Apɔsul Dɛn Wok 15 - Krio Fɔs Oli Baybul

Di Mitin na Jerusɛlɛm

¹ Sɔm pipul kɔmɔt Judia go Antiɔk. Dɛn go tɛl di pipul dɛn na Antiɔk se, Gɔd nɔ go sev dɛn pas dɛn sakɔmsayz bikɔs na dat di Lɔ we Gɔd gi Mozis se.

² Pɔl ɛn Banabas nɔ bin gri wit di tin we dɛn pipul ya bin de lan di pipul dɛn na Antiɔk, so dɛn bigin agyu traŋa wan wit di Judia pipul dɛn bɔt dat. Dɛn gri fɔ mek Pɔl ɛn Banabas ɛn sɔm ɔda Kristiɛn dɛn na Antiɔk go Jerusɛlɛm fɔ tɔk bɔt dat to di apɔsul dɛn ɛn dɛn bigman na di chɔch.

³ Di chɔch mɛmba dɛn sɛn Pɔl ɛn Banabas go. Wɛn Pɔl ɛn Banabas bin de pas na Finishia ɛn Sameria, dɛn tɛl di chɔch pipul dɛn se dɛn pipul we nɔto Ju dɔn biliv Gɔd. Dis nyuz mek ɔl di Kristiɛn dɛn gladi bad.

⁴ Wɛn Pɔl ɛn Banabas rich Jerusɛlɛm, di chɔch pipul dɛn, di apɔsul dɛn ɛn di chɔch bigman dɛn gladi fɔ si dɛn, ɛn Pɔl ɛn Banabas tɛl dɛn ɔl wetin Gɔd ɛp dɛn fɔ du.

⁵ Bɔt sɔm pan dɛn pipul we de na di Faresi grup se, “Dɛn pipul we nɔto Ju fɔ sakɔmsayz ɛn du di tin dɛn we Mozis in Lɔ se dɛn fɔ du.”

⁶ Di apɔsul dɛn ɛn di chɔch bigman dɛn mit fɔ tɔk bɔt dat.

⁷ Wɛn dɛn dɔn tɔk dɔn, nain Pita tinap fɔ tɔk. I se, “Mi pipul dɛn, una no se Gɔd bin dɔn pik mi lɔntɛm fɔ go tɛl dɛn pipul we nɔto Ju dis Gud Nyuz so dat dɛn go yɛri am ɛn biliv pan di Masta.

⁸ Bɔt Gɔd we no mɔtalman at, dɔn gri fɔ gi dɛn in Spirit lɛkɛ aw i bin gi wi in Spirit.

⁹ Gɔd sho se wi ɛn dɛn na di sem ɛn bikɔs dɛn biliv, i pul bad kɔmɔt na dɛn at.

¹⁰ So wetin mek wi want du di tin we go mek Gɔd vɛks? Wetin mek wi de kam put lod pan dɛn pipul we dɔn biliv pan di Masta, da lod we wi grampapa papa dɛn nɔ bin ebul tot, da lod we wisɛf nɔ ebul tot?

¹¹ Lɛkɛ aw wi biliv se Masta Jizɔs sɔri fɔ wi ɛn sev wi, na di semwe dɛnsɛf biliv se Masta Jizɔs sɔri fɔ dɛn ɛn sev dɛn.”

¹² Nɔbɔdi na di mitin nɔ se fiŋ wɛn dɛn yɛri wetin Banabas ɛn Pɔl de tɔk bɔt ɔl di wɔndaful wok dɛn we Gɔd mek dɛn du fɔ dɛn pipul we nɔto bin Ju.

¹³ Wɛn Banabas ɛn Pɔl dɔn tɔk dɔn, nain Jems se, “Mi pipul dɛn, a want mek una lisin mi!

¹⁴ Saymɔn jɛs tɛl una bɔt aw Gɔd dɔn sho se i kia bɔt dɛn pipul we nɔto Ju ɛn i dɔn kɔl dɛn fɔ bi in yon pipul.

¹⁵ Wetin di prɔfɛt dɛn bin tɔk, nain de bi so; dɛn bin se,

¹⁶ ‘Gɔd se, Wɛn dɛn tin ya dɔn bi, a go kam bak ɛn bil Devid in os we bin dɔn fɔdɔm. Pan ɔl we i bin dɔn pwɛl ɔltogɛda, a go bil am bak.

¹⁷ Ɔl dɛn ɔda pipul ɛn dɛn pipul we nɔto Ju we dɔn bi mi yon, go fɛn di Masta.

¹⁸ Na di tin dis we di Masta bin dɔn tɔk, ɛn i dɔn mek wi no dat lɔntɛm.’”

¹⁹ Pantap dat, Jems se, “A tink se wi nɔ fɔ mek tin traŋa fɔ dɛn pipul we nɔto Ju we dɔn gri fɔ tɔn to Gɔd.

²⁰ Bɔt una lɛ wi rayt tɛl dɛn se dɛn nɔ fɔ it ɛnitin we pipul dɔn sakrifays to dɛn gɔd, dɛn nɔ fɔ liv fri layf, dɛn nɔ fɔ it bif we gɛt blɔd pan am, ɛn dɛn nɔ fɔ it blɔd.

²¹ I dɔn te we dɛn de rid di Lɔ we Gɔd gi Mozis, dɛn de go ɔlsay fɔ tɛl pipul wetin Mozis bin tɔk.”

Di Apɔsul dɛn Lɛta

²² Di apɔsul dɛn, di bigman dɛn na di chɔch, ɛn ɔl di chɔch mɛmba dɛn gri fɔ pik sɔm pipul na di chɔch we dɛn fɔ sɛn wit Pɔl ɛn Banabas go na di Antiɔk chɔch. Di chɔch pipul dɛn pik Judas we dɛn bin de kɔl Basa bas, ɛn Saylas. Dɛn tu man ya, na bin pipul we di chɔch mɛmba dɛn rɛspɛkt.

²³ Di chɔch pipul dɛn gi dɛn lɛta fɔ kɛr go; dɛn rayt na di lɛta se, “Wi, di apɔsul dɛn ɛn dɛn chɔch bigman, we na una brɔda dɛn, de sɛn adu to una dɛn pipul we nɔto Ju ɛn we biliv pan Jizɔs, we tap na Antiɔk, Siria, ɛn Silishia.

²⁴ Wi yɛri se sɔm pipul we kɔmɔt to wi na ya de mek tin traŋa fɔ una ɛn dɛn de kɔnfyus una wit di tin we dɛn de tɔk. Nɔto wi sɛn dɛn.

²⁵ So wi gri fɔ sɛn sɔm pipul to una wit Pɔl ɛn Banabas, wi padi dɛn we wi lɛk bad wan.

²⁶ Sɔm pipul bin want kil Pɔl ɛn Banabas bikɔs dɛn de wok fɔ wi Masta Jizɔs Krays.

²⁷ Wi sɛn Judas ɛn Saylas fɔ tɛl una wetin wi dɔn rayt.

²⁸ Gɔd in Spirit nɔ want mek wi put mɔ lod pan una ɛn wisɛf nɔ want du dat, bɔt una fɔ kip dɛn Lɔ ya:

²⁹ una nɔ fɔ it ɛni bif we dɛn dɔn sakrifays to dɛn yon gɔd, una nɔ fɔ it bif we gɛt blɔd pan am, una nɔ fɔ it blɔd, ɛn una nɔ fɔ liv fri layf. I go gud if una nɔ du dɛn tin ya we wi dɔn rayt to una. Una mekes, o!”

³⁰ Di pipul dɛn we dɛn sɛn go Antiɔk, gɛda ɔl di chɔch mɛmba dɛn, dɛn gi dɛn di lɛta.

³¹ Wɛn di pipul dɛn na Antiɔk rid di lɛta, dɛn gladi fɔ di mɛsej we kɔrej dɛn.

³² Judas ɛn Saylas dɛnsɛf na bin prɔfɛt; dɛn tek plɛnti tɛm fɔ tɔk to di pipul dɛn ɛn dɛn kɔrej dɛn fɔ biliv mɔ.

³³ Dɛn bin te lili bit na Antiɔk. Di chɔch mɛmba dɛn na Antiɔk blɛs dɛn bifo dɛn lɛf dɛn mek dɛn go bak to di pipul dɛn we sɛn dɛn. [

³⁴ Bɔt Saylas bin mekɔp fɔ tap na Antiɔk.]

³⁵ Pɔl, Banabas, ɛn plɛnti ɔda pipul bin te lili bit na Antiɔk de lan di pipul dɛn ɛn tɛl dɛn wetin di Masta se.

Pɔl Go In yon We, Banabas Go In yon We

³⁶ I nɔ bin tu te, nain Pɔl tɛl Banabas se, “Lɛ wi go fɛn dɛn pipul we wi bin dɔn tɛl di Masta in mɛsej, lɛ wi go luk aw dɛn de du.”

³⁷ Banabas bin want mek dɛn kɛr Jɔn Mak go,

³⁸ bɔt Pɔl bin tink se i nɔ go gud fɔ mek dɛn go wit Jɔn Mak bikɔs i nɔ bin de wit dɛn sote dɛn dɔn di fɔs patrol. I bin tɔn bak, i lɛf dɛn na Pamfilya.

³⁹ Pɔl ɛn Banabas bin gɛt cham-mɔt so ɔlman go in yon we. Banabas go wit Jɔn Mak, dɛn tek big bot go Sayprɔs.

⁴⁰ Pɔl tek Saylas. Bifo dɛn go, di chɔch mɛmba dɛn na Antiɔk lɛf Pɔl ɛn Saylas na di Masta in an.

⁴¹ Pɔl go ɔlsay we chɔch de na Siria ɛn Silishia fɔ kɔrej di chɔch mɛmba dɛn.