Apɔsul Dɛn Wok 14 - Krio Fɔs Oli Baybul

Pɔl de na Aykonyɔm

¹ Di sem tin bi na Aykonyɔm. Wɛn Pɔl ɛn Banabas bin de na Aykonyɔm, dɛn go na di Ju mitin os; bay aw dɛn tɔk to di pipul dɛn plɛnti Ju pipul ɛn plɛnti pipul we nɔto bin Ju we kɔmɔt Gris, biliv pan Jizɔs.

² Bɔt dɛn Ju pipul we nɔ bin gri fɔ biliv pan Jizɔs put wɔd na dɛn pipul we nɔto bin Ju dɛn yes ɛn dɛn du di Kristiɛn dɛn bad.

³ Di apɔsul dɛn bin de lɔŋ na Aykonyɔm. Di apɔsul dɛn nɔ bin de fred fɔ tɛl di pipul dɛn bɔt di Masta ɛn di Masta sho se na tru tin di apɔsul dɛn bin de tɔk wɛn dɛn se i gud, ɛn i gi dɛn pawa fɔ du plɛnti wɔndaful wok.

⁴ Di pipul dɛn na di tɔŋ bin sheb; sɔm pipul bin de fɔ di Ju pipul dɛn ɛn sɔm bin de fɔ di apɔsul dɛn.

⁵ So dɛn pipul we nɔto bin Ju, dɛn Ju pipul, ɛn dɛn yon bigman dɛn mek bagin fɔ du di apɔsul dɛn bad ɛn fɔ ston dɛn.

⁶ Wɛn di apɔsul dɛn yɛri dat, dɛn rɔnawe go ayd na wan kɔntri we nem Laykao nia. Di tɔŋ dɛn we dɛn go na Listra, Dabi, ɛn dɛn tɔŋ we de klos de.

⁷ Dɛn bin de tɛl pipul di Gud Nyuz wɛn dɛn de na dɛn tɔŋ ya.

Wɛn di Apɔsul dɛn de na Listra ɛn Dabi

⁸ Wan man bin de na Listra we nɔ bin ebul waka. In fut dɛn bin day frɔm we in mama bɔn am.

⁹ I bin sidɔm de lisin we Pɔl de tɔk. Pɔl bin no se di man biliv se Gɔd go mek i wɛl, so i luk di man pim,

¹⁰ ɛn i tɔk lawd wan se, “Tinap tret wan!” Di man grap ɛn bigin waka ɔlɔbɔt.

¹¹ Wɛn di pipul dɛn si wetin bi, dɛn bigin ala na di Laykao nia laŋwej se, “Dɛn gɔd dɔn tɔn to mɔtalman ɛn dɛn dɔn kam to wi!”

¹² Dɛn kɔl Banabas “Zus” ɛn dɛn kɔl Pɔl “Amis” bikɔs na Pɔl bin de tɔk.

¹³ Di man we de mek sakrifays to da gɔd we nem Zus kɛr kaw ɛn flawa go na di get. In ɛn di pipul dɛn bin want mek sakrifays. Di ples we pipul dɛn bin de pre to Zus bin de klos di get na di tɔŋ.

¹⁴ Wɛn Banabas ɛn Pɔl yɛri se di pipul dɛn want mek sakrifays, dɛn chɛr di klos we dɛn bin wɛr pantap. (Na so dɛn Ju pipul kin du fɔ sho se dɛn nɔ gri wit wetin de bi.) Dɛn rɔn go na di ples we di pipul dɛn we bin de pre to Zus bin gɛda. Dɛn ala tɛl di pipul dɛn se,

¹⁵ “Wi pipul dɛn, wetin mek una de du dɛn tin ya? Wi na mɔtalman lɛkɛ unasɛf! Wi kam na ya fɔ tɛl una di Gud Nyuz fɔ mek una lɛf fɔ du dɛn tin ya we go mek una day, ɛn kam to Gɔd we gɛt layf sote go. Na Gɔd mek dis wɔl, di klawd, di wata, ɛn ɔltin we de na di wɔl.

¹⁶ Fɔs tɛm Gɔd bin de lɛf pipul to dɛnsɛf.

¹⁷ Bɔt stil i bin de sho ɔlman udat i bi bay di gud we i kin du fɔ dɛn ɔl. Gɔd kin gi una ren. Di ren kin fɔdɔm frɔm di klawd, ɛn mek wetin una plant bia wɛn di tɛm rich, so dat una go gladi.”

¹⁸ Pan ɔl we di apɔsul dɛn tɛl di pipul dɛn, dɛn wɔd ya, i bin traŋa fɔ mek dɛn tap dɛn, mek dɛn nɔ mek di sakrifays.

¹⁹ Sɔm pan di Ju pipul dɛn bin kɔmɔt Antiɔk ɛn sɔm bin kɔmɔt Aykonyɔm. Dɛn tɔk sote di pipul dɛn gri fɔ du wetin dɛn want. Dɛn ston Pɔl ɛn drɛg am kɔmɔt na di tɔŋ bikɔs dɛn bin min se i dɔn day.

²⁰ Bɔt wɛn dɛn pipul we bin biliv pan Jizɔs go mit am, i grap, dɛn i go bak na di tɔŋ. Di ɔda de Pɔl ɛn Banabas go Dabi.

Dɛn Tɔn Bak Go Antiɔk we de na Siria

²¹ Pɔl ɛn Banabas tɛl di pipul dɛn na Dabi di Gud Nyuz ɛn dɛn mek plɛnti pipul biliv pan Jizɔs. Dɛn kɔmɔt Dabi go Listra, dɛn go Aykonyɔm, dɔn dɛn go Antiɔk we de na Pisidia.

²² Pɔl ɛn Banabas kɔrej di pipul dɛn we bin biliv pan Jizɔs ɛn dɛn tɛl dɛn mek dɛn biliv pan Jizɔs mɔ ɛn mɔ. Pɔl ɛn Banabas tɛl di pipul dɛn se, “Ɔlman we biliv pan Jizɔs gɛt fɔ sɔfa plɛnti na dis wɔl fɔ mek dɛn go de ɔnda Gɔd in rul.”

²³ Wɛn dɛn dɔn fas ɛn pre to Gɔd, dɛn pik sɔm bigman dɛn na ɔl dɛn chɔch fɔ du di wok, dɛn lɛf dɛn na di Masta, we dɛn biliv, in an.

²⁴ Wɛn dɛn dɔn waka ɔlsay na Pisidia, dɛn go Pamfilya.

²⁵ Dɛn tɛl di pipul dɛn na Paga di Gud Nyuz, dɔn dɛn go Ata lia.

²⁶ Dɛn kɔmɔt Ata lia, dɛn tek big bot go Antiɔk, na da tɔŋ de, di pipul dɛn put Pɔl ɛn Banabas na Gɔd an mek i ɛp dɛn fɔ du di wok we i gi dɛn fɔ du, we dɛn bin de du.

²⁷ Wɛn dɛn rich Antiɔk, dɛn gɛda ɔl di pipul dɛn we bin biliv pan Jizɔs ɛn tɛl dɛn ɔl wetin Gɔd mek dɛn du ɛn aw Gɔd mek dɛn pipul we nɔto Ju biliv pan Jizɔs.

²⁸ Pɔl ɛn Banabas bin de lɔŋ wit dɛn pipul we bin biliv pan Jizɔs.