2 Samiɛl 1 - Krio Fɔs Oli Baybul

Devid Yɛri Se Sɔl Day

¹ Devid go bak na Ziklag afta we i bin dɔn bit di Amalɛkayt dɛn. I kam bi se Sɔl bin dɔn day. I de Ziklag fɔ tu mɔ de.

² Di de we mek tri nain wan man we kɔmɔt na Sɔl in kamp, kam de wit chɛr chɛr klos ɛn dɔti nain ed fɔ sho se i de munin. We i rich usay Devid de, i dɔbalɛ fɔ sho se i rɛspɛkt am.

³ Devid aks am usay i kɔmɔt, I tɛl Devid se i rɔnawe na di Izrɛlayt dɛn kamp.

⁴ So Devid aks am fɔ tɛl am wetin apin. I se man dɛn rɔnawe na di wɔfrɔnt ɛn bɔku day. Sɔl ɛn in bɔypikin Jonɛthan dɛnsɛf day.

⁵ Dɛn Devid aks di yɔŋ man we tɔk, aw i no se Sɔl ɛn in bɔypikin Jonɛthan day.

⁶ Di yɔŋ man tɛl am se we in bin de pantap Mawnt Gilboa, di tɛm we di ɛnimi dɛn bin dɔn de kech Sɔl, in si we Sɔl wan ib insɛf pantap in sɔd,

⁷ we Sɔl tɔn rawnd ɛn si am i kɔl am ɛn in aks Sɔl wetin i want am fɔ du.

⁸ I se Sɔl aks am udat i bi ɛn wɛn i tɛl am se in na Amalɛkayt,

⁹ Sɔl beg am fɔ go mit am ɛn ɛp am fɔ day bikɔs i de sɔfa. I se Sɔl se i nɔ lɛf fɔ blo yet bɔt i tan lɛk i dɔn day wit di kayn sɔfa we i de sɔfa.

¹⁰ I tɛl Devid se so insɛf go tinap oba Sɔl ɛn kil am bikɔs in no se i nɔ go ebul fɔ grap usay i de. I se afta in dɔn kil Sɔl, i pul in krawn nain ed ɛn di tin we i bin wɛr nain an kam mit Devid.

¹¹ Dɛn Devid ɛn ɔl di man dɛn we de wit am chɛr dɛn klos fɔ sho se dɛn sɔri fɔ yɛri da kayn nyuz de.

¹² Da da de nɔto kɔmɔn kray dɛn kray ɛn nɔ ebul it bikɔs dɛn sɔri fɔ Sɔl, in bɔypikin Jonɛthan, PAPA GƆD in ami ɛn ɔl udat we na Izrɛlayt we day na di wa. Na te ivintɛm dɛn ebul it.

¹³ Devid aks di yɔŋ man usay i kɔmɔt. Di yɔŋ man ansa se in na Amalɛkayt we tap insay Izrɛl.

¹⁴ Dat mek Devid aks am if i nɔ fred fɔ dɔnawe wit pɔsin we na PAPA GƆD insɛf pik.

¹⁵ So Devid kɔl wan pan in man dɛn ɛn tɛl am fɔ kil di yɔŋ man we briŋ di nyuz. Na de dɛn wap am we i day.

¹⁶ Bifo i day. Devid tɛl am se nain tek in an bay in day as nainsɛf tɔk se i kil pɔsin we PAPA GƆD pik fɔ bi kiŋ.

Devid Siŋ Bɛrin Siŋ Fɔ Sɔl Ɛn Jonɛthan

¹⁷ We Devid de kray fɔ Sɔl ɛn in bɔypikin we na Jonɛthan, i siŋ wan bɛrin siŋ.

¹⁸ Leta ɔn i gi ɔda se ɔlman na Juda fɔ lan dis siŋ ɛn so dɛn put am na wan buk. Di siŋ se,

¹⁹ “E Izrɛl, di tin we yu de blɔf wit, lidɔm day wan naw! Hmm! We tɔf sojaman day na wɔfrɔnt na sɔri tin!

²⁰ “Nɔ fɔ tɔk am na Gath ɛn nɔ skata am na Ashkɛlɔn, ɔ nɔ so dɛn Filistin uman dɛn go gladi ɛn dɛn ɔn-to-um dɛn de go jomp wit gladi.

²¹ “A wish nɔn ren nɔ go fɔdɔm pantap Mawnt Gilboa ɛn dyu nɔ go kam de so dat natin nɔ go gro de igen Na de man dɛn lɛk Sɔl ɛn Jonɛthan nɔ ebul yuz dɛn big shild igen; na de Sɔl in big shild gɛt blɔd instɛd ɔf ɔyl pan am.

²² Bifo naw Jonɛthan kin de kil bɔku pipul wit in bo dɛn Sɔl kin de yuz in sɔd fɔ kil pipul we mek wɛn i de tɔn bak, i kin satisfay.

²³ “Sɔl ɛn Jonɛthan na pipul we ɔlman bin lɛk ɛn day nɔ ebul pat dɛn. Dɛn ɔltu bin fast lɛk laytin ɛn trɔŋ lɛk babu bon.

²⁴ Uman dɛn na Izrɛl, una kray fɔ Sɔl. Una mɛmba aw i kin mek una chen chen chɛ wit ɔl di aŋins an shekins, ɛn wit fayn klos we gɛt gold pan am.

²⁵ “Hmm! We tɔf sojaman day na wɔfrɔnt na sɔri tin! Na Jonɛthan lidɔm day wan so.

²⁶ E, Jonɛthan, mi brɔda, a sɔri fɔ yu; yu bin so klos to mi; di lɛk we yu bin lɛk mi bin wɔndaful, i pas aw uman de lɛk i man ɔ in pikin.

²⁷ “Hmm! We tɔf sojaman day na wɔfrɔnt na sɔri tin. Dɛn ɛn di tin dɛn we dɛn de tek fɛt ɔl dɔn lɛf de.