2 Samiɛl 2 - Krio Fɔs Oli Baybul

Dɛn Mek Devid Kiŋ Fɔ Juda

¹ As di tɛm de go, Devid fɛnɔt frɔm PAPA GƆD if i fɔ go na wan pan di siti dɛn we de insay Juda. PAPA GƆD se yes, i fɔ go. Devid aks am uswan. PAPA GƆD ansa am se, i fɔ go na Ɛbrɔn.

² So Devid tek in tu wɛf dat na Ainoam we kɔmɔt Jɛzril ɛn Abigɛl we in man Nebal bin dɔn day ɛn we kɔmɔt kamɛl, ɛn dɛn ɔl go tap na Ɛbrɔn.

³ Devid go wit in man dɛn we bin de wit am ɛn dɛn yon difrɛn difrɛn famili dɛn, ɛn dɛn ɔl sɛtul na Ɛbrɔn ɛn in ɔda smɔl smɔl siti dɛn.

⁴ Dɛn di big wan dɛn na Juda go mit Devid na Ɛbrɔn usay dɛn mek am kiŋ fɔ ɔl udat de na Juda in fambul layn. Wɛn Devid yɛri se na di pipul na Jebɛsh-Giliad dɛn bɛr Sɔl,

⁵ i sɛn pipul to dɛn fɔ go tɛl dɛn tɛnki fɔ wetin dɛn du. I se “PAPA GƆD go blɛs una fɔ we una trit una masta Sɔl wit rɛspɛkt we una bɛr am.

⁶ Mek PAPA GƆD insɛf sho una aw i gud ɔltɛm ɛn nɔ de lɛf una to unasɛf ɛn misɛf go trit una fayn fɔ dis tin we una du.”

⁷ I tɛl dɛn se naw we Sɔl dɛn masta dɔn day, dɛn fɔ olɔp dɛnsɛf bikɔs di Juda fambul dɔn mek am kiŋ fɔ dɛn.

Dɛn Mek Ishboshɛth Kiŋ Fɔ Izrɛl

⁸ Da sem tɛm de, Abna we na Nain bɔypikin ɛn na bin kɔmanda na Sɔl in ami, bin dɔn kɛr Ishboshɛth we na Sɔl in bɔypikin go na Maanaim

⁹ usay dɛn go mek am kiŋ fɔ Giliad, Ashɔri, Asha ɛn Jɛzril. Dɛn mek am kiŋ fɔ Ifrem, Bɛnjamin ɛn di wanol Izrɛl bak.

¹⁰ Ishboshɛth we na Sɔl in bɔypikin bin ol foti ia we dɛn mek am kiŋ fɔ Izrɛl ɛn i rul fɔ tu ia. Bɔt di Juda fambul dɛn bin de traŋa wan wit Devid.

¹¹ Di tɛm we Devid bi kiŋ na Ɛbrɔn fɔ di Juda fambul na sɛvin ia, siks mɔnt

Juda Ɛn Izrɛl Bigin Fɛt

¹² Abna we na Nain bɔypikin ɛn Ishboshɛth we na Sɔl in bɔypikin in man dɛn kɔmɔt Maanaim go Gibiɔn.

¹³ Joab we na Zɛruaya in bɔypikin ɛn Devid in yon man dɛnsɛf go brakɛt dɛn na wan ples we wata de kɔmɔt insay ston na Gibiɔn. Di rayval grup dɛn sidɔm na tu difrɛn ples.

¹⁴ Nain Abna tɛl Joab se lɛ sɔm ɔf dɛn yɔŋ man dɛn kam tray bon bifo dɛm. Joab gri.

¹⁵ So dɛn ɔltu kɔnt twɛlv man kɔmɔt pan Bɛnjamin ɛn Ishboshɛth we na Sɔl in bɔypikin in man dɛn ɛn twɛlv frɔm Devid in yon man dɛn. Dat mek dɛn twɛnti-fo.

¹⁶ Ɔlman bin gɛt wan pɔsin pan di rayval grup fɔ fɛt. Dɛn grip dɛn kɔmpin, ol dɛn ia ɛn chuk dɛn wit dɛn daga na dɛn sayd, we mek dɛn ɔl fɔdɔm togɛda. Na dat mek dɛn kɔl da ples de na Gibiɔn, Fild ɔf Sɔds

¹⁷ Lɛkɛ ple, na so siriɔs fɛt fɔdɔm, ɛn Devid in man dɛn bit Abna ɛn di man dɛn we kɔmɔt Izrɛl da de de.

¹⁸ Zɛruaya in tri bɔypikin na Joab, Abishay ɛn Asaɛl. Asaɛl in yon fut bin fast na grɔn lɛk wetin.

¹⁹ I rɔnata Abna ɛn nɔ gi am wan blo blo te, nain

²⁰ we Abna tɔn biɛn, i aks if nain Asaɛl de biɛn am so. I ansa se nain.

²¹ Dɛn Abna tɛl am se lɛ i lɛf am ɛn rɔnata ɛni ɔda yɔŋman we de nain lɛf an ɔ na raytan ɛn ɔf lod am, bɔt usay! Asaɛl bin stil de biɛn am tigi tigi wan.

²² Abna tɔn bak ɛn wɔn Asaɛl fɔ lɛf fɔ rɔnata am. I tɛl am se i nɔ go lɛk fɔ kil am bikɔs if i du so i nɔ go ebul fɔ luk in brɔda Joab nain yay.

²³ Bɔt Asaɛl stil mek traŋayes ɛn kɔntinyu fɔ rɔnata Abna. So Abnainsɛf nɔ du wan, i nɔ du tu, i jɛs sɛn in spia wit di say we nɔ shap. Dis wan ya naw go insay Asaɛl in bɛlɛ ɛn kɔmɔt nain bak. I fɔdɔm de wantɛm wantɛm ɛn day ɔn di spɔt. So ɛnibɔdi we pas usay i fɔdɔm day kin jɛs tinap de wɔnda.

²⁴ Bɔt Joab ɛn Abishay naw bigin fɔ rɔnata Abna, ɛn as san bin de go dɔŋ we dɛn rich na Ama Il nia Gia lɛkɛ se yu de go na di ɛmti ples we pɔsin nɔ go ebul tap na Gibiɔn,

²⁵ di man dɛn we kɔmɔt na Bɛnjamin fambul jɔyn Abna ɛn so dɛn ɔl fɔm wan grup ɛn tek pozishɔn pantap di il.

²⁶ Abna bigin ala to Joab se wetin dɛn de pan nɔ mek sɛns. I se if dɛn go jɛs de kil dɛnsɛf te go. I tɛl Joab fɔ no se wetin dɛn de pan nɔ go bɔn gud pikin. I se Joab fɔ tɛl in man dɛn fɔ lɛf fɔ rɔnata in yon man dɛn as dɛn ɔl na fambul.

²⁷ Joab ansa se if nɔto we i tɔk wans PAPA GƆD nɔ de day in man dɛn bin fɔ rɔnata dɛn te do klin.

²⁸ So Joab blo in trɔmpɛt fɔ lɛ ɔl in man dɛn lɛf fɔ fɛt. So dɛn lɛf fɔ rɔnata dɛn kɔmpin dɛn na Izrɛl ɛn lɛf fɔ fɛt ɔltogɛda.

²⁹ Abna ɛn in man dɛn waka ol nɛt insay di Jɔdan Vali. Dɛn krɔs Riva Jɔdan ɛn kɔntinyu fɔ waka di ol mɔnin te dɛn rich Maanaim.

³⁰ Joab tɔn bak afta i dɔn lɛf fɔ rɔnata Abna ɛn gɛda ɔl in man dɛn. Apat frɔm Asaɛl, na nayntin pan Devid in man dɛn lɔs.

³¹ Bɔt Devid in yon man dɛn kil tri ɔndrɛd ɛn siksti Bɛnjaminayt we bin de wit Abna.

³² Dɛn kɛr Asaɛl in dedebɔdi go bɛr am nain papa in grev na Bɛtliɛm. Dɔn Joab ɛn in man dɛn travul ol nɛt ɛn rich Ɛbrɔn bay do klin.