2 Kronikuls 13 - Krio Fɔs Oli Baybul

Abija Fɛt Wa Wit Jɛroboam

¹ Na di ia we mɛk Jɛroboam etin ia na pawa, Abija bi kiŋ na Juda.

² I ren fɔ tri ia na Jerusɛlɛm. In mama bin nem Mikaya we na Yuriɛl we kɔmɔt Gibia, in gyal pikin. Wa bin de bitwin Abija ɛn Jɛroboam.

³ Abija go na di batul fil wit pawaful fɛtman dɛm we nɔ de fred, we na bin fo ɔndrɛd tawzin masta sabi fɛtman; Jɛroboam in rɛdi et ɔndrɛd tawzin masta sabi fɛtman dɛn fɔ fɛt Abija.

⁴ Nain Abija tinap pan Mawnt Zɛmaraim we de na di il kɔntri na Ifrem, ɛn tɔk se, “Lisin o yu, Jɛroboam ɛn ɔlman na Izrɛl!

⁵ Una nɔ no se PAPA GƆD wa na Izrɛl dɛn Gɔd bin dɔn gi di Izrɛl tron to Devid ɛn in bɔypikin dɛm insay wan sɔl Kɔvinant so te go?

⁶ Bɔt Jɛroboam, we na Nebat in bɔypikin, we na Sɔlɔmɔn, dat na Devid in bɔypikin in wokman, baranta pan in masta.

⁷ Nain sɔm wɔltɛs rareman dɛm jɔyn am ɛn nɔ gri yɛri Rɛoboam we na Sɔlɔmɔn in bɔypikin in wɔd. I bin Yɔŋ ɛn nɔ bin dɔn tinap traŋa wan, so i nɔ bin ebul tap dɛm.

⁸ Naw una de plan fɔ fɛt PAPA GƆD in kindɔm we de na Devid in bɔypikin dɛn an, bikɔs una bɔku lɛk yɔni ɛn di pikin kaw we Jɛroboam mek wit gold fɔ lɛ una de wɔship.

⁹ Una nɔ dɔn drɛb PAPA GƆD in man dɛn we de mek sakrifays fɔ pipul sin we na Erɔn in pikin dɛn ɛn di Livayt dɛn, ɛn mek man dɛn we de mek sakrifays fɔ pɔpul sin fɔ una sɛf lɛk di pipul dɛm na ɔda kɔntri dɛn? Ɛnibɔdi we kam kɔnsikret insɛf wit wan yɔŋ man kaw or sɛvin man ship, yu de mek am man we de mek sakrifays fɔ pipul sin fɔ tin dɛn we nɔto gɔd.

¹⁰ Bɔt as fɔ wi, PAPA GƆD na wi Gɔd ɛn wi nɔ go kɔmɔt biɛn am. Wi gɛt man dɛn we de mek sakrifays fɔ pipul sin we na Erɔn in bɔypikin dɛn ɛn Livayt dɛn we de wok fɔ PAPA GƆD.

¹¹ Dɛn de mek mek bɔn sakrifays ɛn bɔn insɛns dɛn we de smɛl swit fɔ PAPA GƆD, put put di sho bred na di tebul we dɛn tek piɔ gold ɛn sibɔt di gold lamp stand so dat in lamp dɛm go de dɔn ɛvri ivin; wi de du wetin PAPA GƆD we na wi Gɔd se, bɔt una dɔn tɔn una bak pan am.

¹² So, PAPA GƆD de wit wi ɛn nain na wi lida, ɛn in man dɛn we de mek sakrifays fɔ pipul sin de wit dɛn batul trɔmpɛt dɛn fɔ blo fɔ kɔl wi fɔ fɛt una. Duya Izrɛl in bɔypikin dɛm, una nɔ fɛt PAPA GƆD we na una papa dɛn Gɔd, bikɔs una nɔ go ebul.”

¹³ Jɛroboam bin dɔn sɛn dɛn rawnd go le ambush biɛn dɛn; so in yon man dɛn bin de frɔnt Juda ɛn di ambush bin de biɛn dɛm.

¹⁴ Ɛn we Juda go wach, di fɛt bin de bifo ɛn biɛn dɛm, ɛn dɛn kray to PAPA GƆD ɛn di man dɛn we de mek sakrifays fɔ pipul sin blo di trɔmpɛt dɛm.

¹⁵ Nain di man dɛn na Juda ala fɔ lɛ di fɛt bigin. We di man dɛn na Juda ala, PAPA GƆD bit Jɛroboam ɛn di wanol Izrɛl bifo Abija ɛn Juda dɛn yay.

¹⁶ Di man dɛn na Izrɛl rɔnawe pan di man dɛn na Juda ɛn PAPA GƆD put dɛm na dɛn an.

¹⁷ Abija ɛn in pipul dɛn kil dɛn bɔku bɔku wan; ɛn na fayv ɔndrɛd tawzin masta sabi fɛtman dɛm day.

¹⁸ Na so di man dɛn na Izrɛl dɛn fɛda brok, bɔt di man dɛn na Juda bin win bikɔs dɛn bin liŋ pan PAPA GƆD we na dɛn Gɔd.

¹⁹ Nain Abija rɔnata Jɛroboam ɛn kapchɔ in siti dɛn. Dɛn kapchɔ Bɛthɛl ɛn in vilej dɛn dɛn nain an, Bɛtɛl ɛn in vilej dɛn ɛn Jɛshana ɛn insɛf yon vilej dɛm, ɛn Ɛfrɔn wit in vilej dɛm.

²⁰ Jɛroboam nɔ bin ebul gɛt in pawa bak igen we Abija bin de na pawa; ɛn PAPA GƆD nak am dɔŋ ɛn i day.

²¹ Bɔt Abija in bin de gɛt pawa mɔ ɛn mɔ, so i mared fotin wɛf, ɛn bin gɛt twɛnti tu bɔypikin ɛn sikstin gyal pikin.

²² Di balans tin dɛn we Abija du, aw i bin tan wetin i bin de se, ɔl rayt na di stori bɔt prɔfɛt Ido.