Apɔsul Dɛn Wok 26 - Krio Fɔs Oli Baybul

Pɔl Tɛl Agripa Wetin Bi

¹ Agripa se, “Pɔl, yu kin tɔk fɔ yusɛf naw.” So Pɔl es in an ɔp ɛn bigin tɔk; i se,

² “Kiŋ Agripa, a gladi fɔ di chans we a gɛt fɔ tinap bifo yu ɛn ansa fɔ ɔl dɛn tin we di Ju pipul dɛn se a du.

³ Yu no ɔltin bɔt aw di Ju dɛn liv ɛn dɛn tin we dɛn kin de agyu bɔt wit dɛn kɔmpin, bɔt a de beg yu fɔ lisin to ɔl wetin a de kam tɛl yu naw.

⁴ “Ɔl di Ju pipul dɛn no uskayn layf a liv frɔm we a smɔl, dɛn no se na mi yon pipul dɛn fɔs a bin de wit na Jerusɛlɛm.

⁵ If dɛn want tɔk tru, dɛnsɛf no se mi na bin gud Faresi.

⁶ Naw dɛn de jɔj mi bikɔs a biliv di prɔmis we Gɔd gi wi grampapa papa dɛn.

⁷ Dɛn twɛlv trayb na di Ju neshɔn bin abop se dis tin ya we Gɔd bin prɔmis wi grampapa papa dɛn, go bi. Dɛn bin de pre to Gɔd de ɛn nɛt. Kiŋ Agripa, na bikɔs misɛf biliv dis sem tin mek dɛn de tɔk bad bɔt mi.

⁸ Wetin mek una nɔ ebul biliv se Gɔd de mek dɛn pipul we dɔn day rayz frɔm dɛn grev?

⁹ “A bin biliv se a fɔ du ɛnitin we a ebul du fɔ pwɛl Jizɔs we kɔmɔt Nazarɛt, in nem.

¹⁰ A du dat na Jerusɛlɛm. Dɛn bigman we de mek sakrifays fɔ pipul sin gi mi pawa fɔ jel ɛn kil di Kristiɛn dɛn so a bin jel plɛnti Kristiɛn dɛn ɛn wɛn dɛn bin de kil di Kristiɛn dɛn, a kin tɔk bad bɔt dɛn.

¹¹ A bin de go insay di Ju mitin os dɛn go pɔnish di Kristiɛn dɛn fɔ mek dɛn tɔk se dɛn nɔto Kristiɛn igen. Mi at bin so bad fɔ dɛn dat a kin fala dɛn go na dɛn ɔda kɔntri fɔ go pɔnish dɛn.

Pɔl Tɔk Aw I Kam Bi Kristiɛn

¹² “Dɛn bigman we de mek sakrifays fɔ pipul sin bin sɛn mi go Damaskɔs wit lɛta we sho se dɛn gi mi di pawa fɔ du ɛnitin wit di Kristiɛn dɛn.

¹³ Kiŋ Agripa, wan santɛm, a bin de na rod de go Damaskɔs wɛn wan brayt layt shayn pan wi. Dis layt ya bin kɔmɔt ɔp klawd ɛn i bin brayt pas san.

¹⁴ Wi ɔl fɔdɔm na grɔn, nain a yɛri vɔys de tɔk na Ibru se, ‘Sɔl, Sɔl, wetin mek yu de fɛt mi? Yu go wund yusɛf if yu kik chuk chuk.’

¹⁵ A se, ‘Udat na yu, Masta?’ Di vɔys se, ‘Mi na Jizɔs we yu de fɛt!

¹⁶ Grap, tinap; A dɔn sho misɛf to yu ɛn a dɔn pik yu fɔ wok fɔ mi. Yu fɔ tɛl ɔda pipul wetin yu dɔn si tide ɛn yu fɔ tɔk wetin a want yu fɔ tɔk.

¹⁷ A go mek dɛn pipul we a sɛn yu to, dɛn Ju ɛn dɛn wan we nɔto Ju, nɔ ebul du yu bad.

¹⁸ Yu fɔ opin dɛn yay; yu fɔ pul dɛn kɔmɔt na dak ɛn briŋ dɛn kam na layt. Yu fɔ pul dɛn kɔmɔt ɔnda Setan in pawa ɛn briŋ dɛn kam to Gɔd. Bikɔs dɛn biliv pan mi, Gɔd go padin dɛn sin, ɛn dɛn go de na di ples we dɛn pipul we Gɔd dɔn pik, go de.’

Pɔl Tɔk bɔt in Wok

¹⁹ “Kiŋ Agripa, a du dɛn tin we di vɔys we kɔmɔt ɛvin tɛl mi fɔ du.

²⁰ Fɔs a go tɛl dɛn pipul na Damaskɔs, Jerusɛlɛm, ɛn ɔlɔbɔt na Judia, bɔt Gɔd; dɔn a tɛl dɛn pipul we nɔto Ju bɔt Gɔd. A tɛl dɛn fɔ lɛf fɔ du dɛn bad tin we dɛn de du ɛn kam to Gɔd, ɛn fɔ de du dɛn tin we sho se dɛn dɔn kam to Gɔd.

²¹ Na dat mek di Ju dɛn bin ol mi, dɔn dɛn tray fɔ kil mi wɛn a bin de na Gɔd in Os.

²² Bɔt we Gɔd de ɛp mi, te tide a de tɛl ɔlman, pikin o, bigman o, ɔl wetin tru. Wetin a de tɔk, nain dɛn prɔfɛt ɛn Mozis bin dɔn tɔk lɔntɛm se go bi.

²³ Dɛn bin se di Mɛsaya fɔ day ɛn i go bi di fɔs pɔsin we go rayz frɔm di grev fɔ tɛl dɛn Ju pipul dɛn ɛn dɛn pipul we nɔto Ju aw dɛn go sev, ɛn di sev we dɛn go sev tan lɛkɛ layt to dɛn.”

²⁴ Wɛn Pɔl de tɔk, Fɛstɔs ala pan am se, “Pɔl, yu kres! Di plɛnti buk we yu sabi de mek yu kres!”

²⁵ Pɔl ansa am se, “Kiŋ Agripa, a nɔ kres! Na tru ɛn soba wɔd a de tɔk.

²⁶ Kiŋ Agripa, yu no bɔt ɔl dɛn tin ya, dɛn nɔ ayd frɔm yu bikɔs dɛn nɔ bi na kɔna, so a nɔ de fred fɔ tɔk bɔt dɛn.

²⁷ Kiŋ Agripa, yu biliv wetin dɛn prɔfɛt tɛl wi? A no se yu biliv dɛn!”

²⁸ Agripa tɛl Pɔl se, “Pɔl, yu min se yu go mek a bi Kristiɛn kwik kwik wan so?”

²⁹ Pɔl ansa se, “Ilɛk di tɛm shɔt ɔ i lɔŋ, nɔto yu wangren a want fɔ kam to Krays, bɔt a de pre se una ɔl we de lisin mi go tan lɛkɛ mi bɔt dɛn nɔ go tay una wit chen lɛkɛ aw dɛn tay mi.”

³⁰ Di kiŋ, di gɔvna, Banaysi ɛn ɔl di ɔda pipul dɛn grap.

³¹ Wɛn dɛn de go, dɛn bin de tɛl dɛn kɔmpin se, “Dis man ya nɔ du natin fɔ mek dɛn jel am ɔ mek dɛn kil am.”

³² Kiŋ Agripa tɛl Fɛstɔs se, “Yu bin fɔ lɛf dis man ya if i nɔ bin dɔn se in want mek di big kiŋ na Rom jɔj in kes.”