2 Kronikuls 14 - Krio Fɔs Oli Baybul

Kiŋ Esa Bit Di Itiopian Dɛn

¹ So Abija day go mit in fɔstɛm-papa dɛn, ɛn dɛn bɛr am na Devid in siti; nain bɔypikin we nem Ɛsa bin bi kiŋ nain ples. Di tɛm we i bin de rul, di land bin gɛt pis tɛn ia.

² Esa bin du wetin gud ɛn rayt na PAPA GƆD we nain Gɔd, in yay.

³ I pul pul dɛn fɔrin ɔlta dɛn ɛn dɛn ay ples dɛm, ɛn brok di pila dɛn ɛn chap chap di Asherim,

⁴ ɛn i tɛl Juda traŋa wan fɔ pre to PAPA GƆD we na dɛn papa dɛn Gɔd ɛn fɛnɔt wetin i want, obe di lɔ, ɛn du ɔl wetin i tɛl dɛn traŋa wan se, dɛn fɔ de du.

⁵ Igen, i pul ɔl di ay ples dɛn ɛn di insɛns ɔlta dɛn kɔmɔt na di siti dɛn na Juda. So di kindɔm bin gɛt alafia ɔnda am.

⁶ I bil siti dɛn we gɛt protɛkshɔn na Juda bikɔs di land bin gɛt alafia. I nɔ bin fɛt nɔn wa dɛn ia dɛn de, bikɔs PAPA GƆD bin gi am pis.

⁷ Nain i tɛl Juda se, “Lɛ wi bil dɛn siti dɛn ya ɛn put wɔl rawnd dɛn wit tawa, ɛn get wit ayɛn ba; na wi stil gɛt di grɔn bikɔs we dɔn pre to PAPA GƆD we na wi Gɔd ɛn fɛnɔt wetin I want; we dɔn pre to am ɛn fɛnɔt wetin I want, so I dɔn gi wi kolat ɔloba.” So dɛn bil am ɛn bɛtɛ bin de fala dɛn.

⁸ Esa bin gɛt tri ɔndrɛd tawzin fɛtman we kɔmɔt Juda, ɛn dɛn bin de yuz big shild ɛn spia fɔ fɛt, ɛn tu ɔndrɛd ɛn eti tawzin fɛtman we kɔmɔt Bɛnjamin, ɛn dɛn bin de yuz big shild ɛn bo ɛn aro fɔ fɛt; dɛn ɔl na bin pawaful fɛtman dɛn.

⁹ Zera we kɔmɔt Itiopia, kɔmɔt kam wit in ami we na wan miliɔn man ɛn tri ɔndrɛd tawzin chariɔt, fɔ kam fɛt am. Dɛn go ɔp to rich Marɛsha.

¹⁰ Esa kɔmɔt go mit am, ɛn dɛn put dɛn man dɛn na dɛn pozishɔn fɔ fɛt, na Zɛfata vali insay Marɛsha.

¹¹ Nain Esa pre to PAPA GƆD we nain Gɔd, se, “PAPA GƆD, nɔn Gɔd nɔ de we ebul ɛp wik pɔsin we pɔsin we gɛt trɛnk atak am, lɛk yu. Du ya PAPA GƆD we na wi Gɔd, ɛp wi, bikɔs na yu wi abop pan, nainsay yu nem wi kam fɔ kam fɛt dɛn bɔku bɔku pipul dɛn ya. Du ya PAPA GƆD, na yu na wi Gɔd; nɔ gri lɛ nɔbɔdi pul nem pan yu.”

¹² So PAPA GƆD bit di Itiopian dɛm bifo Esa ɛn bifo Juda, ɛn di Itiopian dɛn rɔnawe.

¹³ Esa ɛn di pipul dɛm we bin de wit am, rɔnata dɛm te rich Gɛra ɛn kil kil di Itiopian te nɔn pan dɛn nɔ lɛf; bikɔs PAPA GƆD ɛn in ami nyakanyaka dɛn. Di man dɛn na Juda bin tek plɛnti fayn fayn tin go om.

¹⁴ Ɛn dɛn kil ɔlman na di siti dɛn we de rawnd Gɛra, bikɔs di pipul dɛn bin fred PAPA GƆD. Dɛm tif tif ɔl di tin dɛn na di siti, bikɔs bɔku tin dɛn bin de fɔ tif.

¹⁵ Dɛn kil ɔl di wan dɛn we tap na tɛnt gɛt kaw, ɛn kɛr dɛn bɔku bɔku ship ɛn kamɛl dɛn go. Afta dat, dɛn go bak na Jerusɛlɛm.