Emɔs 2 - Krio Fɔs Oli Baybul

Moab

¹ PAPA GƆD tɔk se: “Di pipul na Moab dɔn sin bɔku bɔku, ɛn a mɔs pɔnish dɛn fɔ dat, bikɔs dɛn bɔn di kiŋ na Idɔm in bonbon to ashis.

² A go sɛn faya na Moab ɛn nyakanyaka di wɔl we de rawnd Kɛriɔth. Aw di pipul go de ala na so trɔmpɛt go de blo ɛn na so dɛn go de day.

³ A go kil di pɔsin we de rul de ɛn in ɔfisa dɛn.”

Juda

⁴ PAPA GƆD tɔk se: “Di pipul na Juda dɔn sin bɔku bɔku, ɛn a mɔs pɔnish dɛn fɔ dat. Dɛn nɔ gri kip di lɔ we mi PAPA GƆD gi dɛn, ɛn dɛn nɔ du wetin a se, bifo dat na lay lay gɔd dɛn sidɔm fɔ de wɔship, dɛn gɔd dɛn we dɛn fɔstɛm-papa dɛn bin de wɔship.

⁵ A go sɛn faya na Juda ɛn nyakanyaka di wɔl we de rawnd Jerusɛlɛm.”

PAPA GƆD Pas Jɔjmɛnt Pan Izrɛl

⁶ PAPA GƆD tɔk se: “Di pipul na Izrɛl dɔn sin bɔku bɔku, ɛn a mɔs pɔnish dɛn fɔ dat. Dɛn de sɛl ɔnɛs pipul fɔ silva, dɔn di poman fɔ sandal.

⁷ Dɛn de sidɔm na poman in ed lɛkɛ we dɛn de mas dɔti, ɛn siz advantej pan am. Papa ɛn pikin de sɛks wit di sem uman ɛn briŋ shem kam pan mi nem.

⁸ Klos we pɔsin go plɛj to dɛn, nain dɛn de wɛr fɔ kam slip nia dɛn ɔlta dɛn. Di rɔm we nain dɛn se pipul fɔ pe, nain dɛn de drink insay mi os, we na dɛn PAPA GƆD in os.

⁹ “Dɛnsɛf si aw a nyakanyaka dɛn Amɔrayt we laŋa lɛk sida tik, ɛn traŋa lɛk ok tik. Dɛn si aw a trifut ɛn kapsay dɛn.

¹⁰ A pul una kɔmɔt Ijipt ɛn mek una pas na di ɛmti land we pɔsin nɔ go ebul tap fɔ foti ia fɔ mek a go gi una di Amɔrayt dɛn land.

¹¹ Noto mi mek una bɔypikin dɛn bi prɔfɛt ɛn mek di yɔŋ bɔbɔ dɛn bi Nazirayt? Noto so i bi una dɛn Izrɛlayt? Una tɔk nɔ!

¹² Naw una grap go mek di Nazirayt dɛn de drink rɔm ɛn tɛl di prɔfɛt dɛn se dɛn nɔ fɔ tɔk wetin a tɛl dɛn.

¹³ Fɔseka wetin una de du, a go mas una lɛk aw ɔmɔlanke we lod bad bad wande mas dɔti.

¹⁴ Dɛn wan we ebul rɔn nɔ go ebul fɔ rɔn, yu we gɛt trɛnk, nɔ abop pan yu trɛnk ɛn yu we na tɔf soja nɔ go ebul sev yu layf.

¹⁵ Di man we de fɛt wit bo ɛn aro nɔ go ebul fɔ tinap, di sojaman we gɛt spid na fut nɔ go ebul rɔn, ɛn di man sɛf we de rayd ɔs nɔ go ebul sev in layf.

¹⁶ Ivin di sojaman we de mek brev go rɔnawe lɛf in wɛpɔn.” Na so PAPA GƆD se.