2 Samiɛl 5 - Krio Fɔs Oli Baybul

Dɛn Mek Devid Kiŋ Fɔ Izrɛl

¹ Ɔl di fambul dɛn na Izrɛl go mit Devid na Ɛbrɔn ɛn tɛl am se in na dɛn yon flɛsh ɛn blɔd.

² Dɛn se ivin we Sɔl na bin dɛn kiŋ, na Devid bin de lid dɛn sojaman dɛn fɔ go fɛt ɛn PAPA GƆD tɛl am se nain go gɛt fɔ lid di Izrɛlayt dɛn ɛn bi dɛn kiŋ.

³ So as dɛn ɔl de de na Ɛbrɔn, Kiŋ Devid mek dɛn swɛ se dɛn want am fɔ bi dɛn kiŋ ɛn na bifo PAPA GƆD dɛn ɔl gri. Na so Devid tek bi kiŋ fɔ Izrɛl.

⁴ Devid bin ol tati ia we i bi kiŋ ɛn i rul fɔ foti ia.

⁵ We i bin de Ɛbrɔn, i rul Juda fɔ sɛvin ia, siks mɔnt, ɛn kam Jerusɛlɛm we i rul ɔl Izrɛl ɛn Juda fɔ tati-tri ia.

⁶ Di kiŋ ɛn in man dɛn go Jerusɛlɛm fɔ go atak di Jɛbyusayt dɛn we bin tap de. Di Jɛbyusayt dɛn tɛl Devid se i nɔ go ebul ɛnta ɛn dat di blɛn yay man dɛn ɛn dɛn wan we nɔ ebul waka sɛf ebul tap am mek i nɔ ɛnta di siti. Dɛn nɔ bin biliv se Devid go ebul ɛnta.

⁷ Ɛniwe, Devid ɛnta ɛn kapchɔ Zayɔn we dɛn kil kɔl di siti ɔf Devid.

⁸ Da de de Devid se if ɛnibɔdi pan in sojaman dɛn fɔ ebul di Jɛbyusayt, i fɔ klem di say we wata de pas, go mit di wan dɛn we dɛn se blɛn ɛn nɔ de waka we nain ɛnimi dɛn. Na dat mek pipul kin se udat blɛn ɛn udat nɔ de waka nɔ go go na di kiŋ in os.

⁹ Na so Devid kam tek tap na dɛn bes ɛn kɔl am di siti ɔf Devid. I mek di eria rawnd am fayn ɛn trɔŋ te rich usay i tap.

¹⁰ Na so i bin jɛs de tɔf pan ɔltin bikɔs PAPA GƆD Ɔlmayti bin de wit am.

¹¹ Dɛn Iram we na di kiŋ na Taya, sɛn pipul to Devid wit big big ɛn trɔŋ trɔŋ sida wud dɛn, kapinta dɛn ɛn mesna dɛn we go bil os fɔ Devid fɔ de as kiŋ.

¹² Dat mek Devid biliv se fɔ tru tru PAPA GƆD dɔn mek i sidɔm as kiŋ fɔ Izrɛl ɛn dɔn mek i de rul fayn fɔseka PAPA GƆD yon pipul we na di Izrɛlayt dɛn.

¹³ We Devid kɔmɔt na Ɛbrɔn, i mared mɔ wɛf, gɛt mɔ smɔl wɛf dɛn ɛn bɔn mɔ bɔy ɛn gyal pikin dɛn na Jerusɛlɛm.

¹⁴ Na di pikin dɛn we dɛn bɔn fɔ am dɛn nem dɛn dis: Shamua, Shobab, Nethan, Sɔlɔmɔn,

¹⁵ Iba, Ɛlishua, Nɛfɛg,

¹⁶ Ilaysham, Iliada, ɛn Ɛlifɛlɛt

Di Izrɛlayt Dɛn Bit Di Filistin Dɛn

¹⁷ Wɛn di Filistin dɛn yɛri se dɛn dɔn mek Devid kiŋ fɔ di Izrɛlayt dɛn, dɛn ɔl tot rod fulbo fɔ go ɔp go fɛn Devid fɔ kapchɔ am. Bɔt i yɛri bɔt dat so insɛf go nain bes.

¹⁸ Da tɛm de di Filistin dɛn bin dɔn skata ɔlɔbɔt na di Refaim Vali;

¹⁹ So Devid aks PAPA GƆD if i fɔ go atak di Filistin dɛn. I fɛnɔt if PAPA GƆD go mek lɛ i win dɛn. PAPA GƆD ansa am se lɛ i go. PAPA GƆD se in mɔs mek Devid win di Filistin dɛn.

²⁰ So Devid go na Beal Pɛrazim ɛn na de i win di Filistin dɛn. I se PAPA GƆD dɔn mek mi ɛnimi dɛn fɔdɔm na mi fut lɛk aw wata de bɔs kɔmɔt na ples. So dɛn kɔl da ples de Beal Pɛrazim.

²¹ Di Filistin dɛn rɔnawe lɛf dɛn smɔl smɔl gɔd dɛn de so Devid ɛn in man dɛn tot ɔl go.

²² Dat nɔ du fɔ dɛn, di Filistin dɛn kam bak na di Refaim Vali ɛn skata ɔlɔbɔt de,

²³ so Devid fɛnɔt bak frɔm PAPA GƆD if i fɔ atak dɛn bɔt dis tɛm PAPA GƆD ansa am se dis tɛm ya i nɔ fɔ go mit dɛn fes to fes. PAPA GƆD se i fɔ go rawnd dɛn ɛn atak dɛn nia di balsam tik dɛn usay dɛn de.

²⁴ PAPA GƆD se as sun as i yɛri di briz de blo pantap di tik dɛn, lɛ i atak wantɛm bikɔs dat min se PAPA GƆD dɔn go bifo go fɛt di Filistin dɛn fɔ am.

²⁵ So Devid insɛf du wetin PAPA GƆD tɛl am fɔ du ɛn i atak di Filistin dɛn gud ɛn prɔpa frɔm Gibiɔn te rich Gɛza.