2 Kronikuls 22 - Krio Fɔs Oli Baybul

Kiŋ Aazaya Na Juda

¹ Di pipul dɛn we tap na Jerusɛlɛm mek Aazaya, we nain las pikin, kiŋ nain ples; bikɔs di man dɛn we kam wit di Arab dɛn bin dɔn kil ɔl di big pikin dɛn. So Aazaya we na Joram we na bin kiŋ na Juda, in bɔypikin, bi kiŋ.

² Aazaya bin ol fɔti tu ia we i bigin ren, ɛn i bi kiŋ fɔ wan ia na Jerusɛlɛm. In mama we na bin Omri in granpikin we nem Atalia,

³ I du di tin dɛn we Eab ɛn in pipul bin du, bikɔs in mama bin de sho am aw fɔ du wikɛdnɛs.

⁴ I du wetin bad na PAPA GƆD in yay lɛk aw Eab ɛn in pipul bin du, bikɔs wɛn in papa day, na dɛn bin de advays am so te i pwɛl.

⁵ I ivin tek dɛn advays ɛn fala Jeoram we na bin Eab we na bin kiŋ na Izrɛl in bɔypikin, go fɛt Azaɛl we na bin kiŋ na Siria, na Ramɔt Giliad, ɛn di Sirian dɛn wund Joram,

⁶ so i go na Jɛzril fɔ go mɛn di wund we dɛn bin wund am na Rama, we i bin fɛt Azaɛl we na bin kiŋ na Siria. Aazaya we na Joram we na bin kiŋ na Juda in bɔypikin, bin go dɔŋ Jɛzril fɔ go waka to Joram we na Eab in bɔypikin, bikɔs i bin sik.

⁷ Bɔt na PAPA GƆD bin dɔn mak se Aazaya in dawnfɔl go mit am wɛn i de go fɛn Joram. I bi se we i go de, i kɔmɔt wit Joram fɔ go mit Jeu we na Nimshi in bɔypikin, we PAPA GƆD bin dɔn anɔynt fɔ nyakanyaka Eab in os.

⁸ We Jeu bin de du wetin PAPA GƆD se i fɔ du Eab ɛn in pipul dɛn, i mit di bigman dɛn na Juda ɛn Aazia in brɔda dɛn bɔypikin dɛn, we bin de atɛnd to Aazaya ɛn i kil dɛn.

⁹ I fɛn fɛn Aazia ɛn i kapchɔ am usay i bin ayd na Sameria, ɛn dɛn briŋ am kam to Jeu ɛn kil am. Dɛn bɛr am, bikɔs dɛn se, “Na Jɛoshafat in gran pikin we fɛn PAPA GƆD wit ɔl in at.” Ɛn Aazaya in os nɔ bin gɛt nɔbɔdi we ebul fɔ rul di kindɔm.

Kwin Atalia na Juda

¹⁰ We Atalia we na Aazaya in mama si se in pikin dɔn day, i vɛks kil ɔlman na di rɔyal famili na Juda.

¹¹ Bɔt Jɛoshabɛat we na di kiŋ in gyal pikin, tek Joash we na Azaia in bɔypikin ɛn tif am kɔmɔt pan di kiŋ in bɔypikin dɛn we dɛn bin de rɛdi fɔ kil. I put in ɛn in nɔs na wan rum. Na so Jɛoshabɛat we na kiŋ Joram in gyal pikin ɛn Jɛoiada we na man we de mek sakrifays fɔ pipul sin in wɛf, bin ayd am pan Atalia lɛ i nɔ go kil am, bikɔs in Jɛoshabɛat na bin Aazaya in sista;

¹² i bin to dɛn de ayd na PAPA GƆD in os fɔ siks ia, we Atalia in bin de rul di kɔntri.