2 Kiŋ 7 - Krio Fɔs Oli Baybul

¹ Bɔt Ilaɛlsha tɛl am se lɛ i opin in yes lisin to wetin PAPA GƆD se. I se papa GƆD se da sem awa de di nɛks de, dɛn go sɛl tɛn pawns wit ɔ twɛnti pawns bali fɔ wan silva kɔpɔ na di gɛt na Sameria.

² Na de di kiŋ in pasɔnal asistant tɛl di prɔfɛt se i lɛk sɛf PAPA GƆD opin ɛvin lɛ ren kam, dat nɔ go bi. Ilaɛlsha ansa am se i go si am so wit in yay bɔt in mɔt nɔ go tes am.

Di Sirian Sojaman Dɛn Tɔn Bak

³ Fo man dɛn bin de na di get na Sameria. Dɛn ɔl bin gɛt bad sik na dɛn bɔdi. Dɛn bigin de aks dɛnsɛf se wetin mek dɛn fɔ de na da ples de te dɛn day.

⁴ Dɛn se if dɛn disayd fɔ go bak na di siti, aŋri de de ɛn na de dɛn go day; igen if dɛn disayd fɔ de na di sem ples, dɛn go day de igen So dɛn advays dɛnsɛf se lɛ dɛn go na di Sirian dɛn kamp. Dɛn se if di Sirian dɛn sɔri fɔ dɛn dɛn go liv, bɔt if dɛn kil dɛn igen, lɛ dɛn day wantɛm.

⁵ So ivintɛm dɛn go na di Sirian dɛn kamp. Wɛn dɛn rich na di kamp domɔt, dɛn nɔ si nɔbɔdi,

⁶ bikɔs PAPA GƆD bin dɔn mek di Sirian sojaman dɛn yɛri sawnd lɛkɛ ɔs ɛn karej wit bɔku bɔku sojaman dɛn de waka we mek dɛn tɛl dɛn kɔmpin se di kiŋ na Izrɛl dɔn go aya dɛn Itayt ɛn dɛn Ijipshian masinari fɔ atak dɛn.

⁷ Dɛn ɔl rɔnawe di nɛt lɛf dɛn tɛnt, dɛn ɔs ɛn dɔŋki ɛn lɛf di kamp lɛkɛ aw i bin de; ɔlman rɔn fɔ in layf.

⁸ Wɛn dɛn man dɛn yaso rich na di kamp domɔt, dɛn go insay wan tɛnt, dɛn it ɛn drink, dɛn tek silva, gold ɛn klos go ayd dɛn; dɔn, dɛn go insay ɔda tɛnt, ɛn tek tiŋs dɛn de go ayd bak.

⁹ Na de dɛn bigin advays dɛnsɛf se wetin dɛn de du nɔ fayn bikɔs da de de na de we dɛn gɛt gudnyuz, dɛn se dɛn nɔ fɔ sɛt mɔt wet te mɔnin ɔ nɔ so dɛn go sɔfa fɔ dat, so lɛ dɛn go tɛl di kiŋ.

¹⁰ Dɛn go mit di getman dɛn na di siti ɛn tɛl dɛn se dɛn go na di Sirian dɛn kamp bɔt dɛn nɔ mit nɔbɔdi de; dɛn se di wangren tin we dɛn mit na di ɔs ɛn dɔŋki dɛn we tay, dɔn di tɛnt dɛn de as di pipul dɛn lɛf dɛn.

¹¹ Di getman dɛn sɛn di nyuz go ɔlɔbɔt te di wɔd rich to di kiŋ.

¹² Di kiŋ grap na nɛt ɛn kɔl in wokman dɛn; i tɛl dɛn se in wan tɛl dɛn wetin di Sirian dɛn dɔn du. I se di Sirian dɛn no se aŋri de na Izrɛl, so dɛn go ayd na bush de wet se we dɛn kɔmɔt, dɛn go kech dɛn ɛn atak di siti.

¹³ Wan pan di ɔfisa dɛn tɛl di kiŋ se lɛ i sɛn sɔm man dɛn wit fayv pan di ɔs dɛn we lɛf na di siti. I se if ɛnitin apin to dɛn, na dɛn ɔl go fil am. I se dɛn man dɛn de fɔ go fɛnɔt wetin apin.

¹⁴ So dɛn pik tu man wit ɔs ɛn karej. Di kiŋ sɛn dɛn fɔ go fɛnɔt wetin dɔn apin to di Sirian dɛn.

¹⁵ Di man dɛn go te rich Riva Jɔdan; wetin dɛn fɛn na soso klos ɛn tin dɛn na grɔn we di Sirian dɛn ib we dɛn bin de rɔnawe. Dɛn tɔn bak go tɛl di kiŋ wetin dɛn si.

¹⁶ Ɔl di pipul dɛn tɔn naw go na di Sirian dɛn kamp; dɛn tek ɔl wetin dɛn mit de. Dɛn sɛl tɛn pawns wit ɔ twɛnti pawns bali fɔ wan silva kɔpɔ jɛs lɛkɛ aw PAPA GƆD bin se.

¹⁷ Di kiŋ bin dɔn pik in pasɔnal asistant fɔ de inchaj ɔf di get; bɔt di pipul dɛn bin so bɔku dat dɛn mas mas am te i day lɛk aw di prɔfɛt bin tɛl am we i go mit am.

¹⁸ We di prɔfɛt bin tɛl di kiŋ se dɛn go sɛl tɛn pawns wit ɔ twɛnti pawns bali fɔ wan silva kɔpɔ na di gɛt na Sameria di nɛks de,

¹⁹ na dis vɛri pasɔnal asistant bin dinay se i lɛk sɛf PAPA GƆD opin ɛvin lɛ ren kam, dat nɔ go bi. Ɛn di prɔfɛt bin ansa am se i go si am so wit in yay, bɔt in mɔt nɔ go tes am.

²⁰ Lɛk aw di prɔfɛt tɔk na so i bi; di pipul dɛn mas mas am na di get te i day.