2 Kiŋ 8 - Krio Fɔs Oli Baybul

Ilaɛlsha Mek Dɛn Gi Di Shunamayt Uman In Prɔpati Bak

¹ Wande, Ilaɛlsha tɛl da uman we i bin mek in bɔypikin gɛt layf bak se lɛ in ɛn in famili lɛf dɛn os ɛn go ɛnisay we dɛn fil fɔ go; bikɔs PAPA GƆD dɔn se it nɔ go de fɔ it fɔ sɛvin ia.

² Di uman insɛf du wetin di prɔfɛt se. In ɛn ɔlman nain os go tap na dɛn Filistin dɛn kɔntri fɔ sɛvin ia.

³ We di sɛvin ia dɔn, i tɔn bak nain kɔntri ɛn go mit di kiŋ ɛn beg am se lɛ i gi am bak in os ɛn in land bak.

⁴ Da tɛm de di kiŋ bin de tɔk wit Gɛazi we na Ilaɛlsha in asistant, ɛn i bin de aks am fɔ tɛl am ɔl di wɔndaful tin dɛn we Ilaɛlsha dɔn du.

⁵ Gɛazi bin de ɛksplen to am naw aw Ilaɛlsha mek dayman wek; i nɔ tɔk dɔn nain di uman we nain bɔypikin Ilaɛlsha bin wek bɔs pan dɛn ɛn beg di kiŋ fɔ gi am in os ɛn land bak. Na de Gɛazi tɛl di kiŋ se na di uman dat we Ilaɛlsha bin wek in pikin we day.

⁶ Di kiŋ aks di uman if na so i bi, i ansa se yɛs. So i gi wan in ɔfisa ɔda se i fɔ mek shɔ se di uman gɛt ɔl wetin blant am wit wetin dɛn avɛst nain fam.

Azaɛl Kil Kiŋ Bɛnadad

⁷ Ilaɛlsha go na Damaskɔs wande, ɛn da tɛm de Kiŋ Bɛnadad na Damaskɔs bin sik. Wɛn dɛn tɛl di kiŋ se di prɔfɛt dɔn kam ɔl da we de,

⁸ i tɛl Azaɛl lɛ i kɛr sɔm prɛzɛnt fɔ am ɛn aks am lɛ i fɛnɔt fɔ am frɔm PAPA GƆD if i go wɛl.

⁹ Azaɛl insɛf kɛr bɔku bɔku tiŋs go fɔ Ilaɛlsha. I lod fɔti kamɛl wit fayn fayn tiŋs dɛn we de na Damaskɔs. Wɛn i rich to Ilaɛlsha, i tɛl am se nain bɔypikin Bɛnadad na Damaskɔs sɛn am to am fɔ aks am if i go wɛl.

¹⁰ Ilaɛlsha ansa am se lɛ i go tɛl am se i go wɛl; bɔt PAPA GƆD dɔn sho am se i go day.

¹¹ Ilaɛlsha luk am nain yay te i shem, dɔn i bigin kray.

¹² Na de Azaɛl aks am wetin mek i de kray. Ilaɛlsha ansa am se in no di avɔk we in di Azaɛl gɛt fɔ kɔz na Izrɛl. I se i gɛt fɔ bɔn ɔl dɛn siti we dɛn dɔn mek, ɛn kil di yɔŋ man dɛn, ɛn nyakanyaka dɛn pikin ɛn plit bɛlɛ uman dɛn bɛlɛ.

¹³ Azaɛl tɛl am se in nɔto nɔbɔdi na di ples, so aw wetin dat go bi. Ilaɛlsha ansa am se PAPA GƆD dɔn sho am se nain gɛt fɔ bi kiŋ na Damaskɔs.

¹⁴ Azaɛl tɔn bak go to in masta. Wɛn Bɛnadad aks am wetin Ilaɛlsha se, Azaɛl tɛl am se i se i go wɛl.

¹⁵ Bɔt di nɛks de Azaɛl tek di blankit sok am na wata, dɔn i kɔba di kiŋ in ed wit am ɛn sɔfɔket am te i day dɔn i tek in ples fɔ rul as kiŋ.

Kiŋ Jɛoram Na Juda

¹⁶ Di ia we mek Joram we na, Eab in bɔypikin fayv ia as kiŋ na Izrɛl, na da ia de Jɛoram, we na Jɛoshafat in bɔypikin bi kiŋ na Juda.

¹⁷ I ol tati-tu ia we i bi kiŋ ɛn i rul fɔ et ia na Jerusɛlɛm.

¹⁸ Lɛkɛ aw nɔmɔ di ɔda kiŋ dɛn na Izrɛl bin de biev, na so insɛf biev. I falamakata Eab in famili dɛn bad ɛgzampul ɛn mared in gyal pikin. I du ɔlkayn bad tin na PAPA GƆD in yay.

¹⁹ Pan ɔl dat, PAPA GƆD nɔ pwɛl Juda bikɔs i bin dɔn prɔmis Devid se in go mek in jɛnareshɔn de rul sote go.

²⁰ Wɛn Jɛoram bin de rul, Idɔm barɔf pan Juda ɛn fɛn dɛn yon kiŋ.

²¹ Jɛoram insɛf gɛda in karej dɛn go na Zair, bɔt di Idɔmayt dɛn sɔrawnd in kɔmanda dɛn; Jɛoram bin fɛt te i fri insɛf ɛn rɔnawe na nɛt. Ɔl in sojaman dɛn rɔnawe.

²² Frɔm da tɛm de nain Idɔm kɔmɔt ɔnda Juda. Libnainsɛf barɔf di sem we ɛn kɔmɔt ɔnda Juda.

²³ Ɔl di ɔda tin dɛn we Jɛoram du, dɛn ɔl rayt na di istri buk bɔt dɛn kiŋ dɛn na Juda.

²⁴ Jɛoram day ɛn dɛn bɛr am usay dɛn bɛr in fɔstɛm grampapa dɛn na Devid in siti. Nain bɔypikin Aazaya bigin rul as kiŋ nain ples.

Kiŋ Aazaya Na Juda

²⁵ Di ia we mek Joram we na Eab in bɔypikin twɛlv ia as kiŋ na Izrɛl, na da ia de Aazaya we na Jɛoram in bɔypikin bi kiŋ na Juda.

²⁶ Aazaya bin ol twɛnti-tu ia we i bigin rul, ɛn na wan ia nɔmɔ i rul na Jerusɛlɛm fɔ. In mama nem Athalaya, we na Kiŋ Omri we bin de na Izrɛl in grampikin.

²⁷ Aazaya insɛf biev lɛkɛ aw Eab in jɛnareshɔn dɛn biev ɛn du wetin nɔ rayt na PAPA GƆD in yay. Na wan pan Eab in fambul i bin mared.

²⁸ Aazaya jɔyn an wit Joram we na Eab in bɔypikin fɔ fɛt wa wit Azaɛl we na Kiŋ na Siria na Ramɔt Giliad. Di Sirian dɛn wund Joram;

²⁹ dat mek i go na Jɛzril fɔ go mɛn di wund we dɛn wund am we i bin de fɛt di Sirian dɛn na Ramɔt Giliad. Kiŋ Aazaya we na Jɛoram in bɔypikin go fɛn Joram we i wund.