2 Kronikuls 16 - Krio Fɔs Oli Baybul

Izrɛl Ambɔg Juda

¹ Di ia we mek Esa tati siks ia na pawa, Baasha we na kiŋ na Izrɛl, go atak Juda ɛn bil Rama fɔ mek nɔ bɔdi nɔ go ɔ kɔmɔt insay to Eas we na kiŋ na Juda.

² Nain Esa tek silva ɛn gold kɔmɔt na di say we dɛn de kip di di dia tin dɛn na PAPA GƆD in os ɛn di kiŋ in os, ɛn sɛn dɛm go gi Bɛn Adad we na di kiŋ na Siria we bin tap na Damaskɔs ɛn tɛl am se,

³ Mek wi mek wan wɔd lɛk aw mi papa ɛn yu papa bin de; so a dɔn sɛn silva ɛn gold brok fɔ yu mek yu go brok di wan wɔd we de bitwin yu ɛn Baasha so dat i go kɔmɔt biɛn mi.”

⁴ Bɛn Adad gri fɔ du wetin Kiŋ Esa se, so i sɛn di kɔmanda dɛn nain ami fɔ go atak di siti dɛn na Izrɛl, ɛn dɛn kapchɔ Ijɔn, Dan, Ebɛl Bɛth Maaka ɛn ɔl di siti dɛn we dɛn bin de kip tin dɛn na Naftali.

⁵ We Baasha yɛri bɔt dat, i tap fɔ bil Rama ɛn lɛ in wok tap.

⁶ Nain Kiŋ Esa gɛda ɔlman na Juda ɛn dɛn kɛr di ston dɛm na Rama ɛn di bod dɛn, we Baasha bin de yuz fɔ bil, go bil Giba ɛn Mizpa

Di Prɔfɛt Anani

⁷ Na datɛnde Anani we na prɔfɛt kam to Esa we na kiŋ na Juda ɛn tɛl am se, “Bikɔs yu abop pan di Kiŋ na Siria, ɛn yu nɔ bin abop pan PAPA GƆD we na yu Gɔd, di kiŋ na Siria in ami dɔn kɔmɔt biɛn yu.

⁸ Di Itiopian dɛn ɛn di Libian dɛm nɔto bin big big ami we bin gɛt bɔku bɔku chariɔt ɛn man dɛn we rayd ɔs? Bɔt bikɔs yu bin abop pan PAPA GƆD, i put dɛn na yu an.

⁹ Bikɔs PAPA GƆD in yay de de ɔlsay na di wanol wɔl, fɔ sho in pawa fɔseka di wan dɛn we dɛn dɛn at klin fɔ am. Na fulish we yu biev so; bikɔs as frɔm tide, na so so wa yu go de fɛt.

¹⁰ Nain Esa vɛks pan di prɔfɛt ɛn chen am put na jel, bikɔs i bin vɛks pan am bad bad wan fɔ seka dat. Da sem tɛm de, Esa bin du kruɛl kruɛl tin to di pipul dɛn.

Aw Esa In Gɔvamɛnt Ɛnd

¹¹ Di tin we Esa du, frɔm fɔs to las, rayt na di buk bɔt di kiŋ dɛn na Juda ɛn Izrɛl.

¹² Insay di ia we mek Esa tati nayn ia na pawa, Esa bin gɛt sik nain fut, ɛn di sik bin mɔna am; pan ɔl we in bin gɛt sik nain fut, i nɔ bin fɛnɔt to PAPA GƆD, bɔt na dɔkta dɛn i bin de go to.

¹³ So Esa day go mit in fɔstɛm-papa dɛn, insay di ia we mek am fɔti wan ia, na pawa.

¹⁴ Dɛn bɛr am na di grev we i bin dɔn dig fɔ insɛf insay Devid in siti. Dɛn le am na biara we dɛn ful wit difrɛn kayn pafyum we na di masta sabi pipul dɛn pan pafyum bizs bin mek; ɛn dɛm mek big bɔnfaya fɔ ɔna am.