Apɔsul Dɛn Wok 12 - Krio Fɔs Oli Baybul

Pipul Mek di Kristiɛn dɛn Sɔfa Mɔ ɛn Mɔ

¹ Wɛn ɔl dɛn tin ya bin de bi, nain Kiŋ Ɛrɔd Agripa bigin mek dɛn Kristiɛn dɛn sɔfa bad bad.

² I mek dɛn tek sɔd kil Jems we na bin Jɔn in brɔda.

³ Wɛn di kiŋ si se di Ju pipul dɛn gladi fɔ wetin i du, i du ɔda bad tin; i mek soja man dɛn ol Pita. Ɔl dis bi di tɛm we dɛn bin gɛt wan Ju ɔlide we dɛn kin it bred we nɔ gɛt yist.

⁴ Wɛn dɛn ol Pita, dɛn put am na sɛl. Dɛn mek sikstin soja man dɛn de gyad am; di soja man dɛn bin de fo-fo we dɛn de gyad am. Ɛrɔd Agripa bin mekɔp fɔ lɛ dɛn jɔj Pita wɛn di Ju ɔlide we nem Pasova dɔn.

⁵ Wɛn Pita bin de na sɛl, di Kristiɛn dɛn bin de pre fɔ am traŋa wan.

Enjɛl Pul Pita Kɔmɔt na Sɛl

⁶ Di nɛt bifo di mɔnin we Ɛrɔd bin mekɔp fɔ mek dɛn jɔj Pita, Pita bin de slip midul tu soja man dɛn. Dɛn bin tay am wit tu chen ɛn ɔda soja man dɛn bin tinap na di get de gyad di ples.

⁷ Wantɛm, di Masta in enjɛl bɔs kam insay di sɛl ɛn brayt brayt layt shayn ɔlsay na di sɛl. Di enjɛl shek Pita in sholda fɔ wek am. I se, “Pita, mekes grap!” Di chen dɛn pan Pita in an kɔt kɔmɔt.

⁸ Di enjɛl tɛl Pita se, “Wɛr yu klos, tay yu bɛlt, ɛn wɛr yu sus. Kam lɛ wi go.” Pita du ɔl wetin di enjɛl tɛl am fɔ du.

⁹ Pita fala di enjɛl kɔmɔt insay di sɛl. I nɔ bin no se na tru tin di enjɛl de tɛl am, i bin min se in de drim.

¹⁰ Pita ɛn di enjɛl pas di gyad dɛn na di fɔs get, dɛn pas di sɛkɛn gyad dɛn na di ɔda get. Wɛn Pita ɛn di enjɛl rich na di big ayɛn get, di get opin fɔ insɛf. Pita ɛn di enjɛl kɔmɔt na do. Dɛn ɔl tu bin de waka go dɔŋ di trit; wantɛm, di enjɛl lɔs lɛf Pita in wangren.

¹¹ Pita kechɔp se i nɔ bin de drim ɛn ɔl wetin bi na tru tin. I se, “A no naw se na tru tin dis we bi! Na di Masta sɛn in enjɛl fɔ kam pul mi kɔmɔt na Ɛrɔd in an ɛn fɔ mek di Ju pipul dɛn nɔ ebul du ɔl dɛn bad tin we dɛn bin want du mi.”

¹² Wɛn Pita no wetin bi, i go na Meri in os. Dis Meri ya na bin Jɔn Mak in mama. Pita mit plɛnti pipul de pre na di os.

¹³ I nak na di do; wan uman we nem Roda we bin de wok de, kam fɔ opin di do.

¹⁴ Wɛn i yɛri Pita in vɔys, i so gladi, i rɔn go bak, i fɔgɛt fɔ opin di do. I go tɛl di ɔda pipul dɛn se na Pita de nak.

¹⁵ Di pipul dɛn se, “Roda, yu dɔn kres!” Bɔt i pin se na tru. Di pipul dɛn se, “Na Pita in enjɛl.”

¹⁶ Pita bin stil de nak; wɛn dɛn opin di do, dɛn wɔnda fɔ si Pita.

¹⁷ Pita mek sayn wit in an to dɛn fɔ mek dɛn sɛt mɔt, dɔn i tɛl dɛn aw di Masta pul am kɔmɔt na sɛl. Bifo Pita go, i tɛl di Kristiɛn dɛn fɔ tɛl Jems ɛn di ɔda Kristiɛn dɛn we nɔ bin de, wetin bi.

¹⁸ Wɛn do klin, di gyad dɛn bigin de wɔri bad, dɛn bigin de aks dɛn kɔmpin se, “Wetin apin to Pita?”

¹⁹ Kiŋ Ɛrɔd Agripa tɛl dɛn fɔ go fɛn Pita, bɔt dɛn nɔ si am, so i kwɛshɔn di soja man dɛn we bin de gyad Pita, dɔn i mek dɛn kil dɛn. Wɛn dat dɔn, Kiŋ Ɛrɔd kɔmɔt Judia go tap na Sizaria.

Ɛrɔd Day

²⁰ Ɛrɔd bin vɛks bad pan dɛn pipul na Taya ɛn Saydɔn, so di pipul dɛn na dɛn tu tɔŋ de gɛda wan ples fɔ go tɔk to am. Di fɔs tin we dɛn du, dɛn mek wanwɔd wit di bigman we de luk ɔl di kiŋ in prɔpati. Dis man ya bin nem Blastɔs. Dɛn go to Ɛrɔd go beg am mek dɛn ɔl gɛt wanwɔd, bikɔs di it we dɛn bin de it bin de kɔmɔt na di kɔntri we Ɛrɔd bin de rul.

²¹ Ɛrɔd pik wande we i drɛs wit di klos dɛn we kiŋ de wɛr. I go sidɔm na di chia we i kin sidɔm pan fɔ rul, dɔn i bigin tɔk to di pipul dɛn we bin gɛda.

²² Di pipul dɛn ala se, “I nɔ de tɔk lɛkɛ mɔtalman, i de tɔk lɛkɛ wan gɔd!”

²³ Di Masta in enjɛl kam put sik pan Ɛrɔd bikɔs i nɔ rɛspɛkt Gɔd; wɔrɔm it in bɔdi ɛn i day.

²⁴ Di Kristiɛn dɛn go ɔlɔbɔt de tɔk Gɔd in wɔd ɛn dat mek mɔ ɛn mɔ pipul biliv pan Gɔd.

²⁵ Banabas ɛn Sɔl kɛr di kɔpɔ go gi di chɔch bigman dɛn na Jerusɛlɛm. Wɛn dɛn de tɔn bak, dɛn kɛr Jɔn Mak go Antiɔk.