Apɔsul Dɛn Wok 22 - Krio Fɔs Oli Baybul

¹ I se, “Mi papa dɛn ɛn mi brɔda dɛn, una lisin mek a tɛl una wetindu una nɔ fɔ kɔndɛm mi!”

² Wɛn dɛn yɛri Pɔl de tɔk Ibru, di ples mek yeŋ.

³ Pɔl se, “Mi na Ju man, a bɔn na Tasɔs we de na Silishia. Dɛn mɛn mi na Jerusɛlɛm ɛn Gameliɛl na bin mi ticha. I tek tɛm fɔ lan mi di Lɔ we wi grampapa papa dɛn lɛf ɛn a gi misɛf fɔ wok fɔ Gɔd lɛkɛ una we de ya tide.

⁴ A bin de biɛn dɛn pipul we de fala dis We sote a mek dɛn kil dɛn. A bin de ol man ɛn uman ɛn mek dɛn jel dɛn.

⁵ Di bigman we de mek sakrifays fɔ pipul sin ɛn ɔl di bigman dɛn na di Ju gran kot kin tɛl una se na tru a de tɔk. Dɛn bin gi mi lɛta fɔ kɛr go gi mi Ju brɔda dɛn na Damaskɔs. A bin go de fɔ ol dɛn pipul we de fala dis We ɛn tay dɛn briŋ dɛn kam bak na ya fɔ mek di bigman dɛn na di Ju gran kot mek dɛn sɔfa.

Pɔl Tɔk bɔt Aw I Kam Bi Kristiɛn

⁶ “Wan santɛm we a bin de go Damaskɔs, a bin dɔn de rich, nain brayt layt we kɔmɔt ɔp klawd shayn pan mi.

⁷ A fɔdɔm na grɔn, dɔn a yɛri wan vɔys de se, ‘Sɔl, Sɔl! Wetin mek yu de fɛt Mi so?’

⁸ A se, ‘Udat na yu, Masta?’ Di vɔys ansa se, ‘Mi na Jizɔs we kɔmɔt Nazarɛt, na Mi yu de fɛt.’

⁹ Di man dɛn we bin de wit mi si di layt bɔt dɛn nɔ yɛri di vɔys we bin de tɔk to mi.

¹⁰ A se, ‘Masta, wetin a fɔ du?’ Di Masta ansa mi se, ‘Grap, go Damaskɔs, na de dɛn go tɛl yu ɔltin we Gɔd want yu fɔ du.’

¹¹ Di layt bin mek a blɛn, na mi kɔmpin dɛn ol mi an kɛr mi go insay Damaskɔs.

¹² “Wan man bin de na di tɔŋ we bin nem Ananayas, na man we bin fred Gɔd, i bin de du wetin di Ju Lɔ se ɛn ɔl dɛn Ju na Damaskɔs bin rɛspɛkt am.

¹³ I kam tinap klos mi ɛn se, ‘Mi brɔda, Sɔl, opin yu yay mek yu si bak!’ Wantɛm mi yay opin ɛn a si am.

¹⁴ I se, ‘Da Gɔd we wi grampapa papa dɛn bin de pre to dɔn pik yu fɔ mek yu no wetin i want yu fɔ du, ɛn mek yu go si di wangren Pɔsin we tret we de wok fɔ Gɔd, ɛn mek yu yɛri in vɔys wɛn i de tɔk to yu.

¹⁵ Yu go de tɛl ɔlman wetin yu dɔn si ɛn wetin yu dɔn yɛri.

¹⁶ Wetin yu de wet naw? Grap, mek dɛn baptayz yu, ɛn pre to di Masta mek Gɔd go pul yu pan di bad tin dɛn we yu de du.’

Gɔd Sɛn Pɔl to dɛn Pipul we Nɔto Ju

¹⁷ “A tɔn bak go Jerusɛlɛm ɛn wɛn a bin de pre, Gɔd sho mi sɔntin.

¹⁸ A si di Masta; i tɛl mi se, ‘Go kwik, kɔmɔt na Jerusɛlɛm bikɔs di pipul dɛn na ya nɔ go biliv wetin yu de tɛl dɛn bɔt mi.’

¹⁹ A se, ‘Masta, dɛn no se a bin de go na di Ju mitin os go ol dɛn pipul we biliv pan Yu ɛn bit dɛn.

²⁰ A bin de wɛn dɛn kil Stivin, da man we bin de tɛl pipul bɔt yu. A bin gri fɔ mek dɛn kil am ɛn na mi bin kip di pipul dɛn we kil Stivin, dɛn klos.’

²¹ Bɔt di Masta tɛl mi se, ‘Go, bikɔs a go sɛn yu to dɛn pipul we nɔto Ju.’”

Pɔl Go Bak to di Ju Pipul dɛn

²² Di pipul dɛn nɔ tɔk natin sote Pɔl tɔk dɔn. Nain dɛn ala se, “Una kɛr am go kil am! Lɛ wi nɔ si am igen!”

²³ Di pipul dɛn bin de ala, shek dɛn klos, ɛn sɛn dɔti ɔp.

²⁴ Di edman fɔ di Roman soja man dɛn tɛl in soja man dɛn fɔ kɛr Pɔl go na barik, i mek dɛn bit Pɔl fɔ mek i tɔk if na tru wɔd di Ju pipul dɛn de ala tɔk bɔt am.

²⁵ Bɔt wɛn dɛn want bit am, dɛn tay am; nain Pɔl aks di soja man dɛn edman we bin tinap de se, “Di lɔ tɛl una se una kin bit pɔsin we na Roman wɛn una nɔ jɔj am yet?”

²⁶ Wɛn di bigman yɛri wetin Pɔl tɔk, i go aks di edman dɛn se, “Wetin una de du so? Dis man na Roman!”

²⁷ Na de di edman aks Pɔl se, “A want no if yu na Roman.” Pɔl ansa se, “Yɛs, mi na Roman.”

²⁸ Di edman se, “Na plɛnti kɔpɔ a pe fɔ mek a bi Roman.” Pɔl tɛl am se, “Bɔt mi mama na Roman; mi papa na Roman.”

²⁹ Di soja man dɛn we bin want bit Pɔl tɔn bak wantɛm. Dɛn edman fred wɛn i no se Pɔl na Roman bikɔs i bin mek dɛn tay am.

Dɛn Kɛr Pɔl Go Kot

³⁰ Di edman bin want no if ɔl wetin di Ju dɛn bin de tɔk na tru. Di ɔda de i mek in soja man dɛn lus Pɔl, dɔn i kɔl dɛn bigman we de mek sakrifays fɔ pipul sin ɛn ɔl dɛn mɛmba na di Ju gran kot fɔ kam mit. Dɛn kɛr Pɔl go bifo dɛn.