2 Kronikuls 7 - Krio Fɔs Oli Baybul

Aw Dɛn Dɛdiket Gɔd In Os

¹ We Sɔlɔmɔn dɔn pre dɔn, faya kɔmɔt ɛvin kam dɔŋ ɛn bɔn di bɔn sakrifays ɛn di ɔda sakrifays dɛm, ɛn PAPA GƆD in glori bin ful insay PAPA GƆD in tɛmpul.

² Di man dɛn we de mek sakrifays fɔ pipul sin nɔ ebul go insay PAPA GƆD in os, bikɔs PAPA GƆD in glori bin ful insay PAPA GƆD in os.

³ We di Izrɛlayt dɛn si di faya de kan dɔŋ, ɛn PAPA GƆD in glori pan di tɛmpul, dɛn butu na grɔn na di pevmɛnt ɛn wɔship PAPA GƆD ɛn tɛl am tɛnki se, “Bɔkɔs i gud, bikɔs in lɔv we nɔ de chenj de sote go.”

⁴ Di Izrɛlayt dɛn ɔl jɔyn di kiŋ fɔ mek sakrifays to PAPA GƆD.

⁵ Di pis sakrifays we Kiŋ Sɔlɔmɔn mek to PAPA GƆD, na twɛnti-tu tawzin kaw wit wan ɔndrɛd ɛn twɛnti tawzin ship. Di kiŋ ɛn di pipul dɛn ɔl dɛdiket PAPA GƆD in os.

⁶ Di man dɛn we de mek sakrifays fɔ pipul sin tinap na dɛn post dɛm, di Livayt dɛnsɛf, wit di instrumɛnt dɛn we Kiŋ Devid bin mek fɔ de ple we dɛn de tɛl PAPA GƆD tɛnki, bin tinap na dɛnsɛf yon post – fɔ seka in lɔv we nɔ de chenj sote go - ɛni tɛm we Devid prez de PAPA GƆD we dɛn de ple- di man dɛn we de mek sakrifays fɔ pipul sin, we de ɔpozit dɛn kin blo dɛn trɔmpɛt dɛn; ɛn di wanol Izrɛl kin tinap.

⁷ Sɔlɔmɔn bin kɔnsikret di midul say na di Kɔt yad we de bifo PAPA GƆD in os; bikɔs na de i bin mek di bɔn sakrifays ɛn di fat pan di pis ɔfrin dɛm, bikɔs di bras ɔlta we Sɔlɔmɔn bin dɔn mek nɔ du fɔ di bɔn sakrifays, di sid ɔfrin ɛn di fat.

⁸ Da tɛm de, Sɔlɔmɔn mek big big pati fɔ sɛvin de ɛn di wanol Izrɛl bin de de, we na bin bɔku bɔku pipul dɛn, frɔm usay fɔ go insay Amat, te go Ijipt watasay.

⁹ Di de we mek et, dɛn mek savis fɔ wɔship PAPA GƆD; bikɔs dɛn tek sɛvin de dɛdiket di ɔlta ɛn sɛvin de fɔ mek pati.

¹⁰ Di de mek twɛnti tri insay di sɛvin mɔnt, Sɔlɔmɔn se lɛ ɔlman go na dɛn os. Di pipul dɛn bin gladi na dɛn at fɔ di gud we PAPA GƆD sho to Devid ɛn to Sɔlɔmɔn ɛn to Izrɛl we nain pipul dɛn.

PAPA GƆD Apia Bak to Sɔlɔmɔn

¹¹ We Sɔlɔmɔn dɔn bil PAPA GƆD in os, ɛn di kiŋ in os dɔn; i sɔksid fɔ du ɔl wetin i bin plan fɔ du na PAPA GƆD in os ɛn nain yon os.

¹² Nain PAPA GƆD apia to Sɔlɔmɔn na nɛt ɛn tɛl am se, “A dɔn yɛri yu prea ɛn a dɔn pik dis ples fɔ misɛf se na os fɔ mek sakrifays.

¹³ Wɛn a lɔk ɔp di skay fɔ mek ren nɔ kam, ɔ tɛl di lokɔs dɛn traŋa wan fɔ it ɔltin na di land, ɔ a sɛn dɛn bad bad sik pan mi pipul dɛm,

¹⁴ if mi pipul dɛm we gɛt mi nem, put dɛnsɛf dɔŋ ɛn pre ɛn ripɛnt, ɛn lɛf dɛn wikɛd we, datɛnde, a go yɛri na ɛvin, ɛn a go fɔgiv dɛn sin, ɛn il dɛn land.

¹⁵ Datɛnde, mi yay ɛn mi yes go opin to di prea we dɛn de pre na dis ples.

¹⁶ Bikɔs a dɔn pik dis os ɛn dɔn kɔnsikret am, so dat mi nem go de de sote go; mi yay ɛn mi at go de de sote go.

¹⁷ As fɔ yu yon say, if yu waka tret wit mi ɛn du wetin rayt lɛkɛ yu papa Devid, ɛn du ɔl wetin a tɛl yu ɛn kip mi kɔmandmɛnt,

¹⁸ datɛnde, a go mek yu ɛn yu jɛnareshɔn bi kiŋ na Izrɛl sote go, lɛkɛ aw nɔmɔ a bin prɔmis yu papa Devid we a se nain sid go de rul na Izrɛl sote go.

¹⁹ “Bɔt if yu tɔn yu bak pan mi, ɛn nɔ obe mi kɔmandmɛnt we a dɔn se una fɔ de obe, ɛn go fala ɔda gɔd dɛm ɛn wɔship dɛm,

²⁰ a go rut yu kɔmɔt na di land we a dɔn gi yu; ɛn dis os we a dɔn kɔnsikret fɔseka mi nem, a go trowe am kɔmɔt bifo mi, ɛn a go tɔn am to tin fɔ tɔk bɔt, ɛn fɔ laf na ɔl dɛn neshɔn dɛn.

²¹ Dis os we una de es ɔp so, ɔlman we de pas go de se, ‘Wetindu PAPA GƆD du dis kayn tin to dɛn pipul dɛn ya ɛn to dis os?’ Ɛni bɔdi we de pas go shɔk ɛn se ‘Wetin mek PAPA GƆD du so to dis land ɛn to dis os?’

²² Datɛnde, pipul dɛn go tɛl dɛn se, na bikɔs dɛn kɔmɔt biɛn PAPA GƆD we na dɛn papa dɛn Gɔd we pul dɛn kɔmɔt na Ijipt, ɛn put an pan ɔda gɔd dɛm, ɛn wɔship ɛn sav dɛm; na dat mek i dɔn mek ɔl dɛn bad bad tin dɛn ya apin to dɛn.’”