2 Kronikuls 9 - Krio Fɔs Oli Baybul

Di Kwin Na Shiba Go Fɛn Sɔlɔmɔn

¹ We di kwin na Shiba yɛri bɔt aw Sɔlɔmɔn femɔs, i kam na Jerusɛlɛm fɔ kam tɛst am wit at at kwɛshɔn dɛm. I kam wit big big kɔnvɔy ɛn kamɛl dɛm we tot spays, bɔku gold ɛn valyuebul ston dɛm. Wɛn i rich to Sɔlɔmɔn, i tɛl am ɔl tin we de nain maynd.

² Sɔlɔmɔn ansa ɔl in kwɛshɔn dɛm; natin nɔ de we ayd pan Sɔlɔmɔn we i nɔ ebul ɛksplen to am.

³ We di kwin na Shiba si Sɔlɔmɔn in sɛns, di os we i bil,

⁴ di kayn it nain tebul, di we we in ɔfisa dɛn de sidɔm; ɛn aw di wokman dɛn de wok ɛn dɛn unifɔm, di wan dɛn we de sav di kiŋ wayn ɛn dɛn unifɔm, ɛn di we we di kiŋ de mek bɔn sakrifays, ɔl mek in mɔt ful.

⁵ Nain i tɛl di kiŋ se, ɔl wetin in bin de yɛri bɔt am nain kɔntri,, bɔt wetin i dɔn du ɛn wetin i dɔn gɛt, na tru.

⁶ I se in nɔ bin biliv pas we in dɔn si fɔ insɛf wit in yon yay. I se ɔl wetin in yɛri nɔ du sɛf bikɔs wetin in dɔn si so pas ɔl wetin i dɔn yɛri.

⁷ I se in no se in wɛf dɛn ɛn ɔfisa dɛn ɛn wokman dɛn ɔl go de gladi fɔ sidɔm wit am fɔ de yɛri wetin de kɔmɔt nain mɔt nɔmɔ.

⁸ I prez PAPA GƆD se, “Lɛ we blɛs PAPA GƆD, we na yu PAPA GƆD we sho yu se i lɛk yu ɛn dɔn mek yu kiŋ fɔ Izrɛl. Bikɔs PAPA GƆD in lɔv nɔ de dɔn fɔ Izrɛl, na dat mek i mek yu bi kiŋ fɔ lɛ jɔstis, fia ple ɛn tret biznɛs go de.”

⁹ Nain i gi Sɔlɔmɔn fo tawzin kilo gold, bɔku bɔku spays ɛn miniral ston dɛn. Wande nɔbɔdi nɔ kɛr bɔku spays lɛkɛ di wan we di kwin na Shiba gi Kiŋ Sɔlɔmɔn.

¹⁰ Pantap dat, Iram in ship dɛn pul bɔku gold kɔmɔt na Ofir; dɛn briŋ almɔg bod ɛn miniral ston dɛn.

¹¹ Sɔlɔmɔn yuz di ɔlmɔg bod fɔ mek stɛp na PAPA GƆD in os ɛn in yon os we i bil fɔ insɛf; ɛn yuz am bak fɔ mek ap ɛn laya fɔ di myuzishian dɛn. Dɛn nɔ pul da kayn fayn almɔg bod de te tide.

¹² Kiŋ Sɔlɔmɔn gi di kwin we kɔmɔt Shiba ɔl wetin i aks fɔ. Dat nɔ miks pan di ɔda tiŋs dɛn we in as kiŋ fɔ gi am. Di kwin ɛn ɔl in pipul dɛn we fala am tɔn bak go na dɛn kɔntri.

Kiŋ Sɔlɔmɔn In Jɛntri

¹³ Ɛvri ia Kiŋ Sɔlɔmɔn kin gɛt lɛkɛ twɛnti-tri tawzin kilo gold.

¹⁴ Dat nɔ miks pan di taks we dɛn biznɛsman dɛn de pe, ɛn di ɔda taks we dɛn kiŋ dɛn na Arebia ɛn dɛn gɔvna na dɛn ɔda distrikt dɛn de pe.

¹⁵ Kiŋ Sɔlɔmɔn mek tu ɔndrɛd big big shild ɛn kɔba ich wan wit sɛvin kilo gold.

¹⁶ I mek tri ɔndrɛd ɔda smɔl shild dɛn ɛn kɔba ich wan wit bɔt sɔm tu kilo gold. I put ɔl na Libanɔn Fɔrɛst Os.

¹⁷ Di kiŋ mek in tron wit ayvri ɛn kɔba sɔm pat wit gold.

¹⁸ Di chia gɛt siks stɛp, dɔn i mek pantap di bak rɛst, rawnd. Di tu sayd dɛn gɛt say fɔ rɛst an, dɔn i kav tu layɔn ɛn put dɛn fɔ tinap na di tu sayd.

¹⁹ Na twɛlv layɔn bin de de; di stɛp dɛn ɔl gɛt tu tu layɔn; wan na lɛft an wan na raytan. Dɛn nɔ mek dis kayn chia ya wande fɔ ɛni ɔda kiŋ.

²⁰ Ɔl di kiŋ in kɔp dɛn we i de drink pan na gold, ɛn ɔl di plet ɛn kɔp dɛn na Libanɔn Fɔrɛst Os na piɔ gold. Nɔn silva nɔ bin de de bikɔs i nɔ bin gɛt wan valyu Sɔlɔmɔn in tɛm.

²¹ Di kiŋ gɛt ship dɛm we de go si wit Iram insɛf yon ship dɛm. Dɛn kin kam ɛvri tri ia wit gold, silva, ayvri, ep ɛn babu dɛm.

²² Na so Kiŋ Sɔlɔmɔn bin pas ɔl di kiŋ dɛn na di wɔl pan sɛns ɛn jɛntri.

²³ Ɔlman na wɔl bin de kam fɔ tɔk wit am fɔ yɛri nɔmɔ di kayn sɛns we PAPA GƆD gi am.

²⁴ Ɛvri ia wɛn pipul dɛn go fɛn am dɛn kin kɛr prɛzɛnt dɛn lɛk gold, silva, klos, spays, ɔs ɛn myul.

²⁵ Ɛn Sɔlɔmɔn gɛt fo tawzin shɛd fɔ in ɔs ɛn chariɔt dɛm, ɛn twɛlv tawzin man dɛn we de rayd ɔs, we i steshɔn na di chariɔt siti dɛm ɛn wit di kiŋ na Jerusɛlɛm.

²⁶ Ɛn i rul oba di kiŋ dɛm we de frɔm Yufretis rich di Filistin dɛn kɔntri ɛn di bɔda na Ijipt.

²⁷ Di kiŋ mek silva plɛnti bɔku na Jerusɛlɛn lɛk ston ɛn sida tik bɔku lɛk di Sikamɔ tik dɛn na di rɔndɔŋ dɛn na Juda.

²⁸ Dɛn bin de impɔt os dɛm fɔ Sɔlɔmɔn kɔmɔt na Musri ɛn ɔl ɔda kɔntri dɛm.

Sɔlɔmɔn in Gɔvamɛnt

²⁹ Naw di balans pan Sɔlɔmɔn in wok frɔm fɔs to las, nɔ de na di buk we Netan di prɔfɛt rayt, ɛn di wetin Aija we na Shilonayt bin se go bi, ɛn di tin dɛn we Ido we na prɔfɛt bin si nain vishɔn bɔt Jɛroboam we na Nebat in bɔypikin?

³⁰ Sɔlɔmɔn bi kiŋ na Jerusɛlɛm fɔ di wanol Izrɛl fɔ fɔti ia.

³¹ Sɔlɔmɔn day ɛn dɛn bɛr am nain papa Devid, in siti. Na Rɛoboam we nain bɔypikin bin bi kiŋ nain ples.