁷ PAPA GƆD we na GƆD, nɔ de wande du sɔntin we i nɔ de tɛl in savant dɛn we na prɔfɛt.

⁸ Wɛn layɔn ala, udat nɔ go fred? We PAPA GƆD, we na GƆD, dɔn tɔk, us prɔfɛt go lɔk in mɔt?

Waala Na Sameria

⁹ Tɛl dɛn pipul we tap na di sef ples na Ashdɔd ɛn Ijipt se lɛ dɛn gɛda go tinap na dɛn mawnten we de rawnd Sameria ɛn wach di katakata we de de ɛn aw pipul de siz advantej pan dɛn kɔmpin.

¹⁰ PAPA GƆD se, dɛn nɔ no aw fɔ du natin di rayt we. Dat na dɛn wan dɛn we de kip dɛn bad bad ɛn tif tif tin dɛn na dɛn os

¹¹ PAPA GƆD we na GƆD tɔk se, “Ɛnimi go atak di kɔntri, i go brok di sikyɔriti we una abop pan ɛn nyakanyaka ɔl una militri bes.”

¹² PAPA GƆD tɔk igen se: “Lɛkɛ aw man we de mɛn ship kin de fɛt fɔ pul di ship kɔmɔt na layɔn in mɔt we na tu fut ɔ waŋren yes nɔmɔ i kin jɔg kɔmɔt na di layɔn in mɔt, ɔ lɛkɛ aw pɔsin de pul bed ed ɔ fut kɔmɔt sɔnsay bɔt lɛf di ɔda pat pan di bed, na so na tu-tri nɔmɔ go lɛf pan di Izrɛlayt dɛn we de na Sameria.”

¹³ “Yɛri dis mɛsej ɛn wɔn Jekɔb in jɛnareshɔn se, na so PAPA GƆD we na GƆD se.

¹⁴ Da de de a go pɔnish Izrɛl fɔ di bad we dɛn de du. A go pwɛl pwɛl di ɔlta dɛn na Bɛthɛl; A go kɔt di ɔn dɛn na di ɔlta ɛn trowe dɛn na grɔn.

¹⁵ A go brok dɛn dray sizin os ɛn di ren sizin os. A go pwɛl ɔl di os dɛn we dɛn drɛs wit ayvri ɛn ɔl dɛn fayn fayn os we dɛn gɛt.” Na mi PAPA GƆD tɔk so.