2 Samiɛl 6 - Krio Fɔs Oli Baybul

Dɛn Kɛr Di Ak Go Jerusɛlɛm

¹ Devid pik tati tawzin man na Izrɛl ɛn kɔl dɛn ɔl na wan ples.

² In ɛn di man dɛn go Baala we de na Juda fɔ go to PAPA GƆD in ak we gɛt PAPA GƆD Ɔlmayti in nem. PAPA GƆD we sidɔm ay ay wan midul di tu chɛryubim we de pantap di ak.

³ Dɛn put PAPA GƆD in ak pantap wan nyu ɔmɔlanke ɛn briŋ am na Abinadab in os we de pantap il. Na Uza ɛn Aio we na Abinadab in tu bɔypikin. Na dɛn tu bin de gyad

⁴ di nyu ɔmɔlanke. Aio in bin de waka bifo am.

⁵ Na so Devid ɛn ɔl di ɔda Izrɛlayt dɛn gladi. Dɛn bin de siŋ ɛn dans wit ɔl dɛn at. Dɛn bin de ple difrɛn Instrumɛnt dɛn lɛk ap, laya, tamborin ɛn simbɔl.

⁶ Wɛn dɛn rich na di os we dɛn kin mil na Nakɔn, di kaw dɛn we bin tot di ɔmɔlanke we dɛn put di ak staga, Uza tɔch PAPA GƆD in ak lɛkɛ se i wan kech am.

⁷ PAPA GƆD vɛks bad bad wan pan Uza fɔ we i mistek tɔch di ak so PAPA GƆD mek i day wantɛm wantɛm de nia di ak.

⁸ Dat mek Devid insɛf vɛks bikɔs PAPA GƆD pɔnish Uza, sote tide, dɛn de kɔl da ples de Pɛrɛz Uza

⁹ Frɔm da de de, Devid bigin fred PAPA GƆD bad bad wan. I aks insɛf if in go ebul fɔ luk afta PAPA GƆD in ak.

¹⁰ So dat mek Devid skyad fɔ mek PAPA GƆD in ak go de usay in de na di siti ɔf Devid. Bifo dat i mek di ak go na Obɛd Idɔm in os. Obɛd Idɔm kɔmɔt na Gath.

¹¹ Obɛd Idɔm kip di ak nain os fɔ tri gud mɔnt ɛn PAPA GƆD blɛs ɔlman nain os.

¹² Wɛn Kiŋ Devid yɛri se na bikɔs PAPA GƆD in ak de na Obɛd Idɔm in os mek PAPA GƆD de blɛs ɔlman nain os, i go dɔŋ to am fɔ go pul di ak kɔmɔt na Obɛd Idɔm in os kam ɔp na di siti ɔf Devid gladi wan.

¹³ Wɛn di man dɛn we tot di ak kin tek siks stɛp go bifo, i kin mek dɛn stɔp ɛn gi wan man kaw ɛn wan smɔl- pikin kaw as sakrifays.

¹⁴ Na so Devid bin de dans wit ɔl in at fɔ PAPA GƆD. I bin wɛr di Ifɔd we i de dans,

¹⁵ we in ɛn ɔl di Izrɛlayt dɛn de kɛr PAPA GƆD in ak go ɔp na Jerusɛlɛm. Noto pikin nɔys dɛn bin de mek as dɛn bin de blo trɔmpɛt.

¹⁶ We dɛn bin de go insay di siti ɔf Devid wit PAPA GƆD in ak, Mikal we na Sɔl in gyal pikin, wach oba winda ɛn wɛn i si aw kiŋ Devid bin de dans ɛn jomp fɔ PAPA GƆD, i sɔktit pan am.

¹⁷ Dɛn kɛr di ak go put nain ples insay di Tɛnt we Devid bin dɔn mek fɔ am. Afta dat Devid bɔn animal as bɔn sakrifays ɛn mek pis ɔfrin to PAPA GƆD.

¹⁸ Afta i dɔn mek di sakrifays dɛn dɔn, i aks PAPA GƆD Ɔlmayti fɔ blɛs di pipul.

¹⁹ Dɔn i gi ɔl di Izrɛlayt dɛn de wan wan lof bred, wan wandet we big lɛk kek ɛn sɔm kɔrant dɛn ɔlman, go na dɛn difrɛn os dɛn.

²⁰ Leta ɔn we Devid go na os fɔ go tɛl di pipul nain os adu, Mikal we na Sɔl in gyal pikin bigin tɔk pan am. I se Devid kɔl insɛf kiŋ fɔ Izrɛl bɔt i biɛv lɛk aw ɛni rifraf go biev bay aw i bin de dans bifo in ɔfisa ɛn savant-gyal dɛn te i nekɛd insɛf bifo dɛn.

²¹ Devid ansa am se i du so fɔ PAPA GƆD. I se ɛn i go du so bikɔs PAPA GƆD si se i bɛtɛ fɔ mek am kiŋ fɔ PAPA GƆD in pipul dat na di Izrɛlayt dɛn pas fɔ mek Sɔl ɔ ɛni in fambul bi kiŋ.

²² Devid se in go biev so ɛnitɛm ɛn nɔ maynd fɔ mek Mikal luk am se i fulish bɔt di savant - gyal dɛn we Mikal de tɔk bɔt go rɛspɛkt am.

²³ So Mikal we na Sɔl in gyal pikin nɔ ɛva bɔn te i day.