2 Samiɛl 16 - Krio Fɔs Oli Baybul

Ziba Bato Devid

¹ Wɛn Devid dɔn kɔmɔt rayt ɔp di mawnten de go smɔl, i mit Ziba we de wok fɔ Mɛfiboshɛth de wet fɔ am. Ziba bin kɛr sɔm dɔŋki dɛn we i lod wit tu ɔndrɛd lof bred, wan ɔndrɛd kek wit kɔrant, wan ɔndrɛd fig kek ɛn wan jɔg wayn go mit Devid.

² Di kiŋ aks Ziba wetin i kɛr dɛn fɔ. Ziba tɛl am se di dɔŋki dɛn na fɔ di kiŋ ɛn ɔlman nain os fɔ rayd pan, di bred ɛn frut na fɔ di man dɛn fɔ it ɛn di wayn na fɔ gi ɛnibɔdi we taya na di rod usay pipul nɔ go ebul tap.

³ We i tɔk dɔn, di kiŋ aks am fɔ in masta, dat na Sɔl in grampikin. Ziba se i lɛf am na Jerusɛlɛm bikɔs i de fil se wetin bi go mek di Izrɛlayt dɛn mek am kiŋ as nain papa bin fɔ bi kiŋ.

⁴ Di kiŋ tɛl Ziba se frɔm da de de, ɔl wetin na bin Mɛfiboshɛth in yon, dɔn bi Ziba in yon. Dat mek Ziba baw ɛn tɛl di kiŋ se in go rɛspɛkt am ɛn pre se di kiŋ go gladi wit am ɔltɛm.

Shimɛay Kɔs Devid

⁵ As Kiŋ Devid de go nia Baurim, wan man we kɔmɔt na di sem siti lɛk Sɔl jɛs kɔmɔt na do. I bin nem Shimɛay ɛn na Gira in bɔypikin. Na so i bin de kɔs Devid we i de kɔmɔt na do.

⁶ I bin ivin de vim Devid ɛn in ɔfisa dɛn wit ston pan ɔl we di man dɛn bin de na Devid in lɛfan ɛn in raytan.

⁷ As Shimɛay de kɔs na so i de ala se lɛ Devid kɔmɔt bifo am we i dɔn kil bɔku pipul ɛn i nɔ gud fɔ natin.

⁸ I se na PAPA GƆD dɔn pe Devid so fɔ ɔl di pipul we i dɔn kil na Sɔl in famili ɛn fɔ we i pul Sɔl na di chia we i bin sidɔm as kiŋ. I se PAPA GƆD dɔn mek Devid in bɔypikin we na Absalɔm bi kiŋ ɛn na dɔn i dɔn fɔ am so bikɔs i dɔn kil bɔku.

⁹ Dɛn Abishay we na Zɛruaya in bɔypikin aks di kiŋ wetin mek i fɔ lɛf pɔsin lɛk Shimɛay we yuslɛs lɛk day dɔg fɔ tɔk wetin i fil fɔ tɔk. I se di kiŋ fɔ lɛf am fɔ dil wit Shimɛay lɛ i kɔt in ed kɔmɔt.

¹⁰ Bɔt di kiŋ tɛl Abishay se in ɛn Zɛruaya in bɔypikin dɛn difrɛn so mek i lɛf am. I se if PAPA GƆD tɛl Shimɛay fɔ kɔs am, udat nain fɔ se Shimɛay nɔ fɔ du dat.

¹¹ Dɛn Devid tɛl Abishay ɛn di ɔda ɔfisa dɛn se if in bɔypikin we nain flɛsh ɛn blɔd de tray fɔ kil am wetin di Bɛnjaminayt nɔ go du. I se lɛ dɛn lɛf am lɛ i kɔs bikɔs na so PAPA GƆD se.

¹² I se sɔntɛm sɛf na dat go mek PAPA GƆD du gud to am fɔseka di kɔs we Shimɛay de kɔs am.

¹³ So Devid ɛn in man dɛn go dɛn we bɔt ɔl da tɛm de Shimɛay de ɔpozit na di rod, jɛs de kɔs gbay ɛn de sɛn ston ɛn dɔti pan Devid as dɛn de waka go.

¹⁴ Di kiŋ ɛn ɔl di pipul wit am rich usay dɛn bin de go taya wan so. Na de naw dɛn blo smɔl.

Wetin Apin We Absalɔm Rich Jerusɛlɛm

¹⁵ Na da sem tɛm de Absalɔm ɛn ɔl in man dɛn rich na Jerusɛlɛm ɛn Aitofɛl bin de wit am.

¹⁶ Ushay we na Akayt ɛn Devid in padi go mit Absalɔm fɔ bato am. I se “Mek di kiŋ nɔ day yet! Mek i gɛt lɔŋ layf!”

¹⁷ Absalɔm aks Ushay if na so padi de sho se i lɛk padi. I tɛl am se i sɔprayz fɔ si se Ushay nɔ fala Devid go.

¹⁸ So Ushay tɛl am se in go de wit di pɔsin we PAPA GƆD ɛn ɔl di pipul se fɔ bi kiŋ.

¹⁹ Ɛn igen, in dɔn rɛdi fo wok fɔ di pikin jɛs lɛk aw i wok fɔ di dadi.

²⁰ Afta dat, Absalɔm tɔn to Aitofɛl ɛn aks am fɔ advays.

²¹ Aitofɛl ansa Absalɔm se i fɔ lidɔm wit ɔl in papa in smɔl wɛf dɛn we i lɛf fɔ de wach di kiŋ os. I se da tɛm de ɔlman go no aw i nɔ want i papa in biznɛs ɛn ɔl udat de wit am go gɛt mɔ pawa fɔ du wetin dɛn wan du.

²² So dɛn bil tɛnt fɔ Absalɔm pantap di os in ruf usay Absalɔm lidɔm wit in papa in smɔl wɛf dɛn na say we ɔl di Izrɛlayt dɛn go no wetin apin.

²³ Dɛn tɛm de, Devid ɛn Absalɔm bin de tek wetin Aitofɛl se lɛk wetin PAPA GƆD se.