Apɔsul Dɛn Wok 17 - Krio Fɔs Oli Baybul

Pɔl Go na Tɛsalonayka

¹ Pɔl ɛn Saylas go Amfipolis, dɛn go Apolonia, dɔn dɛn rich Tɛsalonayka. Ju mitin os bin de na Tɛsalonayka.

^2-3 Pɔl go na di Ju mitin os, as na so i kin du ɔltɛm. Pɔl tek tri pan dɛn de we dɛn Ju pipul de pre ɛn blo, fɔ ɛksplen wetin rayt na Gɔd in Buk. I tɛl dɛn se di Mɛsaya bin gɛt fɔ sɔfa ɛn day ɛn rayz frɔm di grev. Pɔl se, “Dis Jizɔs ya we a de tɛl una bɔt nain na di Mɛsaya.”

⁴ Sɔm pipul biliv wetin Pɔl ɛn Saylas tɛl dɛn ɛn jɔyn wit dɛn. Plɛnti dɛn Grik pipul biliv ɛn tɔn to Gɔd, ɛn sɔm pan di bigman dɛn wɛf sɛf biliv ɛn tɔn to Gɔd.

⁵ Bɔt di Ju pipul dɛn bin vɛks we plɛnti pipul jɔyn wit Pɔl ɛn Saylas, so dɛn gɛda dɛn trit pipul fɔ mek nɔys. Di Ju pipul dɛn ɛn di trit pipul dɛn kɔnfyus di tɔŋ ɛn dɛn ston Jesɔn in os. Dɛn bin de fɛn Pɔl ɛn Saylas fɔ mek dɛn kam bifo di pipul dɛn na trit.

⁶ Bɔt we dɛn nɔ fɛn dɛn, dɛn drɛg Jesɔn ɛn sɔm Kristiɛn dɛn go bifo di bigman dɛn na di tɔŋ. Di Ju pipul dɛn ɛn di trit pipul dɛn bin de ala se, “Dɛn man ya de ambɔg ɔlsay! Dɛn dɔn kam naw na wi tɔŋ,

⁷ ɛn na Jesɔn bin kip dɛn nain os. Dɛn nɔ de kip di lɔ we di kiŋ na Rom gi wi, dɛn de se ɔda kiŋ de we nem Jizɔs.”

⁸ Wɛn ɔl di pipul dɛn we bin gɛda ɛn di bigman dɛn na di tɔŋ yɛri wetin di Ju pipul dɛn ɛn di trit pipul dɛn de tɔk, dat briŋ trɔbul na di tɔŋ.

⁹ Di bigman dɛn mek dɛn bel Jesɔn ɛn di ɔda Kristiɛn dɛn bifo dɛn lɛf dɛn mek dɛn go.

Pɔl ɛn Saylas Go Biria

¹⁰ Wɛn nɛt kam, di Kristiɛn dɛn mek Pɔl ɛn Saylas go na Biria. Wɛn dɛn rich de, dɛn go na di Ju mitin os.

¹¹ Di pipul dɛn na Biria bin gladi fɔ yɛri di mɛsej we Pɔl tɛl dɛn, pas di pipul dɛn na Tɛsalonayka. Dɛn bin gladi fɔ lisin wetin Pɔl de tɔk, ɛn dɛn rid wetin rayt na Gɔd in Buk fɔ si if na tru Pɔl bin de tɔk.

¹² Plɛnti Ju pipul dɛn bin biliv pan Jizɔs; sɔm dɛn pipul ya na bin Grik, man ɛn uman.

¹³ Bɔt wɛn dɛn Ju pipul na Tɛsalonayka yɛri se Pɔl de tɛl di pipul dɛn na Biria Gɔd in mɛsej, dɛn go de go put wɔd na di pipul dɛn yes fɔ mek dɛn ambɔg Pɔl.

¹⁴ Di Kristiɛn dɛn mek dɛn kɛr Pɔl go wantɛm to sɔm pipul we bin tap klos di wata. Timoti ɛn Saylas bin lɛf na Biria.

¹⁵ Di pipul dɛn we go lɛf Pɔl, go wit am sote dɛn rich Atɛns. Wɛn dɛn de tɔn bak, Pɔl tɛl dɛn fɔ go tɛl Timoti ɛn Saylas fɔ kam mit am kwik.

Pɔl de na Atɛns

¹⁶ Wɛn Pɔl bin de wet fɔ Timoti ɛn Saylas, i bin vɛks we i si se di pipul dɛn bin gɛt plɛnti gɔd na di tɔŋ.

¹⁷ So i kin go na di Ju mitin os fɔ go tɔk to dɛn Ju pipul we bin de pre to Gɔd ɛn dɛn pipul we nɔto bin Ju we bin de pre to Gɔd. Ɔltɛm i kin go na di ples we pipul kin gɛda fɔ tɔk to dɛn.

¹⁸ Pɔl kin tɔk to dɛn ticha we dɛn kɔl Ɛpikyurean ɔ Stoik. Sɔm kin se, “Wetin dis man ya we nɔ sabi buk de tray fɔ tɔk?” Sɔm kin se, “I tan lɛkɛ se i de tɔk bɔt dɛn gɔd we ɔda pipul gɛt.” Di pipul dɛn bin de tɔk dat bikɔs Pɔl tɛl dɛn bɔt Jizɔs ɛn i tɛl dɛn se pipul we dɔn day go rayz frɔm dɛn grev.

¹⁹ So di pipul dɛn ol Pɔl kɛr am go na di kot we de mit na Ario pagɔs il. Dɛn tɛl Pɔl se, “Wi want fɔ no bɔt dis nyu tin we yu de lan wi.

²⁰ Sɔm dɛn tin we yu de tɔk, wi nɔ yɛri dɛn wande ɛn wi want fɔ no wetin dɛn min.”

²¹ Bikɔs ɔl dɛn pipul we bɔn na Atɛns ɛn dɛn wan we na trenja kin lɛk fɔ go sidɔm de, dɛn kin lɛk fɔ yɛri bɔt ɛni nyu tin ɛn tɔk bɔt am.

²² Pɔl tinap bifo di kot we kin de mit na Ario pagɔs il. I bigin tɔk to di pipul dɛn se, “Una gɛt big rɛspɛkt fɔ plɛnti gɔd.

²³ We a de waka na una tɔŋ, a bin de luk na ɔl di ples dɛn we una de pre to una gɔd; na de a si wan ples we una rayt pan ston se, ‘Fɔ di gɔd we wi nɔ no’. Di gɔd we una de pre to, we una nɔ no, nain a kam tɛl una bɔt naw.

²⁴ Gɔd we mek di wɔl ɛn ɔltin we lib de, na di Masta fɔ ɛvin ɛn dis wɔl, ɛn i nɔ tap na os we mɔtalman bil fɔ pre to am.

²⁵ Gɔd nɔ nid ɛnitin we mɔtalman de gi am bikɔs nain de gi ɔlman layf ɛn ɔltin we i want.

²⁶ Gɔd bin mek wan fambul fɔs ɛn na pan da wan fambul de, ɔl di pipul dɛn na dis wɔl kɔmɔt. Bifo Gɔd mek dɛn, i bin dɔn mak di tɛm we dɛn fɔ de na wɔl ɛn di ples we dɛn fɔ de.

²⁷ Gɔd du dis fɔ mek mɔtalman go tray fɔ fɛn am lɛkɛ aw blɛnyay pɔsin kin du wɛn i de fɛn sɔntin, ɛn sɔntɛm dɛn go fɛn am. Ɛniwe i de klos wi ɔl;

²⁸ sɔm pipul bin dɔn rayt se, ‘Na Gɔd de gi wi layf, nain de mek wi ebul waka ɛn nain de mek wi ebul du ɔltin!’ Ɛn sɔm pan una pipul dɛn we dɔn rayt buk, se, ‘Wi na Gɔd in pikin dɛn.’

²⁹ We wi na Gɔd in pikin dɛn, lɛ wi mɛmba se mɔtalman nɔ go ebul tek gold, silva, ɔ ston mek Gɔd.

³⁰ Gɔd nɔ de blem pipul fɔ di tɛm we dɛn nɔ bin no wetin i bin want mek dɛn du; bɔt naw Gɔd de tɛl ɔlman na wɔl fɔ mek dɛn lɛf fɔ du di bad tin dɛn we dɛn de du.

³¹ Gɔd dɔn put tɛm we i go jɔj ɔlman ɛn nɔbɔdi nɔ go kɔmplen se Gɔd nɔ jɔj am tret. Gɔd dɔn pik di wan we go jɔj ɔlman. Gɔd dɔn mek wi shɔ bɔt dis tin, we i mek di wan we i pik, rayz frɔm di grev, fɔ mek nɔbɔdi nɔ go dawt.”

³² Wɛn di pipul dɛn yɛri Pɔl de tɔk bɔt pɔsin we rayz frɔm di grev, sɔm laf Pɔl, bɔt sɔm se, “Wi go want fɔ yɛri yu bak wɛn yu de tɔk bɔt dis sem tin.”

³³ So Pɔl kɔmɔt na di kot.

³⁴ Sɔm pipul biliv wetin Pɔl tɔk so dɛn jɔyn wit am. Dɛn na bin Dayonishɔs we na bin mɛmba na di kot we kin mit na Ario pagɔs il, wan uman we nem Dameris, ɛn sɔm ɔda pipul.