2 Samiɛl 11 - Krio Fɔs Oli Baybul

Devid Tek Pipul Wɛf

¹ Wan tɛm we dɛn kiŋ kin go fɛt, Devid sɛn Joab, in yon man dɛn ɛn di wanol Izrɛlayt ami fɔ go fɛt. Dɛn fɛt wit di Amonayt dɛn, masaka dɛn ɛn tek Raba na dɛn an. Bɔt Devid in lɛf na Jerusɛlɛm.

² Wan ivintɛm, Devid grap na bed ɛn bigin waka pantap in os in ruf. We i de pantap de, i si wan uman de was. Na so di uman fayn.

³ So Devid sɛn fɔ go fɛnɔt udat i bi. So di man we i sɛn tɛl am se i fil se di uman na Bathshiba we na Iliam in gyal pikin ɛn we na Yuraya in wɛf.

⁴ Devid sɛn pipul fɔ go fɔ am ɛn wɛn i kam dɛn tu lidɔm da nɛt de. Bathshiba bin jɛs dɔn di spɛshal was we i fɔ was afta in piriɔd. We in ɛn Devid dɔn, i go bak usay i de slip.

⁵ Leta ɔn di uman fɛnɔt se i gɛt bɛlɛ ɛn i sɛn go tɛl Devid.

⁶ Devid naw kam sɛn tɛl Joab fɔ sɛn Yuraya we na Itayt kam to am. Joab du wetin i se ɛn sɛn Yuraya to Devid.

⁷ Wɛn Yuraya rich, Devid aks bɔt di fɛt ɛn aw ɔlman de du.

⁸ Dɔn i tɛl Yuraya fɔ go nain os ɛn rilaks smɔl. As Yuraya de go, di kiŋ sɛn prɛzɛnt biɛn am.

⁹ Bɔt Yuraya nɔ go nain os. I slip na di kiŋ in os domɔt wit ɔl di kiŋ in wokman dɛn.

¹⁰ Wɛn Devid yɛri se Yuraya nɔ go nain os, i aks am wetindu ɛn se i bin min to se i go wan go nain os afta i dɔn lɛf de fɔ lɔŋ.

¹¹ Yuraya se aw in go go nain os go it ɛn drink ɛn lidɔm wit in wɛf we di ak, in bɔs Joab ɛn di ɔda sojaman dɛn na Izrɛl ɛn Juda de na kamp na kol. I swɛ to Devid se in nɔ go ɛva du dat.

¹² Dɛn Devid tɛl am se lɛ i wet te di nɛks de bifo i tɔn bak. So Yuraya lɛf na Jerusɛlɛm da de de te di nɛks de.

¹³ Devid invayt am fɔ it ɛn drink wit am ɛn mek shɔ se i chak. Bɔt ivintɛm Yuraya go lidɔm nain mata to di kiŋ in wokman dɛn ɛn nɔ gri fɔ go nain os.

¹⁴ Na mɔnin, Devid rayt lɛta we i gi Yuraya fɔ kɛr go gi Joab.

¹⁵ Insay di lɛta i se: “Put Yuraya frɔnt usay di fɛt wam. Lɛf am de mek dɛn kil am.”

¹⁶ So as Joab de wach usay di fɛt wam, i jɛs sɛn Yuraya de.

¹⁷ Ɛn as di man dɛn we bin de fɛt brakɛt Joab in man dɛn fɔ mek shɔ se dɛn nɔ tek di siti, dɛn kil sɔm pan Devid in man dɛn ɛn Yuraya na bin wan pan dɛn.

¹⁸ Joab sɛn go tɛl Devid aw di fɛt bi.

¹⁹ Bɔt i tɛl di man we i sɛn se we i dɔn tɔk, bɔt aw di fɛt bi,

²⁰ di kiŋ go vɛks ɛn aks wetin mek dɛn go nia di siti so fɔ fɛt. Joab se i go mɔs aks if dɛn nɔ bin no se dɛn go shut dɛn oba di wɔl.

²¹ Joab se i go aks if dɛn nɔ bin mɛmba aw da uman na Thibɛz bin sɛn big ston oba wɔl we kil Abimɛlɛk we na Gidiɔn in bɔypikin we mek i day na Thibɛz. Joab se we i dɔn blez dɔn, di mɛsenja fɔ tɛl am naw se Yuraya di Itayt man insɛf day.

²² Di man lɛf fɔ go ɛn wɛn i rich i tɛl Devid ɔl wetin Joab tɛl am fɔ tɔk.

²³ Di mɛsenja tɛl Devid se di Amonayt dɛn bin dɔn de win dɛn so dɛn push dɛn bak te rich di siti get in domɔt.

²⁴ I se dɔn dɛn sɛn aro pan dɛn oba di wɔl we mek sɔm pan di kiŋ in man dɛn day. Di mɛsenja tɛl Devid se Yuraya di Itayt man insɛf day.

²⁵ Devid sɛn di man fɔ tɛl Joab se dat nɔ fɔ mek in at pwɛl bikɔs ɛnibɔdi kin day na wa. Devid se i fɔ tɛl Joab se mek i tray fɔ pwɛl di siti. I tɛl di mɛsenja se fɔ tɔk so mek Joab nɔ giv ɔp.

²⁶ Wɛn Yuraya in wɛf yɛri se in man day, i kray bɔku ɛn munin fɔ am.

²⁷ Wɛn i pul munin, Devid sɛn go tek am kam nain os ɛn i bi in wɛf ɛn bɔn bɔypikin fɔ am. Bɔt dat mek PAPA GƆD vɛks bad fɔ wetin Devid du.