2 Kiŋ 9 - Krio Fɔs Oli Baybul

Dɛn Anɔynt Jeu Fɔ Bi Kiŋ Na Izrɛl

¹ Ilaɛlsha kɔl wan pan di prɔfɛt dɛn ɛn tɛl am se lɛ i rɛdi fɔ go Ramɔt Giliad. I se lɛ i tek di flaks ɔyl,

² ɛn wɛn i rich de lɛ i luk fɔ Jeu we na Jɛoshafat in bɔypikin ɛn na Nimshi in grampikin; dɔn lɛ i kɔl Jeu in wangren go na wan biɛn rum,

³ tɔn di ɔyl nain ed ɛn tɛl am se PAPA GƆD se in dɔn pik am fɔ bi kiŋ na Izrɛl. I se wɛn i dɔn dɔn, lɛ i opin di do ɛn rɔn go; lɛ i mekes.

⁴ Dis yɔŋ prɔfɛt insɛf go na Ramɔt Giliad.

⁵ I mit ɔl di ami ɔfisa dɛn sidɔm na wan ples, nain i se in gɛt mɛsej fɔ di kɔmanda. Jeu aks am se fɔ uswan, i ansa am se nain di Jeu.

⁶ So insɛf grap go wit am insay di os. Di prɔfɛt tɔn di ɔyl nain ed ɛn tɛl am se PAPA GƆD, PAPA GƆD fɔ Izrɛl se in dɔn pik am fɔ bi kiŋ fɔ di Izrɛlayt dɛn we nain pipul.

⁷ I se Jeu fɔ kil ɔl udat de nain masta Eab in os fɔ we Jɛzibɛl kil dɛn prɔfɛt dɛn ɛn PAPA GƆD in ɔda savant dɛn.

⁸ I se in go dɔnawe wit ɔlman na Eab in os; di las bɔypikin dɛn o, slev o, fribɔn o, ɛn ɛniwan na Izrɛl.

⁹ Dɔn in go mek Eab in os tan lɛkɛ Jɛroboam we na Nebat in bɔypikin in yon; dɔn lɛkɛ Baasha we na Aayja in bɔypikin sɛf yon.

¹⁰ I se dɔg dɛn go it Jɛzibɛl in dedebɔdi na Jɛzril ɛn nɔbɔdi nɔ go bɛr am. Wɛn di prɔfɛt dɔn tɔk dɔn, i opin di do ɛn rɔn go.

¹¹ Wɛn Jeu go na do go mit in kɔmpin ɔfisa dɛn, dɛn aks am if ɔltin ɔrayt ɛn wetin mek da kresman de kam si am. I jɛs ansa dɛn se dɛn no di man ɛn di kanaba tin we i kin tɔk.

¹² Dɛn mɔna am se nɔto tru i de tɔk, so lɛ i tɛl dɛn di tru, so insɛf tɔk. I se di prɔfɛt se PAPA GƆD dɔn pik am fɔ bi kiŋ na Izrɛl.

¹³ As i se so ɔlman pul in jakɛt put am na di ɛmti stɛp fɔ lɛ i waka pan am, dɔn dɛn blo trɔmpɛt ɛn ala se Jeu na kiŋ.

Jeu Mek Ku Pan Joram

¹⁴ Jeu we na Jɛoshafat in bɔypikin mek ku pan Joram. Jɛoshafat na Nimshi in bɔypikin. Joram ɛn di Izrɛlayt dɛn bin de gyad Ramɔt Giliad agens Azaɛl we na kiŋ na Siria;

¹⁵ bɔt Kiŋ Joram in bin de Jɛzril usay i bin de mɛn di wund we i bin gɛt na Siria we i bin de fɛt kiŋ Azaɛl. Joram tɛl di man dɛn we bin de wit am se if dɛn no se dɛn de wit am nɔbɔdi nɔ fɔ lɛf Ramɔt go na Jɛzril go tɛl di pipul dɛn ɛnitin.

¹⁶ Jeu tek in karej go Jɛzril bikɔs Joram bin de de. Kiŋ Aazaya na Juda sɛf bin go fɛn am de.

¹⁷ Di wachman na Jɛzril bin de pantap di tawa de wach, wɛn i si Jeu ɛn in bataliɔn de kam. So insɛf tɛl Joram se in si pipul dɛn de kam. Joram tɛl am se lɛ i sɛn wan man wit ɔs fɔ go aks am aw i kam, if na pis i kam fɔ.

¹⁸ So wan man go wit ɔs go mit Jeu na rod ɛn tɛl am se di kiŋ se fɔ go aks am aw i kam, ɛn if na pis i kam fɔ. Jeu aks am se uskayn pis dat; i tɛl am lɛ i de rayd biɛn am. Di wachman tɔn bak go tɛl Joram se di man we i sɛn go bɔt i nɔ tɔn bak.

¹⁹ So Joram sɛn ɔda man wit ɔs. We di sɛkɛn wan go, insɛf go tɛl Jeu se di kiŋ se fɔ aks am aw i kam, ɛn if na pis i kam fɔ. Jeu ansa insɛf se uskayn pis dat. Lɛ i de rayd biɛn am.

²⁰ Di wachman go tɛl Joram bak se di sɛkɛn wan insɛf nɔ kam. I tɛl am se di pɔsin de drayv lɛk Jeu we na Nimshi in bɔypikin, bikɔs i de drayv lɛkɛ kresman.

²¹ Joram tɛl am se lɛ i rɛdi in karej. Wɛn i dɔn rɛdi am i jomp insay, dɔn Aazaya jomp nainsɛf yon, dɛn ɔltu ol rod fɔ go mit Jeu. Dɛn go mitɔp na Nebɔth da Jɛzrilayt in land.

²² Wɛn Joram si Jeu i aks am aw i si am so, if na pis i kam fɔ. Jeu ansa am se uskayn pis we na soso wich ɛn lay lay gɔd wɔship in mama Jɛzibɛl de pan.

²³ Na de Joram pik spid ɛn de ala se, “Dis na ku, dis na ku! E Aazaya!”

²⁴ Jeu tek in bo ɛn shut Joram nain chɛst wit ɔl in trɛnk. Di bo bɔs in at dɔn i fɔdɔm insay in karej.

²⁵ Na de i tɛl in drayva Bidka se lɛ i tek in dedebɔdi ib am na Nebɔth da Jɛzrilayt in grɔn; i aks am if i mɛmba di tɛm we dɛn tu bin de biɛn Joram in Papa we na Eab we PAPA GƆD bin se,

²⁶ wans in si Nebɔth ɛn in bɔypikin dɛn blɔd da de de, na so in papa go mek Eab pe fɔ dat na di vɛri grɔn. I tɛl Baka fɔ tek Joram in dedebɔdi ib am na di grɔn de bikɔs na so PAPA GƆD bin se.

²⁷ Wɛn Kiŋ Aazaya na Juda si wetin apin, i rɔn fɔ go na Bɛth Agan bɔt Jeu rɔn biɛn am de ala se lɛ dɛn shut am; dɛn shut am nain karej we i de na rod de go ɔp na Gur nia Iblim, bɔt i manej rɔn go na Mɛgido ɛn go day de.

²⁸ In wokman dɛn tek in dedebɔdi, put am na karej ɛn kɛr am go Jerusɛlɛm go bɛr am nain grampapa dɛn grev na Devid in siti.

²⁹ Di ia we mek Joram we na Eab in bɔypikin ilɛvin ia as kiŋ na Izrɛl, na da ia de Aazaya bi kiŋ na Juda.

Dɛn Kil Jɛzibɛl

³⁰ Jeu go na Jɛzril. Wɛn Jɛzibɛl yɛri se Jeu de de, i mekɔp in fes ɛn mek in ia fayn wan, dɔn i sidɔm de luk winda.

³¹ As Jeu bɔs na di get fɔ go insay di siti Jɛzibɛl aks am se in we dɔn kil in masta, aw in si am so, if na pis i kam bak fɔ.

³² Jeu es in yay luk ɔp di winda ɛn ala se “Udat dɛn de fɔ mi, na udat dɛn?” Sɔm man dɛn we bin de wok na di uman dɛn kwata na di kiŋ in os luk oba winda, ɛn Jeu si dɛn;

³³ so i tɛl dɛn se lɛ dɛn fliŋ Jɛzibɛl oba di winda. Dɛnsɛf fliŋ am oba di winda. We i fɔdɔm in blɔd ɔl skata na di wɔl ɛn pan di ɔs dɛn we dɛn bin de mas mas am.

³⁴ Jeu go insay di os ɛn it ɛn drink. Afta dat i tɛl in man dɛn se lɛ dɛn go tek di swɛ uman in dedebɔdi go bɛr am bikɔs na kiŋ pikin,

³⁵ bɔt wɛn di man dɛn go fɔ go tek in bɔdi, nain skɔl, in fut ɛn in an, nɔmɔ dɛn mit de,

³⁶ so dɛn go bak go tɛl Jeu, nain i se na wetin PAPA GƆD bin tɛl Ilayja da Tishbayt nain bi we i se na dɔg dɛn go it Jɛzibɛl in dedebɔdi na Jɛzril;

³⁷ ɛn in bɔdi go tan lɛk dɔti na grɔn we nɔbɔdi nɔ go no se na Jɛzibɛl in bɔdi dat.