2 Kronikuls 28 - Krio Fɔs Oli Baybul

Kiŋ Eaz Na Juda

¹ Eaz bin ol twɛnti ia we i bi kiŋ ɛn i ren fɔ sikstin ia na Jerusɛlɛm. I nɔ bin du wetin rayt na PAPA GƆD in yay; i nɔ bin tan lɛk in Papa Devid.

² In bin du di bad tin dɛn we di kiŋ dɛn na Izrɛl bin de du. I ivin mek ayɛn lay lay gɔd dɛn fɔ di Beal;

³ ɛn i bin de bɔn insɛns na di Inɔn in bɔypikin dɛn Vali, ɛn bɔn in yon bɔypikin dɛn as bɔn sakrifays, we na sɔm pan di bad bad tin dɛn we di pipul dɛn we PAPA GƆD bin drɛb kɔmɔt na di land fɔseka Izrɛl, bin de du.

⁴ I bin de mek sakrifays ɛn bɔn insɛns na di ay ples dɛn, na di il dɛn ɛn ɔnda ɔl dɛn grin tik.

Wa Wit Siria Ɛn Izrɛl

⁵ Na dat mek Papa Gɔd we na Gɔd mek di kiŋ na Siria, bit ɛn kapchɔ bɔku bɔku pan in pipul dɛm ɛn briŋ dɛm kam Damaskɔs. PAPA GƆD mek di kiŋ na Izrɛl insɛf bit am ɛn kil plɛnti pan dɛm.

⁶ Bikɔs Peka we na Rɛmalaya in bɔypikin kil ɔndrɛd ɛn twɛnti tawzin pawaful fɛtman dɛm na Juda insay waŋren de, bikɔs dɛn dɔn tɔn dɛn bak pan PAPA GƆD, we na dɛn fɔstɛmpapa dɛn Gɔd.

⁷ Ɛn Zikray we na wan pawaful fɛtman we kɔmɔt Ifrem, bin kil Maasɛya we na di kiŋ in bɔypikin, ɛn Azrikam we na di kɔmanda na di pales, ɛn Ɛlkena we bin de nɛks to di kiŋ.

⁸ Di man dɛn na Izrɛl kapchɔ tu ɔndrɛd tawzin pan dɛn fambul dɛm, we na uman dɛm, dɛm bɔypikin ɛn gyal pikin dɛm; dɛn tek bɔku bɔku tin dɛn de ɛn briŋ dɛm kam Sameria.

Odɛd We Na Prɔfɛt

⁹ Bɔt wan pan PAPA GƆD in prɔfɛt dɛm we nem Odɛd, bin de de; i gi go mit di ami man dɛm we kam Sameria ɛn tɛl dɛn se, “A de tɛl una, na we PAPA GƆD we na una fɔstɛmpapa dɛn Gɔd vɛks pan Juda, mek i put dɛm na una an, bɔt una dɔn kil dɛm wit pasmak wamat we mek kɔmplen dɔn rich ɛvin.

¹⁰ Naw, una de mek ɔp fɔ tɔn dɛn pipul ya na Juda ɛn Jerusɛlɛm to una man ɛn uman slev dɛm. Unasɛf nɔ dɔn kɔmit sin to PAPA GƆD we na una Gɔd?

¹¹ Naw, una lisin wetin a de se ɛn sɛn una fambul dɛm we una dɔn kapchɔ go bak, bikɔs PAPA GƆD in at dɔn wam pan una bad bad wan.”

¹² Sɔm pan di chif dɛm na Ifrem we na Azaraya we na Joanan in bɔypikin, Bɛrɛkaya we na Meshilɛmɔt in bɔypikin, Jɛizkaya we na Shalum in bɔypikin ɛn Amasa we na Adlay in bɔypikin, bin tinap pan dɛn wan we bin de kɔmɔt di wa,

¹³ ɛn tɛl dɛn se, “Una nɔ go briŋ di wan dɛn we una kapchɔ kam ya, bikɔs una mek ɔp fɔ gi wi waala to PAPA GƆD ɛn ad pan wi sin dɛn we wi ɔlrɛdi gilti fɔ. Wi sin dɛn ɔlrɛdi bɔku, ɛn PAPA GƆD in at ɔlrɛdi wam bad bad wan pan Izrɛl.”

¹⁴ So di soja man dɛm fri di pipul dɛm ɛn gi dɛm ɔl di tin dɛm we dɛm bin dɔn tek na dɛn an wit pawa, bifo di chif dɛm ɛn dɛn ɔl we bin gɛda de.

¹⁵ Nain di man dɛm we na dɛn nem wi bin dɔn kɔl, grap ɛn tek di pipul dɛn we dɛn bin kapchɔ, ɛn na pan di tin dɛn we dɛn bin tek na dɛn an bay pawa, dɛn tek pan gi dɛm wan we bin de nekɛd klos fɔ wɛr; dɛn gi dɛn klos fɔ wɛr, gi dɛn sandal, gi dɛn tin fɔ it ɛn drink, ɛn anɔynt dɛm; dɛn put ɔl di wik wan dɛm pantap dɔŋki ɛn briŋ dɛn kam to dɛn fambul dɛm na Jɛriko, di siti we gɛt bɔku bɔku pam tri. Afta dat, dɛn tɔmbak go Sameria.

Eaz Aks Asria Fɔ Ɛp am

¹⁶ Na da sem tɛm de kiŋ Eaz sɛn to di kiŋ na Asiria fɔ ɛp am.

¹⁷ Bikɔs di Idomayt dɛm bin dɔn atak ɛn bit Juda bak ɛn dɔn tot pipul dɛn go mek slev.

¹⁸ Ɛn di Filistin dɛnsɛf bin de atak ɛn tif na di siti dɛm we de na di Shɛfɛla ɛn di Nɛgɛb na Juda, ɛn dɛn bin dɔn kapchɔ Bɛtshɛmɛsh, Aijalɔn ɛn Gɛdɛrɔt, ɛn di siti dɛm na Soko, Timna ɛn Gimzo wit dɛn vilej dɛm ɛn tap de.

¹⁹ PAPA GƆD briŋ Juda kam dɔŋ fɔseka Eaz we na kiŋ na Izrɛl, bikɔs i bin dɔn trit di pipul dɛn na Juda, we we mɔtalman nɔ fɔ trit in kɔmpin, ɛn i nɔ bin biliv pan PAPA GƆD.

²⁰ So Tilgatpilnesa we na kiŋ na Asiria, kam fɛt Eaz ɛn kɔz damej pan am instɛd ɔf i gi am sɔpɔt.

²¹ Ɔl we Eaz pul tin dɛm kɔmɔt na PAPA GƆD in os, na di kiŋ os ɛn na di bigman dɛn os dɛm, fɔ pe taks to di Asiria kiŋ, dat nɔ ɛp am.

Eaz in Sin Dɛm

²² Wɛn i de pan in trɔbul, na da tɛm de i kɔmɔt biɛn PAPA GƆD bɛtɛ bɛtɛ wan – dis sem kiŋ Eaz.

²³ Bikɔs i mek sakrifays to di gɔd dɛm na Damaskɔs we bin bit am na wa, ɛn de se “Bikɔs di kiŋ dɛn na Siria dɛn gɔd dɛm bin ɛp dɛm, so go mek sakrifays to dɛm mek dɛn go ɛp misɛf.” Bɔt na dɛn nain dawnfɔl, in ɛn di wanol Izrɛl.

²⁴ Eaz gɛda ɔl di tin dɛn we dɛn de yuz na PAPA GƆD in os ɛn kɔt kɔt dɛm pis pis, ɛn lɔk di do dɛm na PAPA GƆD ɛn mek ɔlta fɔ insɛf ɔlsay na Jerusɛlɛm.

²⁵ I mek ay ples fɔ bɔn insɛns to dɛn lay lay gɔd dɛm na ɔl di siti dɛn na Juda, we de mek PAPA GƆD we nain fɔstɛmpapa dɛn Gɔd, vɛks bad bad wan.

²⁶ Di balans tin dɛn we i du, ɛn aw in bin tan, frɔm di fɔs to di las, rayt na di buk bɔt di kiŋ dɛn na Juda ɛn Izrɛl

²⁷ Eza day go mit in fɔstɛmpapa dɛm, ɛn dɛn bɛr am na di siti na Jerusɛlɛm, bɔt dɛn nɔ bin put am na di kiŋ dɛn tumb na Izrɛl. Na Ɛzikaya we nain bɔypikin bin bi kiŋ nain ples.