Apɔsul Dɛn Wok 19 - Krio Fɔs Oli Baybul

Pɔl Go Ɛfisɔs

¹ Di tɛm we Apɔlɔs bin de na Kɔrint, Pɔl waka insay dɛn kɔntri te i rich Ɛfisɔs; na de i mit sɔm Kristiɛn dɛn.

² Pɔl aks dɛn se, “Frɔm we una bi Kristiɛn, Gɔd in Spirit dɔn kam pan una?” Di Kristiɛn dɛn ansa Pɔl se, “Wi nɔ yɛri bɔt Gɔd in Spirit wande.”

³ Pɔl aks dɛn igen se, “Wetin una bin biliv bifo dɛn baptayz una?” Dɛn ansa Pɔl se, “Wi bin biliv wetin Jɔn tɔk bɔt baptayz.”

⁴ Pɔl se, “Wɛn Jɔn de baptayz pɔsin, i kin tɛl am mek i lɛf fɔ du di bad tin dɛn we i de du; i tɛl di Izrɛl pipul dɛn fɔ biliv di Wan we go kam wɛn in dɔn go. Na Jizɔs i bin de tɔk bɔt.”

⁵ Wɛn di pipul dɛn yɛri wetin Pɔl tɔk, dɛn gri mek i kɔl Masta Jizɔs in nem wɛn i de baptayz dɛn.

⁶ Pɔl put in an na dɛn ed ɛn Gɔd in Spirit kam pan dɛn. Di pipul dɛn bigin tɔk dɛn laŋwej we dɛn nɔ lan ɛn dɛn tɔk wetin Gɔd tɛl dɛn fɔ tɔk.

⁷ Na lɛkɛ twɛlv pipul so bin baptayz.

⁸ Pɔl bin de na Ɛfisɔs tri mɔnt ɛn ɔl da tɛm de i kin de go tɔk to di pipul dɛn na di Ju mitin os, i nɔba fred. I kin agyu wit dɛn bɔt Gɔd in rul ɛn tray fɔ sho dɛn se di tin dɛn we i de tɔk bɔt Gɔd in rul na tru.

⁹ Sɔm pan di pipul dɛn bin traŋayes, dɛn nɔ bin biliv pan Krays, dɔn dɛn kin de tɛl di ɔda pipul dɛn bad tin bɔt di We, we di Masta se ɔlman fɔ liv; so Pɔl lɛf dɛn go. Wɛn i de go, i tek di Kristiɛn dɛn go. Pɔl bigin go na Tayranɔs in skul fɔ lan di pipul dɛn we bin de go de.

¹⁰ I tek tu ia de ɛn dat mek di pipul dɛn na Eshya, di Ju pipul dɛn, ɛn dɛn pipul we nɔto bin Ju yɛri di Masta in mɛsej.

Skiva In Pikin dɛn Tray fɔ Drɛb Dɛbul

¹¹ Gɔd mek Pɔl du plɛnti wɔndaful wok we pipul nɔba si wande.

¹² Pipul bin de tek Pɔl in pɔkɛtan ɛn tawɛl dɛn go put dɛn pan sik pipul. Di pipul dɛn kin wɛl ɛn dɛbul kin kɔmɔt insay dɛn.

¹³ Sɔm Ju pipul dɛn we bin de go ɔlsay fɔ drɛb dɛbul tray fɔ tek Masta Jizɔs in nem fɔ du dat. Dɛn kin tɛl di dɛbul se, “Dɛbul, a de tɔk to yu, a tek Jizɔs we Pɔl de tɔk bɔt, in nem drɛb yu.”

¹⁴ Wan bigman we bin nem Skiva, we bin de mek sakrifays fɔ pipul sin, bin gɛt sɛvin pikin; na dɛn bin de drɛb dɛbul so.

¹⁵ Bɔt di dɛbul tɛl dɛn se, “A no Jizɔs ɛn a no Pɔl, bɔt udat na una?”

¹⁶ Di man we di dɛbul bin de insay chɛr Skiva in pikin dɛn klos, wund dɛn, ɛn bit dɛn sote dɛn ɔl rɔnawe.

¹⁷ Wɛn ɔl dɛn Ju pipul ɛn dɛn Grik pipul we bin de na Ɛfisɔs yɛri wetin bi, dɛn fred ɛn ɔlman rɛspɛkt Masta Jizɔs in nem.

¹⁸ Plɛnti pan di Kristiɛn dɛn tɔk se dɛn bin dɔn du bad ɛn dɛn tɔk bifo ɔlman bɔt di bad tin dɛn we dɛn bin dɔn du.

¹⁹ Plɛnti pan dɛn pipul we bin de ple majik briŋ dɛn majik buk wan ples ɛn bɔn dɛn mek ɔlman si. Wɛn dɛn kɔnt di kɔpɔ we dɛn tek bay ɔl di buk dɛn, i rich fifti tawzin silva kɔpɔ.

²⁰ Ɔl di wɔndaful tin dɛn we bi, mek di Masta in wɔd prɛd ɔlsay, ɛn mɔ ɛn mɔ pipul biliv pan Masta Jizɔs Krays.

Di Fɛt we Bi na Ɛfisɔs

²¹ Wɛn ɔl dɛn tin ya dɔn bi, Pɔl mekɔp fɔ go na Masidonia, Gris, ɛn Jerusɛlɛm. Pɔl se, “Wɛn a dɔn waka na ɔl dɛn ples de, a gɛt fɔ go na Rom insɛf.”

²² Pɔl sɛn Timoti ɛn Irastɔs we bin de ɛp am go Masidonia, ɛn in lɛf na Eshya.

²³ Da sem tɛm de, big fɛt bin bi na Ɛfisɔs, ɛn na we Pɔl tɔk bɔt di Masta in We mek di fɛt bi.

²⁴ Wan man we bin nem Dimitriɔs bin de tek silva mek plɛnti tin dɛn. I tek silva mek di gɔd we nem Ati mis. In os in ɛn in wokman dɛn bin de mek plɛnti kɔpɔ.

²⁵ So Dimitriɔs kɔl ɔl in wokman dɛn ɛn dɛn ɔda pipul we bin de du di sem wok; i tɛl dɛn se, “Mi pipul dɛn, una no se na dis wok de mek wi jɛntri.

²⁶ Una dɔn si ɛn una dɔn yɛri fɔ unasɛf wetin bra Pɔl de du. I se dɛn gɔd we mɔtalman de mek, nɔto tru gɔd ɛn plɛnti pipul we de na Ɛfisɔs ɛn di pipul dɛn ɔlsay na Eshya dɔn biliv wetin i tɛl dɛn.

²⁷ Naw a nɔ jɛs de tɔk bɔt wi wok, a de tɔk bɔt da wi big gɔd we nem Atimis, in os; i nɔ go min natin igen ɛn in pawa go pwɛl. Dɛn pipul na Eshya ɛn pipul ɔlsay na wɔl nɔ go pre to am igen!”

²⁸ Wɛn di pipul dɛn yɛri wetin Dimitriɔs tɔk, dɛn ɔl vɛks ɛn ala big wan se, “Ati mis, da gɔd we de na Ɛfisɔs, gɛt pawa!”

²⁹ Di fɛt prɛd ɔlsay na di tɔŋ. Di pipul dɛn we bin de fɛt ol Geyɔs ɛn Aristakɔs. Dɛn tu man ya na bin Masidonia pipul we bin de waka wit Pɔl. Dɛn kɛr dɛn tu go na di ples we di pipul dɛn na di tɔŋ kin de gɛda.

³⁰ Pɔl bin want de bifo di pipul dɛn wɛn dɛn de go, bɔt di Kristiɛn dɛn nɔ gri fɔ mek Pɔl du dat.

³¹ Sɔm pan dɛn bigman na Eshya we na bin Pɔl in padi dɛn, sɛn go beg Pɔl mek i nɔ go na di ples we di pipul dɛn kin gɛda.

³² Da tɛm de, ɔl di pipul dɛn bin kɔnfyus; sɔm bin de ala wan tin, ɔda wan dɛn de ala ɔda tin bikɔs dɛn nɔ bin no wetin mek dɛn gɛda de.

³³ Sɔm pipul bin de blem Alɛgzanda fɔ di fɛt bikɔs nain di Ju pipul dɛn bin put bifo. Alɛgzanda mek sayn to di pipul dɛn fɔ sɛt mɔt bikɔs i bin want ɛksplen to dɛn se in ɛn in padi dɛn nɔ no bɔt di fɛt.

³⁴ Wɛn di pipul dɛn no se Alɛgzanda na Ju, dɛn tek tu awa de ala se, “Ati mis, da gɔd we de na Ɛfisɔs, gɛt pawa!”

³⁵ Na di Meyɔ ebul mek di pipul dɛn sɛt mɔt. Di Meyɔ se, “Mi pipul dɛn na Ɛfisɔs, ɔlman no se na dis tɔŋ ya rɛspɔnsibul fɔ di os we dɛn de pre to Ati mis ɛn di ston we pipul de pre to we fɔdɔm kɔmɔt ɔp klawd pan di tɔŋ.

³⁶ Nɔbɔdi nɔ go se wi de lay. Una sɛt mɔt ɛn una tink bifo una du ɛnitin.

³⁷ Una dɔn briŋ dɛn man ya kam ya. Dɛn nɔ tif natin na di os we Ati mis de ɛn dɛn nɔ tɔk natin bad bɔt wi gɔd.

³⁸ If Dimitriɔs ɛn in wokman dɛn gɛt plaba wit ɛnibɔdi, di kot de ɛn di bigman de. Mek dɛn go le kɔmplen di de we dɛn bigman kin tɔk kes.

³⁹ Bɔt if dɛn want ɔda tin, mek di bigman dɛn na tɔŋ kɔl ɔl di pipul dɛn ɛn du wetin wi lɔ se.

⁴⁰ A de fred se dɛn go ol wi fɔ wetin wi dɔn du so tide. Di Roman pipul dɛn go se na strayk wi dɔn strayk. Wi nɔ go ebul tɔk wetin mek wi du di tin we wi dɔn du so.”

⁴¹ Wɛn i dɔn tɔk dɔn, i tɛl ɔlman fɔ go.