Apɔsul Dɛn Wok 25 - Krio Fɔs Oli Baybul

Pɔl Aks fɔ Mek dɛn Kɛr am Go to di Kiŋ na Rom

¹ Wɛn Fɛstɔs bi gɔvna, di de we mek fo, i kɔmɔt Sizaria go Jerusɛlɛm.

^2-3 Dɛn bigman we de mek sakrifays fɔ pipul sin ɛn dɛn Ju bigman dɛn go mit Fɛstɔs. Dɛn tɛl am bad tin dɛn bɔt Pɔl. Dɛn bin want mek dɛn briŋ Pɔl kam bak na Jerusɛlɛm, bikɔs dɛn bin dɔn bagin fɔ kil am na rod.

⁴ Fɛstɔs tɛl dɛn se, “Dɛn dɔn kip Pɔl na di jel we de na Sizaria. A nɔ de te na ya, a go go de bak.

⁵ If Pɔl du una bad, una mɔs kam wit una bigman dɛn mek wi tɔk di kes.”

⁶ Fɛstɔs nɔ tek pas tɛn de na Jerusɛlɛm bifo i go bak na Sizaria. Di ɔda de i go kot fɔ jɔj kes; i mek dɛn briŋ Pɔl kam bifo am.

⁷ Wɛn Pɔl rich insay di kot, di Ju pipul dɛn we bin kɔmɔt Jerusɛlɛm go tinap rawnd am. Dɛn tɔk se Pɔl du plɛnti bad tin, bɔt dɛn nɔ bin ebul pruv se na tru dɛn de tɔk.

⁸ Pɔl tray fɔ sho se na lay dɛn lay pan am, i se, “A nɔ du ɛnitin we di Ju Lɔ se wi nɔ fɔ du, a nɔ du ɛnitin bad na Gɔd in Os, ɛn a nɔ du ɛnitin we di Roman lɔ se wi nɔ fɔ du.”

⁹ Fɛstɔs bin want fɔ mek di Ju pipul dɛn lɛk am so i aks Pɔl se, “Yu go want lɛ dɛn kɛr yu go Jerusɛlɛm, mek a go tɔk di kes de?”

¹⁰ Pɔl ansa am se, “Na ya dɛn fɔ jɔj mi bikɔs na di kiŋ na Rom in kot dis. Yusɛf dɔn si se a nɔ du di Ju pipul dɛn bad.

¹¹ If a brok di lɔ ɔ if a du ɛnitin we fɔ mek dɛn kil mi, a nɔ go se mek una nɔ kil mi. Bɔt if wetin dɛn pipul ya tɔk bɔt mi nɔto tru, nɔbɔdi nɔ fɔ lɛf mi na dɛn an. A want mek una kɛr mi go bifo di kiŋ na Rom insɛf.”

¹² Wɛn Fɛstɔs dɔn ɛŋ ed wit di bigman dɛn na di kot, i se, “Ɛnti yu dɔn se yu want go bifo di kiŋ na Rom, a go sɛn yu go to am.”

Dɛn Kɛr Pɔl Go bifo Agripa ɛn Banaysi

¹³ I nɔ tu te afta dat, Kiŋ Agripa ɛn Banaysi kam na Sizaria. Dɛn bin kam tɛl Fɛstɔs adu.

¹⁴ Wɛn dɛn bin dɔn de de lɔŋ lili bit, Fɛstɔs tɛl Kiŋ Agripa bɔt Pɔl; i se, “Wan man de ya we Filiks bin lɛf na jel.

¹⁵ Wɛn a bin go Jerusɛlɛm, dɛn bigman we de mek sakrifays fɔ pipul sin ɛn di ɔda Ju bigman dɛn tɛl mi se di man du bad, ɛn dɛn bin want mek a kɔndɛm am.

¹⁶ Bɔt a tɛl dɛn se nɔto so di Roman dɛn de du; wi nɔ de jɔj pɔsin if wi nɔ dɔn gi am chans fɔ mit dɛn wan we se i du bad ɛn tɔk if insɛf gri wit di tin we dɛn se i du.

¹⁷ Wɛn ɔl di pipul dɛn we ol Pɔl kam, a nɔ dile; a go na di kot ɛn mek dɛn briŋ Pɔl, dɛn a sidɔm fɔ tɔk di kes.

¹⁸ Wɛn di pipul dɛn we ol am tinap fɔ tɔk, dɛn nɔ tɔk ɛnitin bad bɔt am lɛkɛ aw a bin min se dɛn go tɔk.

¹⁹ Ɔl wetin dɛn bin de tɔk bɔt na bɔt aw pɔsin fɔ pre to Gɔd ɛn bɔt wan man we nem Jizɔs we bin dɔn day, bɔt we Pɔl se de layf wan naw.

²⁰ A nɔ bin no aw fɔ jɔj di kes; na dat mek a aks Pɔl if i want go Jerusɛlɛm fɔ mek dɛn go jɔj am de.

²¹ Bɔt Pɔl aks dɛn se mek dɛn kip am sote Kiŋ Ɔgɔstɔs de jɔj, bifo dɛn kɔl in kes bak. So a tɛl dɛn mek dɛn gyad am sote a ebul sɛn am go to di kiŋ na Rom.”

²² Agripa tɛl Fɛstɔs se, “A go want tɔk to dis man.” Fɛstɔs ansa am se, “Yu go tɔk to am tumara.”

²³ Di ɔda de, Agripa ɛn Banaysi go na di ples we pipul de gɛda ɛn ɔl di pipul dɛn du plɛnti tin fɔ sho se dɛn rɛspɛkt dɛn. Agripa dɛn go insay di ples wit dɛn edman fɔ dɛn soja man ɛn dɛn bigman na di tɔŋ. Fɛstɔs tɛl dɛn fɔ briŋ Pɔl kam bifo dɛn.

²⁴ Fɛstɔs se, “Kiŋ Agripa ɛn ɔlman we de ya; una si dis man, nain dɛn Ju pipul na Jerusɛlɛm ɛn dɛn Ju we de na ya de kɔmplen to wi bɔt. Dɛn ɔl de ala se i fɔ day.

²⁵ Bɔt a nɔ si ɛnitin we i du we fɔ mek dɛn kil am. Insɛf dɔn se in want fɔ go to di kiŋ na Rom, so a dɔn gri fɔ sɛn am go de.

²⁶ Bɔt a nɔ gɛt natin fɔ rayt to di kiŋ na Rom bɔt dis kes. A dɔn briŋ am kam bifo yu, kiŋ Agripa ɛn una ɔl, so wɛn una dɔn kwɛshɔn am dɔn, a go gɛt sɔntin fɔ rayt to di kiŋ na Rom.

²⁷ Bikɔs i nɔ go fayn fɔ mek a sɛn jelman go to di kiŋ na Rom if a nɔ ebul tɛl am wetin di jelman du.”