Apɔsul Dɛn Wok 11 - Krio Fɔs Oli Baybul

Pita Tɔn Bak Go Jerusɛlɛm

¹ Di apɔsul dɛn ɛn ɔl di pipul dɛn we bin biliv pan Jizɔs na Judia yɛri se dɛn pipul we nɔto Ju biliv Gɔd in wɔd.

² Dɛn Ju pipul we bin biliv pan Jizɔs tɔk pan Pita bikɔs i go Jerusɛlɛm.

³ Dɛn se, “Pita go to dɛn pipul we nɔ sakɔmsayz ɛn it wit dɛn.”

⁴ So Pita tɛl dɛn ɔl wetin bi frɔm fɔs to las. I se,

⁵ “A bin de pre na wan tɔŋ we nem Jɔpa, nain Gɔd sho mi sɔntin. A si sɔntin we tan lɛkɛ big bedshit de kam dɔŋ. Di bedshit bin tay na di fo kɔna dɛn wit rop. I kɔmɔt ɔp na ɛvin kam dɔŋ klos mi.

⁶ Wɛn a luk gud insay di bedshit, a si ɔl kayn tin dɛn fofut tin, dɛn tin lɛkɛ snek ɛn kondo, ɛn ɔl kayn bɔd dɛn.

⁷ A yɛri vɔys de tɛl mi se, ‘Pita, grap; kil ɛnitin ɛn it am!’

⁸ Bɔt a ansa se, ‘Masta, nɔ, sa; wande a nɔ it ɛnitin we dɔti ɔ we nɔ fayn fɔ it.’

⁹ Di vɔys tɔk bak se, ‘Ɛni tin we Gɔd dɔn se klin, yu nɔ fɔ se i dɔti.’

¹⁰ Di vɔys tɔk dis sem tin tri tɛm, nain ɔltin lɔs go bak na ɛvin.

¹¹ Di sem tɛm we dis tin bi, tri man dɛn we kɔmɔt Sizaria, kam na di os we wi bin de.

¹² Gɔd in Spirit tɛl mi mek a nɔ fred fɔ fala dɛn go. Siks pipul na Jɔpa we bin biliv pan Jizɔs fala mi go Sizaria na Kɔnilyɔs in os.

¹³ Kɔnilyɔs tɛl mi se Gɔd sɛn wan enjɛl to am we tɛl am se, ‘Sɛn, kɔl wan man we nem Saymɔn Pita. I de na Jɔpa.

¹⁴ I go kam tɛl yu aw yu ɛn ɔl yu fambul dɛn go sev.’

¹⁵ As a bigin fɔ tɔk so, Gɔd mek in Spirit kam pan dɛn pipul ya lɛkɛ aw i bin kam pan wi fɔstɛm.

¹⁶ Dat mek a mɛmba wetin di Masta bin se, ‘Jɔn baptayz una wit wata bɔt Gɔd go baptayz una wit in Spirit.’

¹⁷ Na tru se Gɔd dɔn gi dɛn pipul we nɔto Ju di sem Spirit we i gi wi wɛn wi biliv pan Masta Jizɔs Krays. Udat na mi fɔ tɛl Gɔd se a nɔ go du wetin i tɛl mi fɔ du?”

¹⁸ Wɛn dɛn yɛri wetin Pita tɔk, dɛn lɛf fɔ grɔmbul. Dɛn bigin prez Gɔd, dɛn se, “Gɔd dɔn gi dɛn pipul we nɔto Ju chans fɔ mek dɛn lɛf fɔ du dɛn bad tin we dɛn bin de du, so dat dɛn kin gɛt layf we go de sote go.”

Di Pipul dɛn we Biliv Jizɔs na Antiɔk

¹⁹ Wɛn dɛn bigman na Jerusɛlɛm kil Stivin ɛn mek dɛn pipul we bin biliv pan Jizɔs Krays sɔfa, di pipul dɛn skata ɔlɔbɔt. Sɔm go Finishia, sɔm go Sayprɔs, sɔm go Antiɔk. Bɔt na to dɛn Ju pipul dɛn nɔmɔ dɛn bin de tɔk bɔt Jizɔs.

²⁰ Sɔm pan di pipul dɛn we bin biliv pan Jizɔs bin de na Sayprɔs, sɔm bin de na Sayrini. Dɛn kɔmɔt Sayprɔs ɛn Sayrini go tap na Antiɔk ɛn dɛn tɛl dɛn Grik pipul dɛn bɔt di Masta, Jizɔs.

²¹ Gɔd in pawa bin de pan dɛn, dat mek plɛnti pipul biliv pan Jizɔs ɛn tek Jizɔs fɔ dɛn Masta.

²² Wɛn di nyuz bɔt wetin bin de bi na Antiɔk rich Jerusɛlɛm, di pipul dɛn we bin biliv Jizɔs sɛn Banabas go luk wetin de bi.

²³ Wɛn Banabas rich Antiɔk ɛn si aw Gɔd de blɛs di pipul dɛn, insɛf gladi. I tɛl dɛn mek dɛn fala di Masta wit ɔl dɛn at.

²⁴ Banabas na bin gud man; Gɔd in Spirit bin de insay am ɛn i bin biliv Gɔd. Dat mek plɛnti pipul biliv pan di Masta.

²⁵ Banabas go Tasɔs fɔ go luk fɔ Sɔl.

²⁶ Wɛn i si Sɔl, i briŋ am kam na Antiɔk. Banabas ɛn Sɔl te na Antiɔk. Dɛn bin de mit wit di chɔch pipul dɛn fɔ lan dɛn, di pipul dɛn kin plɛnti. Antiɔk na di fɔs ples we dɛn bigin kɔl dɛn pipul we biliv pan Jizɔs, Kristiɛn.

²⁷ Da sem tɛm de, sɔm prɔfɛt dɛn bin kɔmɔt Jerusɛlɛm go Antiɔk.

²⁸ Wan pan dɛn prɔfɛt ya bin nem Agabɔs. Gɔd in Spirit bin tɛl am fɔ tɔk bɔt di bad aŋri we bin gɛt fɔ kam na wɔl. Dis bad aŋri bin kam da tɛm we Klɔdiɔs bin de rul na Rom.

²⁹ Jizɔs in lanin bɔy dɛn gri fɔ ɛp dɛn Kristiɛn na Judia.

³⁰ Dɛn gi Banabas ɛn Sɔl kɔpɔ fɔ kɛr go fɔ dɛn pipul na Jerusɛlɛm.