2 Samiɛl 10 - Krio Fɔs Oli BaybulDevid Win Di Amonayt Ɛn Sirian Dɛn ( 1 Kronikuls 19:1-19 ) 1 Afta sɔm tɛm di Amonayt dɛn kiŋ day ɛn nain bɔypikin we na Enɔn kam bi kiŋ. 2 Devid tink se i fayn fɔ lɛ i du gud to Enɔn we na Neash in pikin lɛk aw in papa bin de du gud to am. Dat mek Devid sɛn pipul fɔ go tɛl Enɔn ɔsh fɔ in papa we day. Wɛn di man dɛn we Devid sɛn rich de, 3 di Amonayt bigman dɛn aks Enɔn if i tink se na bikɔs Devid rɛspɛkt in papa mek i sɛn pipul fɔ kam tɛl ɔsh. Dɛn tɛl am se Devid sɛn di man dɛn fɔ kam wach aw di land tan so dat i go ovathro am. 4 So Enɔn insɛf grip Devid in man dɛn, shev af pat pan dɛn biabia, kɔt dɛn klos dɛn midul te rich di wes ɛn lɛf dɛn fɔ go bak. 5 Wɛn Devid yɛri dis, i sɛn ɔda man dɛn fɔ go mit dɛn fɔs wan dɛn bikɔs dɛn trit dɛn lɛk fulman. Di kiŋ se dɛn fɔ tap na Jɛriko te dɛn biabia dɔn gro bak bifo dɛn kam bak na Jerusɛlɛm. 6 Wɛn di Amonayt dɛn si se dɛn dɔn krach Devid in krɔkrɔ, dɛn aya twɛnti tawzin ɔdinari Sirian sojaman kɔmɔt na Bɛth Riɔb ɛn Zoba, di kiŋ na Meaka wit wan tawzin man ɛn twɛlv tawzin man bak frɔm Tab. 7 Wɛn Devid yɛri dat insɛf sɛn Joab ɛn ɔl in man dɛn we kin fɛt fɔ go mit dɛn. 8 Di Amonayt dɛn arenj dɛnsɛf ɛn go mit di Izrɛlayt dɛn fɔ fɛt na di siti in get dɔn di Sirian dɛn we kɔmɔt Bɛth Riɔb ɛn Zoba wit di man dɛn we kɔmɔt Tab ɛn di man dɛn wit Meaka dɛn lɛf to dɛnsɛf na di fil. 9 Joab notis se sɔm pan dɛn bin de bifo dɛn ɛn sɔm de biɛn dɛn; so i pik sɔm pan in bɛst fɛt man dɛn ɛn arenj dɛn fɔ fɛt di Sirian dɛn. 10 I mek Abishay in brɔda de inchaj ɔf di ɔda wan dɛn ɛn arenj dɛn fɔ fɛt di Amonayt dɛn. 11 Joab tɛl Abishay se if i tan lɛk di Sirian dɛn wan win dɛn, Abishay fɔ go ɛp am fɛt bɔt if in si se di Amonayt dɛn wan win Abishay, in go go ɛp am. 12 Dɛn kɔrej dɛnsɛf nɔ fɔ giv ɔp bɔt lɛ dɛn fɛt lɛk man fɔ dɛn pipul ɛn fɔ PAPA GƆD. I pre se mek PAPA GƆD du wetin i want fɔ du. 13 So Joab ɛn di man dɛn we de wit am go fɛt di Sirian dɛn ɛn dɛn mek di Sirian dɛn rɔnawe. 14 Wɛn di Amonayt dɛn si se di Sirian dɛn de rɔnawe, dɛnsɛf chuk spid lɛf Abishay dɛn ɛn go bak insay di siti. So Joab ɛn in man dɛn tɔn bak go na Jerusɛlɛm. 15 Pan ɔl we di Sirian dɛn si se di Izrɛlayt dɛn dɔn win dɛn, i nɔ du fɔ dɛn, dɛn go gɛda bak. 16 Dis tɛm ya, Adadeza sɛn fɔ mɔ Sirian dɛn we de biɛn Riva Yufretis; dɛn gɛda na Elam ɛn na Shobak we na di kɔmanda na Adadeza in ami bin de lid dɛn. 17 Wɛn Devid yɛri dat, insɛf gɛda ɔl in fɛt man dɛn na Izrɛl, krɔs Riva Jɔdan ɛn go mit dɛn na Elam. Di Sirian dɛn arenj dɛnsɛf fɔ go fɛt wit Devid. 18 Bɔt aw dɛn gɛda na so dɛn skata. Devid ɛn in man dɛn kil sɛvin ɔndrɛd man wit dɛn ɔs ɛn karej ɛn foti tawzin pan di man dɛn we kin rayd ɔs. I kil Shobak we na dɛn ami kɔmanda ɛn na de i day. 19 Wɛn ɔl di kiŋ dɛn we bin tek Adadeza fɔ bi dɛn bra si aw Izrɛl win dɛn, dɛn go mek pis wantɛm wit di Izrɛlayt dɛn ɛn bigin du wetin dɛn want. Frɔm da tɛm de di Sirian dɛn nɔ ɛp di Amonayt dɛn igen |
Krio Bible © The Bible Society of Sierra Leone, 2013.
Bible Society in Sierra Leone