2 Samiɛl 12 - Krio Fɔs Oli Baybul

Wetin Nethan Se Ɛn Wetin Devid Du

¹ PAPA GƆD sɛn Nethan to Devid. Wɛn i rich to Devid i pul wan stori bɔt wan jɛntri man ɛn wan poman fɔ am.

² I se di jɛntri man bin gɛt bɔku ship ɛn kaw,

³ bɔt di poman nɔ bin gɛt bɛtɛ tin pas wan smɔl uman ship we i bin bay. Bɔt dis poman mɛn am fayn ɛn mek i gro ɔp wit in yon pikin dɛn. I se di poman bin de sheb di smɔl it we i gɛt wit am ɛn bin de mek dɛn ɔltu de drink na di sem kɔp, i bin ivin de mek i lidɔm nain an fɔ slip. I bin de trit am lɛk se nain gyal pikin.

⁴ Nethan se wande we di jɛntriman gɛt trenja, i nɔ tek pan in yon ship ɔ kaw fɔ kuk fɔ di trenja, i sɛn go tek dis poman in waŋren uman ship ɛn kuk am fɔ di trenja.

⁵ We Devid yɛri di stori, i vɛks pan di jɛntriman. I tɛl Nethan se wans PAPA GƆD de, di jɛntriman fit fɔ day.

⁶ I se di jɛntri man fɔ pe fo tɛm mɔ fɔ di poman i uman ship bikɔs i nɔ sɔri fɔ di poman sɛf.

⁷ As i tɔk dɔn so nain Nethan tɛl am se nain na di sem wan we biev so. I tɛl am se PAPA GƆD, di GƆD we Izrɛl de wɔship se fɔ tɛl am se i mek am kiŋ na Izrɛl ɛn pul am kɔmɔt na Sɔl in an.

⁸ I mek i tɔn bɔs nain masta in os ɛn lɛf ɔl in wɛf dɛn gi am. I gi am wanol Izrɛl ɛn Juda fɔ rul ɛn if ɔl dat nɔ bin du fɔ am sɛf, i bin fɔ gi am mɔ.

⁹ Nethan se PAPA GƆD se fɔ aks Devid wetindu i lɛf fɔ du wetin in tɛl am fɔ du bifo dat i du bad frɔnt PAPA GƆD in fes. I kil Yuraya we na Itayt ɛn tek in wɛf nain an. I mek di Amonayt dɛn kil am fɔ am.

¹⁰ So, bikɔs ɔf wetin i du, pipul go de day wɔwɔ nain os sins i fɔgɛt bɔt PAPA GƆD ɛn tek Yuraya we na Itayt in wɛf fɔ bi in yon.

¹¹ Nethan se PAPA GƆD se fɔ tɛl am se frɔm insay in os na de i go bigin gɛt waala. I se i go de luk korokoro wan we pɔsin we klos to am go tek in wɛf dɛn lidɔm wit dɛn frɔnt in fes san, santɛm.

¹² PAPA GƆD se ɛnti na kɔnain du in yon. In naw go du am gbagbaode usay ɔlman na Izrɛl go de si.

¹³ We Devid yɛri ɔl dis, i se in dɔn sin to PAPA GƆD. Nethan ansa am se PAPA GƆD dɔn fɔgiv am ɛn nɔ go mek i day.

¹⁴ Bɔt bikɔs i du so, i dɔn mek PAPA GƆD in ɛnimi dɛn nɔ de luk am wit bɛtɛ yay ɛn di pikin we Bathshiba go bɔn go day.

¹⁵ We Nethan dɔn tɔk dɔn, i go na os. We Nethan dɔn go nain os, PAPA GƆD mek di pikin we Yuraya in wɛf bɔn sik bad bad wan.

Devid In Bɔy Pikin Day

¹⁶ Devid fast ɛn kray de beg PAPA GƆD mek di pikin wɛl. I bin ivin de lidɔm na grɔn insay in os wɛn i kin de beg PAPA GƆD.

¹⁷ Di big wan dɛn nain os kin go tɔk to am mek i grap na grɔn bɔt i nɔba du am ɛn it sɛf i nɔ bin de it.

¹⁸ Afta sɛvin de, di pikin day. Devid in wokman dɛn bin de fred fɔ tɛl am se di pikin dɔn day. Dɛn tɛl dɛnsɛf se di wan we di pikin nɔ day yet we dɛn de tɔk to Devid i nɔ yɛri, nɔto we di pikin dɔn day i go lisin to dɛn. Dɛn fred se Devid go du sɔntin we dɛn nɔ go lɛk.

¹⁹ Devid fent se in wokman dɛn de tɔk, tɔk kwayɛt wan to dɛnsɛf ɛn gɛs se di pikin dɔn day. So i aks dɛn if di pikin dɔn day. Dɛn ansa am se yɛs, i dɔn day.

²⁰ As dɛn tɔk so, nain Devid grap na grɔn. I was insɛf, put pafyum, chenj in klos ɛn go insay PAPA GƆD in os ɛn go wɔship am. We i dɔn, i go nain yon os ɛn aks dɛn fɔ gi am it fɔ it.

²¹ In wokman dɛn aks am wetindu i de biev so. Dɛn se di tɛm we di pikin de, i bin de fast ɛn kray bɔt da tɛm de we di pikin dɔn day, i grap it.

²² Devid ansa se di tɛm we di pikin nɔ day yet, i bin de fast ɛn kray as i bin de tink to insɛf se sɔntɛm PAPA GƆD go sɔri fɔ am ɛn nɔ mek di pikin nɔ day.

²³ Devid se we di pikin dɔn day wetin i fɔ fast fɔ. I aks in wokman dɛn if i ebul briŋ am bak. I se in go day go mit di pikin bɔt di pikin kant kam bak to am.

Sɔlɔmɔn Bɔn

²⁴ Devid lidɔm wit Bathshiba bak fɔ koks am. I tek in ɛn bɔn bɔbɔ we dɛn gi nem, Sɔlɔmɔn. PAPA GƆD bin lɛk am;

²⁵ ɛn bikɔs PAPA GƆD bin lɛk am, i sɛn wɔd to Nethan se dɛn fɔ gi am nem Jɛdidaya.

Devid Kapchɔ Raba

²⁶ Da sem tɛm de, nain Joab fɛt wit di Amonayt dɛn na Raba ɛn kapchɔ usay di kiŋ bin de.

²⁷ Joab sɛn mɛsenja dɛn fɔ go tɛl Devid se in dɔn fɛt na Raba ɛn dɔn kɔt dɛn wata,

²⁸ so Devid fɔ gɛda di balans trup ɛn dɛn fɔ go sɔrawnd di siti ɛn kapchɔ am. Joab se if Devid nɔ du so, in go kapchɔ di siti ɛn gi am in nem.

²⁹ So Devid gɛda di wanol ami, sɛn dɛn na Raba usay dɛn ebul atak ɛn kapchɔ am.

³⁰ I pul di kiŋ in krawn nain ed ɛn da krawn de bin we bɔt sɔm tati-fo kilo gold ɛn i bin gɛt fayn fayn miniral ston dɛn pan am. I wɛr am nain ed ɛn tek bɔku ɔda tin dɛn kɔmɔt na di siti.

³¹ I pul ɔl di pipul we bin de de ɛn mek dɛn lebra wit so ɛn pikaks ɛn fɔ mek dɛn de le blɔk fɔ am. Na so i du na ɔl di Amonayt siti dɛn dɔn Devid wit di wanol ami tɔn bak na Jerusɛlɛm.