Apɔsul Dɛn Wok 27 - Krio Fɔs Oli Baybul

Dɛn Kɛr Pɔl Go Rom

¹ Wɛn dɛn gri fɔ mek wi go Itali, dɛn lɛf Pɔl ɛn sɔm ɔda jelman dɛn wit wan bigman fɔ dɛn soja man, we nem Julyɔs. Julyɔs na bin wan pan dɛn bigman fɔ di big kiŋ na Rom in soja man dɛn.

² Wi go tek big bot na Adramitiɔm; di bot bin de go Eshya. Wi mit wan man na di bot we bin nem Aristakɔs, na bin Masidonia man bɔt i bin kɔmɔt Tɛsalonayka.

³ Di ɔda de wi rich Saydɔn. Julyɔs bin gud to Pɔl so i kin lɛf Pɔl fɔ go fɛn in padi dɛn ɛn i kin mek dɛn gi Pɔl ɛnitin we i want.

⁴ Wi nɔ te de wi kɔmɔt de, bɔt di briz bin plɛnti so di bot kɛr wi go di say we plɛnti briz nɔ de na Sayprɔs.

⁵ Wi krɔs klos Silishia ɛn Pamfilya, go Mayra we de Laysia.

⁶ Di soja man dɛn bigman si wan big bot we kɔmɔt Alɛgzanda de go Itali so i mek wi go insay.

⁷ Di bot bin de go slo, wi tek lɔŋ tɛm bikɔs di briz bin de blo traŋa wan, bɔt wi manej rich Nidɔs. Di briz nɔ mek wi ebul go usay wi bin want go, so wi go di say we plɛnti briz nɔ de na Krit we de klos Salmoni.

⁸ I bin traŋa fɔ mek di bot muf, bɔt di bot pas klos di sho sote wi rich wan ples we nem Gud Abɔ, di ples bin de klos Laysia.

⁹ Wi lib de lɔŋ, sote di tɛm we dɛn Ju pipul kin fas bin dɔn pas da ia de; bikɔs di wata bin tu rɔf fɔ mek ɛni bot muf. Pɔl bigin tɔk to di ɔda pipul dɛn na di bot. I se,

¹⁰ “Mi padi dɛn, a si se plɛnti tin go pwɛl ɛn plɛnti pipul go sɔfa wɛn wi kɔmɔt ya bifo wi rich usay wi de go. Nɔto wi lod ɛn di bot nɔmɔ go pwɛl, bɔt wisɛf go lɔs wi layf.”

¹¹ Bɔt di soja man dɛn bigman nɔ tek wetin Pɔl se, i lisin to wetin di edman na di bot ɛn di man we gɛt di bot se.

¹² Di ples nɔ bin gud fɔ mek dɛn de de kol sizin, so plɛnti pipul se mek dɛn kɔmɔt de ɛn tray rich na wan abɔ na Krit we nem Finiks; if yu de luk di say we san de go dɔŋ na Krit, Finiks de midul yu lɛfan ɛn raytan. Na de dɛn bin want de te di kol sizin dɔn.

Di Big Briz

¹³ Wɛn di briz nɔ bin plɛnti igen, dɛn bin min se di bot kin go, so dɛn lus di bot ɛn mek i pas klos di sho.

¹⁴ I nɔ te igen, ɔda big big briz we dɛn kɔl “Nɔtist” (dat min “Briz we kɔmɔt di say we di san de kɔmɔt, na yu lɛfan”)

¹⁵ I shek di bot traŋa wan. Dɛn tray fɔ lɛ di bot tɔn bak go Krit, bɔt di briz kɛr wi go.

¹⁶ Wi rich na wan ples we de midul wata, we nem Kawda. Dɛn wi du sɔntin to di smɔl bot we bin tay pan di big bot mek i nɔ go brok, bɔt dat bin traŋa fɔ du.

¹⁷ Dɛn drɔ di smɔl bot pantap, ɛn tek rop tay am rawnd di big bot fɔ mek i nɔ skata. Bɔt sansan bin pak na di wata, we bin de klos Libia, so dɛn fred se di big bot go fasin na di il dɛn we di sansan mek, so dat mek dɛn pul di sel mek di briz nɔ go kɛr di big bot go fa.

¹⁸ Di bot bin de shek tumɔs na di briz so di ɔda de dɛn bigin trowe sɔm pan di lod na di wata.

¹⁹ Di de we mek tri, wi bigin tek wi an pul sɔm dɛn tin lɛkɛ sel ɛn rop pan di big bot ɛn trowe dɛn na di wata.

²⁰ Wi de lɔŋ, wi nɔ si san, wi nɔ si sta. Di briz bin de big mɔ ɛn mɔ, so wi bin fil se wi go day.

²¹ Ɔl di pipul dɛn na di bot bin de lɔŋ, dɛn nɔ it; Pɔl tinap wɛn dɛn ɔl gɛda ɛn se, “If una bin tek wetin a tɛl una, una nɔ bin fɔ kɔmɔt na Krit ɛn ɔl dis waala ɛn lɔsis nɔ bin fɔ mit wi.

²² Bɔt naw a de beg una, mek una at nɔ pwɛl. Nɔbɔdi nɔ go day.

²³ Yɛstade nɛt, Gɔd we gɛt mi ɛn we a de pre to sɛn in enjɛl kam to mi.

²⁴ Di enjɛl se, ‘Pɔl, nɔ fred! Yu go tinap bifo di kiŋ na Rom; ɛn Gɔd dɔn se una ɔl go rich Rom ɛn nɔbɔdi nɔ go day.’

²⁵ So, una nɔ mek una at pwɛl, a biliv se ɔl wetin Gɔd dɔn tɛl mi, go bi.

²⁶ Bɔt di big bot go drif go na wan ples we de midul wata.”

²⁷ Di de we mek fotin, na nɛt, di bot bin de drif na di big wata we nem Adria. Midul nɛt, di man dɛn we bin de wok na di big bot tink se wi dɔn rich klos sho.

²⁸ So dɛn mɛnshɔ di wata, dɛn si se na wan ɔndrɛd ɛn twɛnti fut di wata go dɔŋ. Di bot go bifo say lili bit, dɔn dɛn mɛnshɔ di wata igen, dɛn si se na naynti fut di wata go dɔŋ.

²⁹ Di man dɛn we bin de wok na di bot bin de fred se di bot go go pantap dɛn big ston. Dɛn tay fo ebi ayɛn, dɔn dɛn tinap biɛn di big bot ɛn sɛn di ayɛn dɛn insay di wata so dat di big bot nɔ go drif. Dɛn pre fɔ mek do klin.

³⁰ Sɔm pan di man dɛn we bin de wok na di big bot bin want rɔnawe. So dɛn put di smɔl bot we bin de insay di big bot na di wata ɛn mek lɛkɛ se dɛn de go put di anka frɔnt di big bot.

³¹ Pɔl tɛl di soja man dɛn bigman ɛn di ɔda soja man dɛn se, “If dɛn pipul ya kɔmɔt insay di big bot, una go day!”

³² So di soja man dɛn kɔt di rop dɛn we dɛn bin tek tay di smɔl bot ɛn mek i fɔdɔm na di wata.

³³ Bifo do klin, Pɔl tɛl di man dɛn fɔ it, i se, “Tide mek fotin de we una de wet ɛn una nɔ it natin.

³⁴ Duya, una it so dat una go gɛt trɛnk. Natin nɔ go du una.”

³⁵ Wɛn Pɔl dɔn tɔk dɔn, i tek bred bifo ɔlman, i tɛl Gɔd tɛnki, i kɔt di bred, it am.

³⁶ Dat kɔrej di ɔda pipul dɛn so dɛnsɛf it lili bit.

³⁷ Na wi tu ɔndrɛd ɛn sɛvinti siks bin de insay di big bot.

³⁸ Wɛn ɔlman dɔn it te dɛn satisfay, dɛn trowe ɔl di kɔn na wata fɔ mek di big bot go layt.

Di Big Bot Fasin

³⁹ Wɛn do klin, wi si di ples, bɔt nɔbɔdi nɔ bin no ɛnitin bɔt am, bɔt dɛn si wan bi we gɛt bich we dɛn tink se di big bot kin go insay.

⁴⁰ Dɛn kɔt di anka dɛn ɛn lɛf dɛn midul di wata. Dɛn lus di rop we bin tay di padul dɛm ɛn es di big sel ɔp so dat di briz go kɛr di big bot go na sho.

⁴¹ Bɔt di bot go fasin na di il we di sansan mek ɔnda di wata; di frɔnt pat na di big bot fasin, so di swɛlin dɛn na di wata brok di bak pat pan di bot.

⁴² Di soja man dɛn go ɛŋ ed fɔ kil di jelman dɛn fɔ mek dɛn nɔ go swim ɛn rɔnawe go.

⁴³ Bɔt di soja man dɛn bigman nɔ bin want mek dɛn kil Pɔl, so i nɔ gri mek di soja man dɛn kil di jelman dɛn. I tɛl dɛn wan we sabi swim fɔ jomp na di wata ɛn swim go na di sho.

⁴⁴ Di ɔda pipul dɛn swim pan bod ɛn dɛn pat we brok pan di big bot. Na so dɛn du sote dɛn ɔl rich na di sho, natin nɔ du dɛn.