2 Kronikuls 1 - Krio Fɔs Oli Baybul

Kiŋ Sɔlɔmɔn Pre fɔ Sɛns

¹ Sɔlɔmɔn we na Devid in bɔypikin, sidɔm traŋa nain kindɔm, ɛn PAPA GƆD we in Gɔd bin de wit am, ɛn I mek am pawaful bad bad wan.

² Sɔlɔmɔn tɔk to di wanol Izrɛl, to di kɔmanda dɛm fɔ tawzin tawzin ɛn ɔndrɛd, to di jɔj dɛm ɛn to ɔl di bigman dɛm na Izrɛl, ɛn di big wan dɛn na dɛn papa dɛn os dɛm.

³ Sɔlɔmɔn ɛn ɔl di pipul dɛn na Izrɛl go na di ay ples we bin de na Gibiɔn; bikɔs na de di tɛnt we dɛn de mit wit PAPA GƆD we Mozis we na PAPA GƆD in wokman bin mek na di ples we pɔsin nɔ go ebul tap, bin de.

⁴ (Bɔt Devid bin dɔn briŋ PAPA GƆD In Ak ɔf di Kɔvinant kɔmɔt Kriat Jearim na di ples we Devid bin dɔn mek ples fɔ am, dat na we i bin pich tɛnt fɔ am na Jerusɛlɛm.)

⁵ Pantap dat, di bras ɔlta we Bɛzalɛl we na Yuri, we na Ɔ in bɔypikin, in yon bɔypikin, bin mek, bin dɔn de de bifo PAPA GƆD in tabanakul. So Sɔlɔmɔn ɛn di ɔl di pipul dɛm na Izrɛl, pre to PAPA GƆD.

⁶ So Sɔlɔmɔn go ɔp to di bras ɔlta bifo PAPA GƆD we bin de na di tɛnt we dɛn bin de mit wit PAPA GƆD, ɛn mek wan tawzin bɔn sakrifays pan am.

⁷ Da nɛt de, PAPA GƆD apia to Sɔlɔmɔn, ɛn tɛl am se,” Tɛl mi wetin yu want mek a gi yu.”

⁸ Nain Sɔlɔmɔn tɛl PAPA GƆD se, “Yu dɔn sho tumɔs lɔv we nɔ de chenj to mi Papa Devid, ɛn yu mek mi kiŋ nain ples.

⁹ Duya PAPA GƆD, mek wetin yu bin prɔmis mi papa Devid, bi naw, bikɔs yu dɔn mek mi kiŋ fɔ pipul dɛn we bɔku lɛk sansan.

¹⁰ Gi mi sɛns ɛn sabi fɔ rul dɛn pipul ya, bikɔs udat go ebul rul dɛn yu pipul we plɛnti so wit in yon sɛns nɔmɔ?”

¹¹ Nain PAPA GƆD ansa Sɔlɔmɔn se, “Bikɔs na dat de na yu at, ɛn nɔ aks fɔ prɔpati, jɛntri, ɔna ɔ fɔ yu ɛnimi dɛn layf, ɛn yu nɔ ivin aks fɔ lɔŋ layf, bɔt yu aks fɔ sɛns ɛn sabi fɔ yusɛf mek yu go ebul rul mi pipul dɛn we a dɔn mek yu kiŋ oba dɛn,

¹² a de gi yu di sɛn ɛn sabi we yu aks fɔ. Pantap dat, a go gi yu jɛntri, bɔku bɔku prɔpati ɛn ɔna we nɔn pan di kiŋ dɛn we bin dɔn de bifo yu nɔ gɛt wande, ɛn nɔn pan di wan dɛn we go kam afta yu, nɔ go ɛva gɛt.

Kiŋ Sɔlɔmɔn in Pawa ɛn Jɛntri

¹³ So Sɔlɔmɔn kɔmɔt na di ay ples na Gibiɔnn na di tɛn we dɛn de mi wit PAPA GƆD, kam Jerusɛlɛm. I rul Izrɛl.

¹⁴ Sɔlɔmɔn gɛda wan ples, chariɔt dɛm ɛn man dɛn we de rayd ɔs; i bin gɛt wan tawzin fo ɔndrɛd chariɔt, ɛn twɛlv tawzin man dɛm we de rayd ɔs, we i steshɔn na chariɔt siti dɛm, ɛn wit di kiŋ na Jerusɛlɛm.

¹⁵ Di kiŋ mek silva ɛn gold plɛnti lɛk ston na Jerusɛlɛm ɛn, i mek sida tik bɔku lɛk di sikamɔ tik dɛm na Shɛfɛla.

¹⁶ Sɔlɔmɔn bin de bay ɔs kɔmɔt Musri ɛn Silishia, ɛn di kiŋ in biznɛsman dɛn bin de bay dɛn dia wan.

¹⁷ Dɛn bay wan chariɔt siks ɔndrɛd silva kɔpɔ kɔmɔt Ijipt, ɛn wan ɔs fɔ wan ɔndrɛd ɛn fifti silva kɔpɔ; semweso, dɛn bin de sɛl gi di Itayt kiŋ dɛm ɛn di kiŋ dɛm na Siria, tru di kiŋ in biznɛsman dɛm.