2 Kronikuls 24 - Krio Fɔs Oli Baybul

Kiŋ Joash Na Juda

¹ Joash bin ol sɛvin ia we i bi kiŋ. I ren fɔ fɔti ia na Jerusɛlɛm; in mama bin nem Zibia we kɔmɔt Biashiba.

² Joash bin du wetin rayt na PAPA GƆD in yay ɔl di tɛm we Jɛhoayda we na bin di man we de mek sakrifays fɔ pipul sin, bin de alayv.

³ Jɛoiada fɛn tu wɛf fɔ am ɛn i bin bɔn bɔypikin ɛn gyal pikin dɛm.

⁴ Afta dis Josash mek ɔp fɔ mek PAPA GƆD in os bak.

⁵ Ɛn i sɛn kɔl ɔl di man dɛn we de mek sakrifays fɔ pipul sin ɛn di Livayt dɛm, ɛn tɛl dɛn say, “Go na ɔl di siti dɛn na Juda ɛn gɛda mɔni na ɔlman an na Izrɛl fɔ ripia una Gɔd in os ɛvri ia; una mek shɔ se una nɔ wes tɛm pan di mata.” Bɔt di Livayt dɛn westɛm pan di mata.

⁶ So di kiŋ sɛn kɔl Jɛoiada we na di lida ɛn aks am se, “Wetindu yu nɔ mek di Livayt dɛn briŋ di taks we Mozis we na PAPA GƆD in wokman bin se di pipul dɛn na Juda ɛm Jerusɛlɛm fɔ pe we dɛn go gɛda fɔ di tɛnt ɔf di tɛstimoni we Izrɛl kin ol?”

⁷ Bikɔs da wikɛd uman we nem Atalia, in bɔypikin dɛn brok go insay PAPA GƆD in os; dɛn dɔn ivin yuz ɔl di oli tin dɛn na PAPA GƆD in os, fɔ di Beal dɛm.

⁸ So di kiŋ tɛl dɛn traŋa wan fɔ mek bɔk fɔ put mɔni; dɛn mek di bɔks ɛn put an na do we yu pas di get na PAPA GƆD in os.

⁹ Dɛn mek anawnsmɛnt ɔlsay na Juda ɛn Jerusɛlɛm se, di pipul dɛn fɔ briŋ di taks we Mozis, we na PAPA GƆD in wokman bin tɛl Izrɛl na di ɛmti ples we pɔsin nɔ go ebul tap, se, dɛn fɔ pe, fɔ PAPA GƆD.

¹⁰ Ɔl di bigman ɛn ɔl di pipul dɛn bin gladi, ɛn dɛn bin de briŋ dɛn taks dɛn de put am na di mɔni bɔks, te dɛn dɔn di wok.

¹¹ Ɛnitɛm we di Livayt dɛn briŋ di bɔks to di man dɛn we de wok na di kiŋ in os, ɛn dɛn fɛnɔt se i dɔn ful, di kiŋ in sɛktri ɛn di bigman na di Chif Man we de mek sakrifays fɔ pipul sin in ɔfis, kin ɛmti di bɔks ɛn tek di kɔpɔ ɛn kɛr di ɛmti boks go bak nain ples. Na so dɛn bin de du ebride te dɛn gɛda bɔku bɔku kɔpɔ.

¹² Di kiŋ ɛn Jɛoiada bin gi di mɔni to di wan dɛn we de inchaj ɔf di wok fɔ ripia PAPA GƆD in os. Dɛn aya mesna ɛn kapinta dɛn fɔ ripia PAPA GƆD in os, ɛn dɛn aya igen man dɛn we bin de wok wit ayɛn ɛn bras, fɔ ripia PAPA GƆD in os.

¹³ Di wan dɛn we bin de du di wok bin de wok traŋa traŋa wan, ɛn di wok bin de go bifo. Dɛn ripia PAPA GƆD in os lɛk aw i bin de ɛn i bin traŋa bak.

¹⁴ Wɛn dɛn dɔn wok dɔn, dɛn briŋ di balans kɔpɔ to di kiŋ ɛn Jeoiada, ɛn dɛn tek di mɔni mek kɔp, plet, spun ɛn ɔda tin dɛm fɔ yuz na PAPA GƆD in os, fɔ wok fɔ PAPA GƆD, ɛn fɔ mek bɔn sakrifays, ɛn dish dɛm fɔ di insɛns ɛn gold ɛn silva besin dɛm. Dɛn bin kɔntinyu fɔ mek bɔn ɔfrin na PAPA GƆD in os ɔl di tɛm we Jɛoiada bin de alayv.

Dɛn Chenj Ɔltin We Jɛoiada Bin De Du

¹⁵ So, Jɛoiada ol bad bad wan ɛn day; i bin ol wan ɔndrɛd ɛn tati ia wɛn i day.

¹⁶ Ɛn dɛn bɛr am na Devid in siti wit di kiŋ dɛm, bikɔs i bin du gud na Izrɛl, ɛn to PAPA GƆD ɛn in os.

¹⁷ Afta Jɛoiada dɔn day, di bigman dɛn na Juda kam sho rɛspɛkt to di kiŋ ɛn di kiŋ lisin to dɛm.

¹⁸ Dɛn tɔn dɛn bak pan PAPA GƆD in os, PAPA GƆD we na dɛn fɔstɛmpapa dɛn Gɔd, ɛn dɛn sav Ashɛrim ɛn lay lay gɔd dɛm. So PAPA GƆD in vɛksteshɔn fɔdɔm pan Juda ɛn Jerusɛlɛm fɔ dis kayn tin we dɔn gilti fɔ.

¹⁹ Pan ɔl dat, i sɛn prɔfɛt dɛm to dɛm fɔ briŋ dɛn kam bak to in PAPA GƆD; dat mek dɛn gilti bɔt dɛn nɔ bin stil bisin.

²⁰ Nain PAPA GƆD in spirit kam pan Zɛkaraya we na Jɛoiada we na man we de mek sakrifays fɔ pipul sin in bɔypikin, ɛn i tinap bifo di pipul dɛm ɛn i tɛl se, “Na dis PAPA GƆD se, ‘wetindu una nɔ de obe PAPA GƆD in kɔmandmɛnt we de mek una nɔ de go bifo? Bikɔs una dɔn kɔmɔt biɛn PAPA GƆD, insɛf dɔn kɔmɔt biɛn una.”

²¹ Bɔt dɛn tay bagin fɔ am, ɛn di kiŋ gi kɔmand fɔ lɛ dɛn ston am insay di yad na PAPA GƆD in os.

²² Dat sho se Joash we na bin di kiŋ, nɔ mɛmba di gud we Jɛoiada we na Zɛkaraya in papa, bin du to am, bɔt i kil in bɔypikin. Wɛn i bin de day i day se, “Mek Papa si ɛn rivɛnj!”

Aw Joash in Gɔvamɛnt Ɛnd

²³ Wɛn di ia wan dɔn, di Sirian ami kam fɔ fɛt Joash. Dɛn kam na Juda ɛn Jerusɛlɛm ɛn kil ɔl di bigman dɛm kɔmɔ pan di pipul dɛm, ɛn sɛn ɔltin we dɛn lut go to di kiŋ na Damaskɔs.

²⁴ Ɔlwe di Sirian ami nɔ kam wit bɛtɛ sojaman dɛm, PAPA GƆD mek dɛn kapchɔ big big ami, bikɔs dɛn dɔn tɔn dɛn bak pan PAPA GƆD we na dɛn fɔstɛmpapa dɛn Gɔd. Na so dɛn pas jɔjmɛnt pan Joash.

²⁵ Wɛn dɛn kɔmɔt to am, dɛn lɛf am wund bad bad wan. In wokman dɛn tay bagin fɔ am fɔ seka Jɛoiada we na bin man we de mek sakrifays fɔ pipul sin, in bɔypikin we i bin kil, ɛn dɛn kil am nain bed. So in day ɛn dɛn bɛr am na Devid in siti, bɔt nɔto di kiŋ dɛn grev yad dɛn put am.

²⁶ Dɛn wan we tay dis bagin fɔ am na Zaba, we na Shimɛat we na Amonayt uman, in bɔypikin, ɛn Jɛozabad, we na Shimrit we na Moabayt uman, in bɔypikin.

²⁷ Di istri bɔt in bɔypikin dɛm, ɛn di bɔku prɔfisi dɛm we kɔmɔt agens am, ɛn aw dɛn bin bil PAPA GƆD in os bak, rayt na di buk we dɛn kɔl, Kɔmɛntri Pan Di Buk Bɔt dɛn kiŋ dɛm. Na Amazaya we nain bɔypikin, bi kiŋ nain ples.