Emɔs 1 - Krio Fɔs Oli Baybul

¹ Dis na wetin Emɔs we de mɛn ship we kɔmɔt Tɛkoa tɔk. PAPA GƆD sho ɔl dɛn tin ya to Emɔs bɔt Izrɛl tu ia bifo di athkwek bi, di tɛm we Uzaya na bin kiŋ na Juda, dɔn Jɛroboam we na Jɛoash in bɔypikin na bin kiŋ na Izrɛl.

² Emɔs tɔk se: “Di wantɛm ala we PAPA GƆD ala na Mawnt Zayɔn; wit in vɔys na Jerusɛlɛm we tan lɛkɛ tinada, ɔl dɛn grin plant wida, dɛn lif na Mawnt Kamɛl rɔtin.”

PAPA GƆD Pas Jɔjmɛnt Pan Izrɛl In Neba Dɛn Siria

³ PAPA GƆD in tɔk se, “Di pipul na Damaskɔs dɔn sin bɔku bɔku, ɛn a mɔs pɔnish dɛn fɔ dat. Dɛn siz advantej pan di pipul dɛn na Giliad ɛn wok dɛn lɛkɛ slev.

⁴ A go sɛn faya na Kiŋ Azaɛl in os ɛn nyakanyaka di wɔl we Kiŋ Bɛnadad bil rawnd de.

⁵ A go brok di ayɛn ba we dɛn yuz fɔ blɔk di get fɔ go insay Damaskɔs. A go kil di man we de rul na Avɛn Vali ɛn di ɔda wan dɛn we de kɔntrol di staf na Bɛthidɛn. Dɛn a go kapchɔ ɔl di pipul we de na Siria kɛr dɛn go na Kir.”

Filistia

⁶ PAPA GƆD tɔk se: “Di pipul na Gaza dɔn sin bɔku bɔku, ɛn a mɔs pɔnish dɛn fɔ dat. Dɛn grap go kapchɔ di pipul dɛn na dɛn vilej ɛn sɛl dɛn as slev to di pipul dɛn na Idɔm.

⁷ A go sɛn faya na Gaza ɛn nyakanyaka di wɔl we de rawnd de.

⁸ A go kil di man dɛn we de rul na Ashdɔd ɛn di ɔda wan dɛn we de kɔntrol di staf na Ashkɛlɔn. A go pɔnish di pipul dɛn we de na Ɛkrɔn ɛn di wan dɛn we lɛf na Filistia dɛn ɔl go day.”

Taya

⁹ PAPA GƆD tɔk se: “Di pipul na Taya dɔn sin bɔku bɔku, ɛn a mɔs pɔnish dɛn fɔ dat. Dɛn grap go kapchɔ pipul dɛn na dɛn vilej ɛn sɛl dɛn as slev to di pipul dɛn na Idɔm. Dɛn nɔ kip to di agrimɛnt we dɛn fɔ sho dɛn na brɔda dɛn.

¹⁰ A go sɛn faya na Taya ɛn nyakanyaka di wɔl we de rawnd de.”

Idɔm

¹¹ PAPA GƆD tɔk se: “Di pipul na Idɔm dɔn sin bɔku bɔku, ɛn a mɔs pɔnish dɛn fɔ dat. Dɛn grap go tek sɔd de rɔnata ɛn kil di Izrɛlayt dɛn we na dɛn brɔda, dɛn nɔ sho lɔv lɛk fɔ se dɛn na brɔda dɛn. Dɛn se dɛn vɛks, so dɛn nɔ bisin if dɛn na brɔda ɔ nɔto brɔda.

¹² A go sɛn faya na Tɛman ɛn nyakanyaka di wɔl we de rawnd Bozra.”

Amɔn

¹³ PAPA GƆD tɔk se: “Di pipul na Amɔn dɔn sin bɔku bɔku, ɛn a mɔs pɔnish dɛn fɔ dat. Wɛn dɛn go fɛt Giliad fɔ tek dɛn land, dɛn plit bɛlɛuman dɛn bɛlɛ opin ɛn pul di pikin kɔmɔt.

¹⁴ A go sɛn faya na Raba ɛn nyakanyaka di wɔl we de rawnd de. Na big big kray go de di de we dɛn go fɛt wa ɛn di fɛt go tan lɛk wɛn big big tinada de blo.

¹⁵ A go mek di kiŋ ɛn in ɔfisa dɛn go ɛgzayl.”