2 Samiɛl 8 - Krio Fɔs Oli Baybul

Devid Win Bɔku Fɛt

¹ As di tɛm de go, Devid atak di Filistin dɛn igen ɛn win dɛn dɔn i tek Mɛthɛg Ama kɔmɔt na di Filistin dɛn an.

² Devid win di Moabayt dɛnsɛf. I mek di Moabayt dɛn lidɔm bay layn dɔn i kil tu pam tri na di layn te i dɔn. Leta ɔn, ɔl di Moabayt dɛn we Devid nɔ kil tɔn bɔy fɔ am ɛn de gi am ɛnitin we i aks fɔ.

³ Dɔn igen, we Adadeza bin wan sho se i gɛt pawa na di Riva Yufretis, Devid go fɛt wit am de ɛn win am. Adadeza na Riɔb in bɔypikin ɛn na kiŋ fɔ di Sirian Stet na Zoba.

⁴ Devid kapchɔ wan tawzin sɛvin ɔndrɛd man we de rayd ɔs ɛn karej ɛn twɛnti tawzin ɔdinari sojaman. I disloket ɔl in ɔs dɛn bɔt lɛf wan ɔndrɛd fɔ am.

⁵ Wɛn di Sirian dɛn na Damaskɔs kam fɔ ɛp Adadeza we na kiŋ na Zoba, Devid kil dɛn twɛnti-tu tawzin.

⁶ I mek barik dɛn usay di Sirian dɛn de na Damaskɔs dɔn dɛnsɛf tɔn lɛk bɔy to am ɛn de gi am ɛnitin we i aks fɔ. PAPA GƆD mek Devid de win ɛnisay we i go.

⁷ Devid siz Adadeza in ɔfisa dɛn big shild dɛn we dɛn mek wit gold ɛn kɛr dɛn go Jerusɛlɛm.

⁸ I tek bɔku bras kɔmɔt na Teba ɛn Berothay we na tu pan di siti dɛn we Adadeza gɛt.

⁹ Wɛn Tow we na kiŋ na Ɛmath yɛri bɔt di win we Devid win Adadeza in wanol ami,

¹⁰ i sɛn in bɔypikin we na Joram fɔ go tɛl Kiŋ Devid adu ɛn kɔŋratyulet am fɔ we i bit Adadeza bikɔs dɛn tu bin dɔn de fɛt. Joram go gi prɛzɛnt wit tin dɛn we dɛn mek wit gold, silva ɛn bras.

¹¹ Kiŋ Devid dɛdiket di tin dɛn to PAPA GƆD so dat i kin yuz dɛn fɔ PAPA GƆD in biznɛs. Na so i bin du wit ɔl di gold ɛn silva tin dɛn we i kin siz wɛn i bit ɛni neshɔn lɛkɛ,

¹² Idɔm ɛn Moab, di Amonayt ɛn Filistin dɛn ɛn Amalɛk. I ivin dɛdiket ɔl di tin dɛn we i siz na Adadeza we na Riɔb in bɔypikin in an we na di kiŋ na Zoba.

¹³ Devid kam femɔs mɔ bikɔs afta dat nain i kil etin tawzin Idɔmayt na di Sɔl Vali.

¹⁴ I put barik dɛn bak na Idɔm ɛn ɔl di Idɔmayt dɛn tɔn in bɔy. PAPA GƆD mek Devid bit ɛnisay we i go.

¹⁵ Devid rul ɔl Izrɛl ɛn i bin de du wetin fia ɛn rayt fɔ ɔlman de.

¹⁶ Joab we na Zɛruaya in bɔypikin na bin kɔmanda fɔ in ami dɔn na Jɛoshafat we na Ailud in bɔypikin na bin di kiŋ in spoksman;

¹⁷ Zedɔk we na Aitɔb in bɔypikin ɛn Aimelɛk we na Abiata in bɔypikin na bin de man dɛn we de mek sakrifays fɔ pipul sin; Seraya na bin di sɛktri;

¹⁸ Bɛnaya we na Jɛoyada in bɔypikin bin de inchaj ɔf di Kɛrɛthayt ɛn Pɛlɛtayt dɛn; ɛn Devid in bɔypikin dɛn na bin man dɛn we de mek sakrifays fɔ pipul sin.