2 Kronikuls 4 - Krio Fɔs Oli Baybul

Di Tin Dɛm We Fɔ De Na Di Tɛmpul

¹ I mek wan bras ɔlta we na nayn mita lɔŋ, nayn mita wayd, ɛn fo ɛn af mita ay.

² Dɔn i mek wan big rawnd bras wata tank we na bin tu pɔynt tu mita dip. Wan ɛj to di ɔda ɛj na bin fo pɔynt fo mita, ɛn we dɛn mɛzhɔ am go rawnd, na bin tɔtin pɔynt tu mita. I dizayn kalbas rayt rawnd di tank. Dɛn bin de na tu ro ɛn di sem tɛm we i mek di tank, nain i mek dɛm.

³ Ɔnda di tank in mɔt te go rawnd, i dizayn kalbas dɛn we na tɔtin ɛn af mita. Dɛn bin de na tu ro. Dɛm mek dɛn we dɛn bin de mek di tank insɛf.

⁴ I tinap pan twɛlv man kaw we tri de luk nɔt, tri put dɛn fes wɛst, tri de luk sawt ɛn tri de luk ist. Di tank bin de pantap dɛm, ɛn ɔl dɛn wes bin tɔn insay.

⁵ Di tank bin et sɛntimita tik; ɛn di mɔt bin tan lɛk kɔp yon, we tan lɛk Lili flawa; I de tek siksti tawzin lita wata.

⁶ Pantap dat i mek tɛn baf pan fɔ de was, ɛn i tɔn fayv to di sawt ɛn ɛn fayv to di nɔt. Na isay insay dɛn baf pan ya dɛn fɔ de fɔ de rench wetin dɛn dɔn yuz fo di bɔn sakrifays, ɛn di tank na fɔ di man dɛn we de mek sakrifays fɔ pipul sin fɔ de was.

⁷ Dɔn i mek tɛn gold lampstand dɛn lɛk aw dɛn bin dɔn se, ɛn put dɛn insay di tɛmpul; i put fayv na di sawt ɛn fayv na di nɔt.

⁸ Pantap dat, i mek tɛn tebul ɛn put dɛn insay di tɛmpul; i put fayv no di sawt ɛn fayv na di nɔt. Dɔn i mek wan ɔndrɛd gold besin.

⁹ I mek di Kɔt yad fɔ di man dɛn we de mek sakrifays fɔ pipul sin, ɛn di big big Kɔt yad, ɛn di domɔt dɛm fɔ di Kɔt yad we i plasta wit bras;

¹⁰ dɔn i put di tank na di sawt ist kɔnainsay di os.

¹¹ Uram mek di pɔt dɛn, di shɔbul dɛn ɛn di besin dɛn. Na so Uram dɔn di wok we i du fɔ kiŋ Sɔlɔmɔn na PAPA GƆD in os:

¹² di tu pila dɛn, di bol dɛn, di tu brɔd pat pantap we dɛn kɔl di Kapital dɛm ɛn di tu chen dɛn we i dizayn fɔ kɔba di tu bol na di Kapital dɛm we bin de ɔntɔp pila dɛm;

¹³ ɛn di fo ɔndrɛd pomigranet fɔ di tu chen, sɛt dɛm fɔ wan chen to tu ro pomigranet fɔ kɔba di tu bol we de pantap di Kapital dɛn we de pantap di pila dɛm.

¹⁴ I mek di stand dɛn ɛn di besin dɛn we de pantap di stand dɛn,

¹⁵ ɛn di wan big tank ɛn di twɛlv man kaw dɛn we dɛn mek ɔnda am.

¹⁶ Uram bin mek di pɔt dɛn, di shɔbul, di fɔk ɛn ɔl di tin dɛn fɔ yuz fɔ dɛnwanya, wit shayn bras, fɔ Kiŋ Sɔlɔmɔn fɔ PAPA GƆD in os.

¹⁷ Na di flat grɔn na Jɔdan Kiŋ Sɔlɔmɔn bin mek dɛn, na di kle grɔn we de bitwin Sɔkɔt ɛn Zɛrɛda.

¹⁸ Sɔlɔmɔn bin so mek dɛn tin ya plɛnti wan, dat nɔbɔdi nɔ bin ebul no ɔmɔs bras dɛn yuz.

¹⁹ Na do Sɔlɔmɔn mek ɔl di tin dɛm we bin de insay PAPA GƆD in os: di gold ɔlta, di tebul dɛm fɔ di bred we nɔ gɛt yist,

²⁰ di lamp stand dɛn ɛn dɛn lamp dɛn we na piɔ gold, fɔ de bɔn bifo di insay di ples we oli pas ɔl, jɛs lɛk aw dɛn bin dɔn se;

²¹ di flawa dɛm, di lamp dɛm, di faya spun dɛm we dɛn mek wit gold we piɔ pas ɔl;

²² di kɔp we dɛn de tek ɔt lamp, di besin dɛm, di dish dɛm fɔ insɛns, ɛn di faya pan dɛm, ɔl na bin piɔ gold; ɛn di inchis na di do fɔ go insay di tɛmpul, ɛn di domɔt dɛn we de insay na di ples we oli pas ɔl, ɛn fɔ di domɔt fɔ di men ɔl, na bin gold.