2 Kronikuls 21 - Krio Fɔs Oli Baybul

¹ Jɛoshafat day go mit in fɔstɛm-papa dɛn, ɛn dɛn bɛr am wit in fɔstɛmpapa dɛn na Devid in siti; na Joram we nain bɔypikin bin tek in ples.

Kiŋ Jɛhoram Na Juda

² I bin gɛt brɔda dɛm we na Jɛoshafat in bɔypikin dɛn. Dɛn na: Azaraya, Jɛiɛl, Zɛkaraya, Azarau, Maykɛl ɛn Shefataya. Dɛn ɔl na bin Jɛoshafat we na kiŋ na Juda, in bɔypikin dɛm.

³ Dɛn papa gi dɛm bi big prɛzɛnt dɛn, lɛk gold, silva, valyuebul tin dɛn, ɛn i gi dɛn siti dɛn we gɛt protɛkshɔn na Juda bɔt i gi Joram bikɔs nain na bin di big wan.

⁴ Wɛn Joram bin dɔn sidɔm nain papa in tron ɛn bin dɔn sidɔm traŋa wan, i kil ɔl in brɔda dɛn ɛn sɔm pan di bigman dɛn na Izrɛl, wit sɔd.

⁵ Joram bin ol tati tu we i bi kiŋ, ɛn i bi kiŋ fɔ et ia na Jerusɛlɛm.

⁶ I bin du ɔl wetin di kiŋ dɛn na Izrɛl du, jɛs lɛk we Eab bin du; bikɔs i bin mared Eab in gyal pikin; i bin du wetin bad na PAPA GƆD in yay.

⁷ Pan ɔl dat, PAPA GƆD nɔ kɔt ɔf Devid in layn, fɔ seka di Kɔvinant we i bin dɔn mek wit Devid, ɛn bikɔs i bin dɔn prɔmis am se in ɛn in pikin dɛn go bi kiŋ, sote go.

⁸ Na di tɛm we Jɛroam bin de rul, Idɔm bin baranta kɔmɔt ɔnda Juda ɛn mek dɛn yon kiŋ.

⁹ Nain Joram krɔs go oba wit in kɔmanda dɛn ɛn ɔl in chariɔt dɛn, ɛn grap na nɛt go kil di Idomayt dɛm we bin dɔn Sɔrawnd in ɛn in chariɔt kɔmanda dɛn.

¹⁰ So, Idɔm bin dɔn baranta kɔmɔt ɔn Juda, te tide. Na da tɛm de Libna sɛf bin baranta kɔmɔt ɔnda Juda, Jɛroam bin dɔn kɔmɔt biɛn PAPA GƆD we nain papa dɛn Gɔd.

¹¹ Pantap dat, i mek ay ples dɛn na di il kɔntri we de na Juda, ɛn mek di pipul dɛn we tap na Jerusɛlɛm, nɔ waka tret wit PAPA GƆD, we mek Juda nɔ waka na PAPA GƆD in rod igen.

¹² Nain i gɛt wan wan lɛta we Ilayja we na prɔfɛt sɛn to an se, “PAPA GƆD we na yu papa Devid in Gɔd se, bikɔs yu nɔ du wetin yu papa Jɛoshafat bin de du, ɔ wetin Esa we na bin kin na Juda bin de du,

¹³ bɔt bin de du wetin di kiŋ dɛn na Izrɛl bin de du, we mek Juda ɛn di pipul dɛn we tap na Jerusɛlɛm nɔ de waka tret wit PAPA GƆD, jɛs lɛk we Eab bin mek Izrɛl lɛf fɔ waka tret wit PAPA GƆD, ɛn yu dɔn kil yu brɔda dɛn we yu papa bin bɔn, brɔda dɛn we bin bɛtɛ pas yu;

¹⁴ dat go mek PAPA GƆD briŋ bad bad sik pan yu pipul dɛn, yu pikin dɛm, yu wɛf dɛn ɛn ɔl wetin yu gɛt,

¹⁵ yu gɔ gɛt bad bad sik na yu bɛlɛ we go mek yu bɛlɛ de swɛl, aw di sik go de wɔs ɛvri de.

¹⁶ PAPA GƆD mek di Filistin dɛn ɛn di Arab dɛn we bin de nia Itiopia, at wam pan Joram;

¹⁷ Nain dɛn atak Juda, go inasy de ɛn tek ɔl di tin dɛn we bin de na di kiŋ in os. Dɛn tek in bɔypikin dɛn ɛn in wɛf dɛn. Nɔn bɔypikin nɔ bin lɛf to an pas Jɛoaaz we nain las bɔypikin.

¹⁸ Afta ɔl dat PAPA GƆD mek i gɛt bad bad sik nain bɛlɛ we nɔ de mɛn.

¹⁹ As tɛm de go, afta tu ia, in bɛlɛ swɛl te i day wit bad bad pen. In pipul dɛn nɔ bin mek bɔnfaya fɔ am, lɛk di wan dɛn we dɛn kin mek fɔ in fɔstɛmpapa dɛm.

²⁰ I bin ol tati tu ia wɛn i bi kiŋ, ɛn i bin bi kiŋ fɔ et ia na Jerusɛlɛm. Nɔbɔdi nɔ bin sɔri fɔ an we i day. Dɛn bɛr am na Devid in siti, bɔt nɔto usay dɛn kin bɛr dɛn kiŋ dɛn.