2 Kronikuls 6 - Krio Fɔs Oli Baybul

Sɔlɔmɔn Tɔk To Di Pipul Dɛm

¹ Nain Sɔlɔmɔn se, “PAPA GƆD dɔn tɔk se in go tap insay tik tik daknɛs.

² I dɔn bil mayti mayti os fɔ yu, ples we yu go tap sote go.”

³ Nain di kiŋ tɔn rawnd ɛn blɛs di wanol Izrɛl, we di wanol Izrɛl bin tinap.

⁴ I se, “PAPA GƆD we na Izrɛl dɛn Gɔd, wi blɛs yu, yu we dɔn tek yu an du wetin yu prɔmis Devid we na mi papa, wit yu mɔt, we yu bin se,

⁵ From di de we a pul mi pipul dɛm kɔmɔt na Ijipt, a nɔ pik nɔn siti pan ɔl di fambul dɛn na Izrɛl we go bil os, so dat mi nem go de de, ɛn a nɔ pik nɔbɔdi fɔ bi bigman oba Izrɛl we na mi pipul dɛn;

⁶ bɔt a dɔn pik Jerusɛlɛm so dat mi nem go de de, ɛn na Devid a dɔn pik fɔ de oba Izrɛl, we na mi pipul dɛn.’

⁷ I bin dɔn de na mi papa Devid in at fɔ bil os fɔ PAPA GƆD we na Izrɛl dɛn Gɔd fɔ ɔnain nem.

⁸ Bɔt PAPA GƆD tɛl mi papa Devid se, ‘ɔlwe i bin dɔn de na yu at fɔ bil os fɔ ɔna mi nem, yu du wɛl we i bin de na yu at;

⁹ pan ɔl dat, yu nɔ go bil di os, bɔt na yu bɔypikin we dɛn go bɔn fɔ yu, go bil di os fɔ ɔna mi nem.’

¹⁰ Naw PAPA GƆD dɔn du wetin i prɔmis se i go du; bikɔs mi dɔn tinap na mi papa Devid in ples, ɛn dɔn sidɔm na di tron na Izrɛl lɛk aw PAPA GƆD prɔmis, ɛn a dɔn bil di os fɔ ɔna PAPA GƆD we na Izrɛl dɛn Gɔd, in nem.

¹¹ Na de a dɔn put di Ak ɔf di Kɔvinant we nainsay di Kɔvinant we PAPA GƆD mek wit di pipul dɛn na Izrɛl.”

Sɔlɔmɔn in Prea

¹² Sɔlɔmɔn tinap bifo di ɔlta usay ɔlman bin de si am ɛn es in an ɔp ɛn pre se,

¹³ Sɔlɔmɔn bin dɔn mek wan bras stej we na tu ɛn di af mita lɔŋ ɛn tu ɛn di af mita wayd, ɛn i bin wan pɔynt tri mita ay, ɛn i bin put am na di Kɔt yad ɛn tinap pan am. Dɔn i nildɔŋ bifo di wanol Izrɛl n opin in an ɔp to ɛvin;

¹⁴ “PAPA GƆD, we na Izrɛl dɛn Gɔd, nɔn Gɔd nɔ de na ɛvin ɔ ath we tan lɛk yu - na yu waŋren kin kip yu Kɔvinant ɛn sho lɔv to yu savant dɛn we de waka tret wit yu;

¹⁵ yu kip yu prɔmis to yu savant, Devid mi papa, ɛn ɔl wetin yu bin tɔk nain yu dɔn du so tide.

¹⁶ So PAPA GƆD, yu we na Izrɛl dɛn Gɔd, a de beg yu lɛ yu kip to di ɔda prɔmis we yu mek to mi papa Devid we yu se nain jɛnareshɔn nɔmɔ go de rul na Izrɛl if dɛn waka tret wit yu ɛn kip to yu lɔ lɛkɛ aw insɛf bin de du;

¹⁷ So duya PAPA GƆD we na Izrɛl dɛn Gɔd, kip da prɔmis we yu mek to yu wokman Devid.

¹⁸ “Bɔt fɔ tru tru se PAPA GƆD yu go kam tap dɔŋ na di wɔl? Di klawd sɛf te rich ɔp ɔp di skay nɔ ebul ol yu bifo a se dis lili abule we a dɔn bil!

¹⁹ Duya PAPA GƆD we na mi Gɔd, mi na yu savant, duya ansa dis prea we a de pre to yu tide;

²⁰ so dat yu yay de pan dis os de ɛn nɛt, bikɔs na de yu dɔn pik se fɔ de wɔship yu; ɛnitɛm we a kam ya fɔ pre to yu, duya ansa mi.

²¹ Duya ansa mi prea, ɛn di pipul dɛnsɛf yon prea wɛn dɛn kam na dis os fɔ pre. Usay yu de na yu os na ɛvin, ansa wi prea ɛn fɔgiv wi.

²² “If dɛn briŋ ɛnibɔdi na yaso se i du bad, dɔn i nildɔŋ bifo dis ɔlta na di os fɔ swɛ se in nɔ du natin,

²³ duya PAPA GƆD, ansa di prea na ɛvin ɛn gi jɔjmɛnt. Pɔnish di wan we rɔŋ ɛn fri di wan we nɔ gilti lɛ ɔlman no se i inosɛnt.

²⁴ “If yu pipul we na di Izrɛlayt dɛn lɔs wa bikɔs dɛn bin dɔn sin, if dɛn tɔn to yu ɛn kam na dis os ɛn ɔmbul dɛnsɛf ɛn pre to yu fɔ masi,

²⁵ ansa dɛn prea na ɛvin. Fɔgiv dɛn fɔ dɛn sin ɛn briŋ dɛn kam bak na di land we yu bin gi dɛn papa dɛn.

²⁶ “If yu ol di ren fɔ lɛ i nɔ kam bikɔs dɛn sin, if dɛn tɔn to dis os ɛn ɔmbul dɛnsɛf, kɔnfɛs dɛn sin ɛn beg yu fɔ masi,

²⁷ duya yɛri dɛn prea na ɛvin. Fɔgiv di kiŋ ɛn di Izrɛlayt dɛn sin ɛn sho dɛn fɔ du wetin rayt. Dɔn PAPA GƆD, mek ren kam na dis land we yu gi yu pipul dɛn se na dɛn yon prɔpati.

²⁸ “If wi plant dɛn ɔl pwɛl dɔn it nɔ de fɔ it, ɔ, if lokɔs it ɔl wetin we plant, ɔ if ɛnimi atak yu pipul, ɔ, if ɛni bad bad sik sɛf bɔsawt fɔ kil ɔlman,

²⁹ if ɛnibɔdi pre to yu ɛn kɔnshɔs se in dɔn du bad, dɔn i tɔn to yu os ɛn es in an ɔp to yu,

³⁰ duya ansa dɛn prea na yu os na ɛvin. Fɔgiv dɛn ɛn ɛp dɛn. Na yu waŋren nɔmɔ no wetin de na mɔtalman at. Dil wit ɔlman akɔdin to

³¹ lɛ dɛn go de fred yu na dis land we yu gi wi papa dɛn.

³² “Fɔrina dɛn go de kɔmɔt na fa kɔntri kam na ya bikɔs ɔf wetin dɛn yɛri bɔt yu; dɛn go de yɛri bɔt yu wok ɛn di wɔndaful tin dɛn we yu de du; if dɛn kam na dis os fɔ wɔship yu,

³³ duya ansa dɛn prea. Ansa dɛn prea na ɛvin ɛn gi dɛn wetin dɛn aks fɔ, so dat ɔlman na wɔl go no bɔt yu ɛn ɔna yu lɛkɛ aw wi di Izrɛlayt dɛn de du; lɛ dɛn go no se yu de na dis os we a dɔn bil fɔ dɛn rɛspɛkt.

³⁴ “Wɛn yu pipul dɛn de go fɛt wa agens dɛn ɛnimi ɔ ɛnisay we dɛn de, if dɛn tɔn dɛn fes to dis siti we nain yusɛf sɛf dɔn pik, ɛn tɔn dɛn fes to dis yu os we a dɔn bil mek dɛn go rɛspɛkt yu, ɛn pre,

³⁵ ansa dɛn prea. Ansa dɛn na ɛvin ɛn gi dɛn viktri.

³⁶ “Yu no se nɔbɔdi nɔ de we nɔ de kɔmit sin, so if dɛn sin ɛn dɛn mek yu vɛks pan dɛn, yu mek dɛn ɛnimi dɛn kapchɔ dɛn ɛn kɛr dɛn go as slev na ɔda kɔntri, i lɛk na fa fawe kɔntri sɛf;

³⁷ if wɛn dɛn de de dɛn chenj dɛn atityud, dɛn kɔnfɛs ɛn pre to yu se dɛn du bad;

³⁸ if dɛn tɔn bak to yu fɔ tru tru wɛn dɛn de de, ɛn kɔnfɛs dɛn sin; dɔn dɛn tɔn dɛn fes to dis land we yu gi wi papa dɛn, to dis siti we yu bin dɔn pik, ɛn dis os we a bil fɔ de prez yu nem;

³⁹ duya ansa dɛn prea usay yu tap na ɛvin, ɛn ɛp dɛn pan wetin dɛn de du, ɛn fɔgiv yu pipul dɛn we dɔn kɔmit sin to yu.

⁴⁰ Duya mi Gɔd, mek yu yay ɛn yu yes opin to di prea we dɛn de pre na ya.

⁴¹ “So duya, Papa Gɔd we na Gɔd, tinap ɛn go na yu rɛstin ples, yu ɛn di Ak ɔf di Kɔvinant we na yu pawa de de. Duya PAPA GƆD mek di man dɛn we de mek sakrifays fɔ pipul sin drɛs wit salveshɔn, ɛn lɛ yu oli pipul dɛn gladi insay di gud we yu gud.

⁴² Duya Papa Gɔd we na Gɔd, nɔ tɔn yu fes pan di wan we yu dɔn anɔynt! Mɛmba di lɛk we nɔ de chenj we yu8 yu bin gɛt fɔ Devid we na yu wokman.”