2 Kronikuls 8 - Krio Fɔs Oli Baybul

Di Big Tin Dɛn We Sɔlɔmɔn Du

¹ Wɛn di ia we mek twɛnti dɔn, insay di tɛm we Sɔlɔmɔn bin de bil PAPA GƆD in os ɛn insɛf yon os,

² Sɔlɔmɔn bil di siti dɛm bak we Kiŋ Iram bin dɔn gi am ɛn put di Izrɛlayt dɛn de.

³ Afta dat, Sɔlɔmɔn go kapchɔ Amat ɛn Zoba.

⁴ I bil Pamira na di ɛmti ples we pɔsin nɔ go ebul tap ɛn ɔl di siti dɛm fɔ kip tin dɛn we i bil na Amat.

⁵ I bil ɔpa Bɛt Ɔrɔn ɛn loa Bɛt Ɔrɔn, siti dɛn we i protɛkt wit wɔl, get ɛn ayɛn ba,

⁶ ɛn Bealat ɛn ɔl di siti dɛn fɔ kip tin dɛn we Sɔlɔmɔn bin gɛt, ɛn ɔl di siti dɛm fɔ in chariɔt dɛm, ɛn di siti dɛm fɔ in man dɛn we de rayd ɔs, ɛn ɛnitin we Sɔlɔmɔn bin wan bil na Jerusɛlɛm, na Libanɔn ɛn ɔl di land dɛm we de nain pawa.

⁷ Ɔl di wan dɛm we lɛf pan di Itayt dɛm, di Amorayt dɛm, di Pɛrizayt dɛm, di Ivayt dɛm ɛn di Jebyuzayt dɛm we nɔ blant Izrɛl,

⁸ pan dɛn pikin dɛm we lɛf da di land we di Izrɛlayt dɛm nɔ bin kil – na dɛn Sɔlɔmɔn mek slev, ɛn dɛn na slev te tide.

⁹ Bɔt Sɔlɔmɔn nɔ mek nɔn pan Izrɛlayt pipul slev fɔ du di wok; dɛn na bin sojaman dɛm, ɔfishal, dɛm di kɔmanda dɛm fɔ in chariɔt dɛm ɛn in man dɛn we de rayd ɔs.

¹⁰ Na dɛnwanya na bin Kiŋ Sɔlɔmɔn in bigman dɛn we bin de supavays di pipul dɛn; tu ɔndrɛd ɛn fifti.

¹¹ Sɔlɔmɔn briŋ Fero in gyal pikin kɔmɔt Devid siti go na di os we i bin dɔn bil fɔ am, bikɔs i se, “Mi wɛf nɔ go tap na Devid we na kiŋ na Izrɛl in os, bikɔs i se, di say dɛn we di Ak ɔf di Kɔvinant kin de, na oli ples dɛm.”

¹² Dɔn Sɔlɔmɔn mek bɔn sakrifays to PAPA GƆD na PAPA GƆD in ɔlta we i bil bifo di pɔch,

¹³ bay aw ɛvride dyuti kɔlfɔ, fɔ de mek sakrifays as aw Mozis bin dɔn tɛl dɛn traŋa wan fɔ de du fɔ di de fɔ blo ɛn rɛst, di nyu mun, ɛn di tri ebri ia fɛstival,- di Pasova fɛstival, di Avɛst fɛstival ɛn di Bafa fɛstival.

¹⁴ Bay wetin in papa Devid bin dɔn pul se dɛn fɔ de du, i di sho di man dɛn we de mek sakrifays fɔ pipul sin dɛn difrɛn difrɛn wok ɛn di Livayt dɛm fɔ dɛnsɛf yon wok we na fɔ prez ɛn ɛp di man dɛn we de mek sakrifays fɔ pipul sin bay aw dɛn fɔ wok ɛvride, ɛn di getman dɛn na di difrɛn difrɛn get dɛn; bikɔs na os Devid we na Man ɔf Gɔd tɔk traŋa wan se dɛn fɔ du.

¹⁵ Ɛn dɛm nɔ lɛf natin pan wetin di kiŋ bin dɔn tɛl di man dɛn we de mek sakrifays fɔ pipul sin ɛn di Livayt dɛn traŋa wan kɔnsanin ɛnitin ɛn di ples we dɛn de kip di valyuebul tin dɛn na PAPA GƆD in os.

¹⁶ Na so ɔl Sɔlɔmɔn in wok dɛn bin du, frɔm di de we dɛn le PAPA GƆD in os in fawndeshɔn, te i dɔn. So dɛn bin bil PAPA dɔn.

¹⁷ Nain Sɔlɔmɔn go Ɛzin Giba ɛn Ɛlat na di sho na Idɔm.

¹⁸ Kin Iram sɛn in wokman dɛn go gi am ship dɛn ɛn shipman dɛn we sabi wata, ɛn dɛn go na Ofir wit Sɔlɔmɔn in yon wokman dɛn go tek fiftin tawzin kilogram gold, kɛr go gi Kiŋ Sɔlɔmɔn