2 Samiɛl 4 - Krio Fɔs Oli Baybul

Dɛn Kil Ishboshɛth

¹ Wɛn Ishboshɛth we na Sɔl in bɔypikin yɛri se Abna dɔn day na Ɛbrɔn, i pwɛl at ɛn di Izrɛlayt dɛn shɔk.

² Ishboshɛth bin gɛt tu man wit am we bin de lid gɛŋ dɛn fɔ go red. Wan pan dɛn bin nem Baana ɛn di ɔda wan nem Rekab. Dɛn ɔltu na Rimɔn in bɔypikin dɛn ɛn dɛn kɔmɔt na Biarɔt. Ɔlman de luk se Biarɔt na pat na Bɛnjamin,

³ bikɔs di pipul na Biarɔt bin rɔnawe go Gitaim usay dɛn dɔn de as fɔrina te da tɛm de.

⁴ Sɔl in ɔda bɔypikin we na Jonɛthan bin gɛt in yon bɔypikin we nɔ ebul fɔ waka fayn. I bin ol fayv we nyuz rich dɛn bɔt Sɔl ɛn Jonɛthan dɛn day wan. In nani jɛs kapu am ɛn rɔn, bɔt di mekes we di nani de mekes mek i fɔdɔm ɛn frɔm da tɛm de i nɔ ebul waka. I nem Mɛfiboshɛth.

⁵ Wande, Rekab ɛn Baana we na Rimɔn di Birathayt in bɔypikin dɛn lɛf fɔ go na Ishboshɛth in os. Dɛn rich de we san de ɔp ɛn da tɛm de i bin de slip in aftanun slip.

⁶ Di sikyɔriti we bin de na di domɔt bin de shifta wit bifo slip kech am, so dɛn go insay di os saful.

⁷ Wɛn dɛn go insay di os, Ishboshɛth bin lidɔm nain bed. Dɛn chuk am nain bɛlɛ. Afta dɛn dɔn chuk am, dɛn kɔt in ed kɛr am go. Dɛn travul wit di ed ol nɛt te rich di Jɔdan Vali.

⁸ Dɛn kɛr di ed go mit Devid na Ɛbrɔn ɛn tɛl di kiŋ se dɛn dɔn briŋ Ishboshɛth we na Sɔl in bɔypikin in ed. Dɛn tɛl am se Sɔl we na bin in ɛnimi bin de tray fɔ kil am bɔt PAPA GƆD dɔn fɛt Sɔl ɛn in jɛnareshɔn dɛn fɔ Devid.

⁹ Bɔt Devid tɛl Rekab ɛn in brɔda Baana se wans PAPA GƆD we dɔn pul in ed pan ɔlkayn waala nɔ de day i nɔ go lɛf dɛn so.

¹⁰ I se wɛn wan man go mit am na Ziklag ɛn fil se i go gladi fɔ yɛri se Sɔl day, na de i mek dɛn kil am. I se dat na bin di pe we i pe am fɔ di nyuz we i kɛr.

¹¹ I se if i du da man de so wetindu i nɔ fɔ kil dɛn fɔ dɛn wikɛdnɛs we dɛn go mit da po man nain bed insay in os ɛn kil am fɔ natin.

¹² So Devid insɛf ɔda in man dɛn fɔ kil Rekab ɛn Baana. Dɛn kɔt dɛn an ɛn fut dɛn ɛn ɛŋ dɛn na di ples we wata de kɔmɔt na Ɛbrɔn. Bɔt dɛn bɛr Ishboshɛth in ed na Abnain grev na Ɛbrɔn.