2 Kronikuls 11 - Krio Fɔs Oli Baybul

Shɛmaya In Prɔfisay

¹ Wɛn Rɛoboam kam bak na Jerusɛlɛm, i gɛda di Juda ɛn Bɛnjamin fambul dɛn, we na bin wan ɔndrɛd ɛn eti tawzin sas fɛtman dɛm, fɔ go fɛt Izrɛl ɛn tek di kindɔm gi Rɛoboam

² Bɔt PAPA GƆD in wɔd kam to Shɛmaya we na man ɔf Gɔd se.

³ “Tɛl Rɛoboam we na Sɔlɔmɔn in bɔypikin, ɛn na di kiŋ na Juda, ɛn ɔl di Izrɛlayt dɛn we tap na Juda ɛn Bɛnjamin se,

⁴ ‘Na dis PAPA GƆD se, una nɔ fɔ go to una brɔda dɛn ɔ go fɛt una dɛm. Mɛk ɔlman tɔn bak go nain os, bikɔs na mi du dis tin we bi so.” So dɛn yɛri PAPA GƆD in wɔd ɛn tɔn bak ɛn nɔ go fɛt Jɛroboam.

Rɛoboam Protɛkt Di Siti Dɛn

⁵ Rɛoboam tap na Jerusɛlɛm ɛn bil siti dɛn fɔ protɛkt Juda.

⁶ I bil Bɛtliɛm. Etam, Tɛkoa,

⁷ Bɛtzur, Soko, Adulam,

⁸ Gat, Marɛsha, Zif.

⁹ Adoraim, Lakish, Azɛka,

¹⁰ Zora, Aijalɔn ɛn Ɛbrɔn. Dɛn na di siti dɛn we i bin protɛkt na Juda ɛn Bɛnjamin.

¹¹ I mek di baraks dɛn traŋa wan ɛn put kɔmanda dɛn de, ɛn ples dɛn we i kip kip bɔku bɔku it, ɔyl ɛn wayn de.

¹² I put big shild ɛn spia dɛn na ɔl di siti dɛn ɛn mek dɛn traŋa bad bad wan. Na so i bin ol Juda ɛn Bɛnjamin.

Di Man dɛn we de mek sakrifays fɔ pipul sin Ɛn Livayt Dɛm Kam Juda

¹³ Di man dɛn we de mek sakrifays fɔ pipul sin, ɛn di Livayt dɛm we bin de ɔloba Izrɛl, bin kam tap to Rɛoboam kɔmɔt na ɔl di say dɛm we dɛn bin de.

¹⁴ Di Livayt dɛm lɛf di land we na dɛn ɔl bin gɛt ɛn dɛn prɔpati dɛm ɛn kam na Juda ɛn Jerusɛlɛm, bikɔs Jɛroboam ɛn in bɔypikin drɛb dɛn se dɛn nɔ go bi man dɛn we de mek sakrifays fɔ pipul sin fɔ PAPA GƆD igen

¹⁵ Ɛn i pik in yon man dɛn we de mek sakrifays fɔ pipul sin fɔ de na di ay ples laylay gɔd dɛn, ɛn di pikin kaw imej dɛn we i bin dɔn mek.

¹⁶ Ɛn dɛn wan dɛn we bin dɔn mekɔp dɛn maynd fɔ de wit PAPA GƆD we na Izrɛl dɛn Gɔd, kɔmɔt pan ɔl di fambul dɛn na Izrɛl, go Jerusɛlɛm fɔ go mek sakrifays to PAPA GƆD we na dɛn papa dɛn Gɔd.

¹⁷ Dɛn mek di Juda kindɔm tinap traŋa wan, ɛn protɛkt Rɛoboam we na Sɔlɔmɔn in bɔypikin fɔ tri ia, bikɔs da tri ia de, dɛn bin de du wetin Devid ɛn Sɔlɔmɔn bin de du.

Rɛoboam In Famili

¹⁸ Rɛoboam mared Maalat we na Jɛrimɔt, dat na Devid in bɔypikin, in yon gyal pikin we in Mama na bin Abiail, we na Ɛliab, dat na Jɛsi in bɔypikin, in yon gyal pikin

¹⁹ ɛn i bɔn bɔy pikin dɛn fɔ am we na Jeush, Shemaraya ɛn Zaam.

²⁰ Afta Maalat, i mared Maaka we na Absalɔm in gyal pikin, ɛn i bɔn fo bɔypikin dɛn fɔ am we na Abija, Atay, Zayza, ɛn Shelomit.

²¹ Rɛoboam bin lɛk Maaka we na Absalɔm in gyal pikin pas ɔl in wɛf ɛn switat dɛn (I mared etin wɛf bin gɛt siksti switat, ɛn i bin gɛt twɛnti et bɔypikin ɛn siksti gyal pikin);

²² ɛn Rɛoboam pik Abija we na Maaka in bɔypikin fɔ bi di nɔmba wan prins pan ɔl in brɔda dɛm, bikɔs i mek ɔp fɔ mek i bi kiŋ.

²³ I du ɔltin wit sɛns ɛn sheb in bɔypikin dɛm na ɔl di distrikt dɛm na Juda ɛn Bɛnjamin, ɛn na di siti dɛm we gɛt protɛkshɔn, ɛn i gi dɛn bɔku provishɔn ɛn mared wɛf dɛm fɔ dɛm.