2 Samiɛl 3 - Krio Fɔs Oli Baybul

¹ Di plaba bitwin Sɔl in fambul dɛn ɛn Devid in fambul tek lɔŋ. Devid in bin de tɔf mɔ ɛn mɔ bɔt Sɔl in yon fambul dɛn bin jɛs de go dɔŋ.

Devid In Bɔy Pikin Dɛn

² Na di bɔypikin dɛn dis we dɛn bɔn fɔ Devid na Ɛbrɔn: di fɔs wan nem Amɔn ɛn na Ainoam we kɔmɔt Jɛzril bɔn am,

³ Kileab na di sɛkɛn wan ɛn na Abigɛl we in man Nebal bin dɔn day ɛn i kɔmɔt kamɛl, bɔn am; Maaka we na di kiŋ na Gɛshɔ in gyal pikin bɔn di tɔd wan we na Absalɔm;

⁴ Agit bɔn Adonayja nɔmba fɔ; Abital bɔn Shefataya nɔmba fayv ɛn

⁵ Ɛgla we nain ɔda wɛf bɔn Ithriam nɔmba siks. Na di bɔypikin dɛn wan ya we dɛn bɔn fɔ Devid na Ɛbrɔn.

Abna Go Jɔyn Devid

⁶ Di tɛm we di plaba bitwin Sɔl ɛn Devid dɛn fambul dɛn de go ɔn, Abna bin bizi de mek shɔ se nain de kɔntrol Sɔl in fambul dɛn.

⁷ Sɔl bin gɛt wan smɔl wɛf we nem Rizpa ɛn na bin Eya in gyal pikin. Wande Ishboshɛth aks Abna wetindu i fɔ kip in papa in smɔl wɛf.

⁸ Abnain at wam. I aks Ishboshɛth if i tink se in na dɔg. I se wit ɔl wetin i dɔn du fɔ Ishboshɛth in papa Sɔl in fambul dɛn ɛn in padi dɛn, if na di pe dat i fɔ gɛt, fɔ mek i fil se in kip uman ivin we i de du ɔlkayn tin fɔ mek Devid nɔ ebul dɛn.

⁹ I se mek PAPA GƆD lɛ i alaki if in nɔ go go ɛp Devid fɔ bi wetin PAPA GƆD bin dɔn swɛ se i go bi.

¹⁰ I se in go ɛp Devid fɔ bi kiŋ ɛn Devid go bi kiŋ fɔ Izrɛl ɛn Juda frɔm Dan na di Nɔth te Biashiba na di Sawt.

¹¹ Ishboshɛth nɔ bɔda fɔ se ɛnitin bikɔs i bin de fred Abna.

¹² Abna naw kam sɛn pipul to Devid fɔ go tɛl am se if i gri fɔ mek wanwɔd wit am, i go ɛp am fɔ bi kiŋ fɔ Izrɛl. I se afta ɔl na Devid fɔ kɔntrol ɔl di land dɛn na Izrɛl.

¹³ Devid se, dat fayn, bɔt se in de aks fɔ wan tin nɔmɔ: Abna nɔ fɔ mek dɛn tu yay mek fo if i nɔ de go mit am wit Mikal dat na Sɔl in gyal pikin Devid bin dɔn mared.

¹⁴ Dɔn Devid sɛn go aks Ishboshɛth we na Sɔl in bɔypikin fɔ gi am in wɛf Mikal as i kil wan ɔndrɛd Filistin, sakɔmsayz dɛn ɛn kɛr dɛn kanda dɛn go to Sɔl, we sho se i kil dɛn, bifo i mared am.

¹⁵ So Ishboshɛth gi ɔda fɔ mek man dɛn go pul am kɔmɔt nain man Paltiɛl we na Laish in bɔypikin in os.

¹⁶ In man de biɛn am de kray te dɛn rich Baurim. Abna tɛl am fɔ tɔn bak ɛn i tɔn bak.

¹⁷ Da tɛm de, Abna bin dɔn gɛt tɔk wit di big wan dɛn na Izrɛl. I tɛl dɛn se i dɔn te we dɛn bin dɔn want Devid fɔ bi dɛn kiŋ so na da tɛm de

¹⁸ dɛn fɔ mek am kiŋ. I se PAPA GƆD bin dɔn prɔmis Devid se nain i go yuz fɔ pul Izrɛl na di Filistin dɛn ɛn ɔl dɛn ɔda ɛnimi dɛn an.

¹⁹ Abna go tɔk to di Bɛnjaminayt dɛn fes to fes. We i dɔn, i go mit Devid na Ɛbrɔn ɛn tɛl am ɔl wetin Izrɛl ɛn Bɛnjamin fambul mekɔp fɔ du.

²⁰ Abna bin go wit twɛnti man ɛn wɛn dɛn rich to Devid na Ɛbrɔn, i mek pati fɔ Abna ɛn in man dɛn.

²¹ Wɛn Abna dɔn it dɔn, i aks Devid fɔ lɛf am lɛ i go wantɛm go gɛda ɔlman na Izrɛl fɔ kam sho Devid se dɛn gri fɔ mek i bi dɛn kiŋ. I se dɛn go mek bagin wit Devid ɛn Devid go ebul du wetin i fil fɔ du. So Devid gri fɔ lɛ i go ɛn i go saful wan.

Joab Kil Abna Insɛf

²² I nɔ tu te afta dat, nain Devid in man dɛn ɛn Joab tɔn bak afta wan atak. Dɛn bin briŋ bɔku tin dɛn we dɛn siz. Bɔt da tɛm de Abna nɔ bin de na Ɛbrɔn igen bikɔs Devid bin dɔn mek i go bak saful.

²³ Wɛn Joab ɛn ɔl di sojaman dɛn we de wit am rich Ɛbrɔn, i yɛri se, Abna we na Nain bɔypikin bin de de bɔt di kiŋ dɔn mek i go saful wan.

²⁴ So Joab go mit di kiŋ ɛn aks am wetin i du so. I tɛl di kiŋ se i yɛri se Abna bin kam to am bɔt i dɔn lɛf am fɔ go bak saful ɛn naw na go i dɔn go so.

²⁵ I tɛl di kiŋ se i fɔ no aw Abna tan. I se Abna kam mek di kiŋ ful so dat i go wach ɔl wetin i de du ɛn aw i de du dɛn.

²⁶ Wɛn Joab dɔn tɔk to Devid dɔn i lɛf am ɛn sɛn pipul fɔ go briŋ Abna kam bak bɔt Devid nɔ no natin. Dɛn mit am na di watasay na Sera.

²⁷ Wɛn Abna rich na Ɛbrɔn, Joab kɛr am go na kɔna bay di domɔt lɛkɛ se i wan tɔk sikrit to am. We dɛn de de, Joab chuk am nain bɛlɛ fɔ we i bin kil in brɔda Asaɛl. Na de i fɔdɔm day.

²⁸ Leta ɔn we Devid yɛri wetin bi, i se PAPA GƆD nɔ go ɛva blem in ɛn in pipul fɔ di day we Abna day so.

²⁹ I swɛ Joab. I se mek Joab ɛn in fambul dɛn pe fɔ di kil we i kil Abna; ɛn mek sɔmbɔdi de nain os we go gɛt sik nain bɔdi ɛn mek sɔmbɔdi de de we go de yuz krɔch, ɔ we dɛn go kil na wɔfrɔnt ɔ we nɔ go de gɛt tin fɔ it.

³⁰ Na so Joab ɛn in brɔda Abishay tek kil Abna bak fɔ we i bin kil dɛn ɔda brɔda Asaɛl, di tɛm we dɛn bin de fɛt na Gibiɔn.

Aw Dɛn Bɛr Abna

³¹ Devid tɛl Joab ɛn ɔl di sojaman dɛn wit am fɔ chɛr chɛr dɛn klos ɛn wɛr saklɔth waka bifo di dedebɔdi we dɛn de go bɛr am fɔ sho se dɛn sɔri. Kiŋ Devid insɛf bin de biɛn di bɛrin.

³² Dɛn bɛr Abna na Ɛbrɔn ɛn di kiŋ kray bita wan na Abnain grev. Na so ɔlman we de de de kray.

³³ Di kiŋ siŋ dis bɛrin siŋ fɔ Abna: “Na so yu fɔ day lɛkɛ se yu na fulman?

³⁴ Nɔbɔdi nɔ tay yu an, Nɔbɔdi nɔ chen yu fut dɛn Yu day lɛk na tif man atak yu.” We i dɔn, ɔlman bigin kray bak frɛsh wan.

³⁵ Ɔlman kam fɔ koks Devid fɔ put sɔntin nain bɛlɛ bɔt Devid swɛ se in nɔ go it natin te ivintɛm. I se if i it ɛnitin, lɛ PAPA GƆD mek i alaki.

³⁶ Di sojaman dɛn gri wit wetin di kiŋ se ɛn gladi we i du so. Dɛn kin gladi ɔltɛm wit wetin di kiŋ de du.

³⁷ Dat mek dɛn ɔl biliv se di kiŋ nɔ gɛt an pan di kil we dɛn kil Abna.

³⁸ Dɔn di kiŋ aks di wan dɛn we i de wok wit if dɛn nɔ no se na big bigman dɛn dɔn lɔs na Izrɛl so.

³⁹ Devid se pan ɔl we nain na kiŋ, in nɔ ebul Zɛruaya in bɔypikin dɛn biznɛs. I se dɛn tu yaŋe yaŋe fɔ am bɔt pre se mek PAPA GƆD pe dɛn fɔ wetin dɛn de du.