2 Samiɛl 9 - Krio Fɔs Oli Baybul

Devid Du Gud To Jonɛthan In Bɔy Pikin

¹ Wande, Devid jɛs grap aks if ɛnibɔdi lɛf pan Sɔl in famili we i kin du gud to fɔseka Jonɛthan.

² I kam bi se wan bɔy bin de na Sɔl in famili os we nem Ziba. Dɛn tɛl am se Devid wan si am. We i go, Devid aks am if in na Ziba. I ansa se yɛs, in na Ziba.

³ Di kiŋ naw aks am if nɔbɔdi nɔ de na Sɔl in famili we i go du gud to, lɛk aw i dɔn tɛl PAPA GƆD. Ziba tɛl am se, Jonɛthan gɛt wan bɔypikin na dɛn os we in tu fut ambɔg.

⁴ Di kiŋ aks usay i de. Ziba ansa se i tap to Maka we na Amiɛl in bɔypikin na Lodɛba

⁵ So Devid sɛn go tek am na Maka we na Amiɛl in os na Lodɛba

⁶ Wɛn Mɛfiboshɛth we na Jonɛthan in bɔypikin, dat na Sɔl in grampikin kam to Devid, Mɛfiboshɛth baw fɔ sho se in de fɔ Devid.

⁷ Devid tɛl am fɔ fil fri ɛn nɔ fred. I tɛl Mɛfiboshɛth se bikɔs ɔf in papa we na Jonɛthan, in go du gud to Mɛfiboshɛth. I tɛl Mɛfiboshɛth bak se ɔl di land we Sɔl we nain grampa bin gɛt go bi in yon ɛn in go de it na tebul wit am ɔltɛm.

⁸ Mɛfiboshɛth nɔ biliv in yes. I baw bak to di kiŋ ɛn aks am wetin mek i fɔ bisin bɔt am so we in no se i nɔ min natin lɛk day dɔg.

⁹ Dɛn di kiŋ kɔl Ziba we na bin Sɔl in bɔy fɔ tɛl am se i dɔn gi in masta in grampikin bak ɔl wetin na bin Sɔl ɛn in famili dɛn yon.

¹⁰ I tɛl Ziba se in, in bɔypikin, dɛn ɛn dɛn wokman dɛn fɔ mek fam na di land ɛn briŋ di tin dɛn we dɛn avɛst kam to Mɛfiboshɛth so dat Mɛfiboshɛth go gɛt tin fɔ it. I se as fɔ Mɛfiboshɛth we nain masta in grampikin in go de it na tebul wit am ɔltɛm. I bi se Ziba bin gɛt fiftin bɔypikin ɛn twɛnti wokman.

¹¹ Ziba ansa di kiŋ se i go du ɛnitin we di kiŋ ɔda am fɔ du. So frɔm da tɛm de Mɛfiboshɛth bin de it wit di Devid nain tebul lɛkɛ se in na wan pan di kiŋ in bɔypikin.

¹² Mɛfiboshɛth bin gɛt wan smɔl bɔypikin we nem Mayka. Ziba in wanol os bin de wok fɔ Mɛfiboshɛth.

¹³ Na so Mɛfiboshɛth tek tap na Jerusɛlɛm bikɔs i bin de it wit Kiŋ Devid na tebul ɔltɛm ɛn i tu fut bin ambɔg.