2 Kiŋ 6 - Krio Fɔs Oli Baybul

Ilaɛlsha Mek Aks Flot Na Wata

¹ Di prɔfɛt dɛn tɛl Ilaɛlsha se di ples we dɛn tap we na de i de mit wit dɛn tu smɔl fɔ dɛn,

² so dɛn want fɔ go kɔt tik dɔŋ Riva Jɔdan we dɛn go tek mek abule. I ansa dɛn se lɛ dɛn go.

³ Wan pan dɛn aks am se lɛ i go wit dɛn so i gri,

⁴ ɛn go wit dɛn. Wɛn dɛn rich dɔŋ Riva Jɔdan, dɛn bigin fɔ kɔt di tik.

⁵ Bɔt as wan pan dɛn de kɔt wan big tik, in aks fɔdɔm na di wata dɔn i bigin ala se “Masta, Masta, na lɛnt a lɛnt am!”

⁶ Ilaɛlsha aks am usay di aks fɔdɔm; wɛn i sho am di ples, i kɔt tik ib am de pantap di wata: wantɛm nain di aks flot kam ɔp.

⁷ Ilaɛlsha tɛl am lɛ i tek am, so insɛf tret in an na di wata ɛn tek am.

Izrɛl Kɔnka Di Ami Na Siria

⁸ Wan tɛm di kiŋ na Siria bin de go fɛt wa wit di kiŋ na Izrɛl. Ɛn di kiŋ ɛng-ed wit in man dɛn se na soso ples in go bil in kamp.

⁹ Di prɔfɛt insɛf kin sɛn wɔnin to di kiŋ na Izrɛl se lɛ i kiaful, lɛ i nɔ pas dis rod ɔ da rod de bikɔs di Sirian dɛn de de.

¹⁰ Di kiŋ na Izrɛl insɛf kin sɛn go chɛk wit wetin di prɔfɛt se. Na so di prɔfɛt kin de du we i kin sev di kiŋ in layf bɔku tɛm.

¹¹ Di kiŋ na Siria kam wɔri bikɔs ɔf wetin kin de apin, so i aks in wokman dɛn lɛ dɛn sho am uswan pan dɛn de fɔ di kiŋ na Izrɛl.

¹² Wan pan dɛn ansa am se nɔn pan dɛn nɔ de fɔ am; i se na Prɔfɛt Ilaɛlsha we de na Izrɛl de tɛl di kiŋ na Izrɛl ɔl wetin in de tɔk insay in rum.

¹³ Di kiŋ sɛn in man dɛn se lɛ dɛn go fɛnɔt usay Ilaɛlsha de fɔ lɛ i go kech am. Dɛn go fɛnɔt ɛn ripɔt bak to am se Ilaɛlsha de na Dotan.

¹⁴ Di kiŋ sɛn bɔku bɔku sojaman dɛn wit ɔs ɛn karej: dɛn sɔrawnd di siti na nɛt.

¹⁵ Wɛn Ilaɛlsha in wokman grap ali mɔnin go na do, na bɔku bɔku sojaman dɛn i si se dɔn sɔrawnd di siti; so i aks in masta se wetin dɛn fɔ du.

¹⁶ Na de Ilaɛlsha ansa am se lɛ i nɔ fred bikɔs di wan dɛn we de wit am bɔku pas di wan dɛn we de wit dɛn.

¹⁷ So Ilaɛlsha pre se, “E PAPA GƆD, duya opin in yay lɛ i si.” PAPA GƆD opin di man in yay fɔ lɛ i si, ɛn wetin i si na soso ɔs ɛn karej dɛn wit faya rawnd di mawnten pan Ilaɛlsha.

¹⁸ Wɛn di Sirian dɛn kam fɔ Ilaɛlsha, i pre to PAPA GƆD fɔ mek dɛn blɛn. PAPA GƆD ansa Ilaɛlsha in prea ɛn mek dɛn ɔl blɛn.

¹⁹ Ilaɛlsha tɛl dɛn se nɔto di rod da wande ɛn nɔto di siti sɛf da wande we dɛn de fɛn; i tɛl dɛn fɔ fala am go to di man we dɛn de fɛn. I kɛr dɛn go rayt insay Sameria.

²⁰ As dɛn rich insay Sameria so Ilaɛlsha pre to PAPA GƆD fɔ opin dɛn yay. PAPA GƆD opin dɛn yay fɔ si; na da tɛm de dɛn si se nainsay, insay Sameria dɛn de.

²¹ Wɛn di kiŋ na Izrɛl si dɛn, i aks Ilaɛlsha if lɛ in kil, kil dɛn.

²² Ilaɛlsha se nɔ ɛn aks am if i go lɛk fɔ kil pɔsin we in dɔn kapchɔ wit in sɔd ɛn bo. I se lɛ i gi dɛn it ɛn wata, dɔn lɛ i lɛf dɛn lɛ dɛn go bak to dɛn masta.

²³ Di kiŋ insɛf mek big pati fɔ dɛn; wɛn dɛn dɔn it ɛn drink dɔn, i mek dɛn go bak to dɛn masta. Frɔm da de de, di Sirian dɛn nɔ ɛva go bak fɔ go mɔna Izrɛl.

Aŋri Fɔdɔm Na Sameria

²⁴ Sɔm tɛm afta dat, Kiŋ Bɛnadad na Siria gɛda in sojaman dɛn ɛn sɔrawnd Sameria.

²⁵ Da tɛm de, bad bad aŋri bin de na Sameria. Di aŋri bin so mɔna dat dɛn bin de sɛl wan dɔŋki ed eti silva kɔpɔ ɛn smɔl vɛjitebul fayv silva kɔpɔ.

²⁶ Wande di kiŋ na Izrɛl bin de waka pantap di wɔl na di siti we i yɛri wan uman de ala se, “Woyo! Kiŋ, duya ɛp mi!”

²⁷ Nain di kiŋ ansa am se if PAPA GƆD nɔ ebul ɛp am aw in go ebul, ɛn if in tink se in gɛt wit ɔ wayn.

²⁸ I aks am wetin nain prɔblɛm. Di uman ansa am se di ɔda uman we tinap nia am tɛl am se lɛ dɛn it in yon pikin, dɔn di nɛks de nain yon dɛn go it.

²⁹ I se in gri ɛn kil in yon pikin dɔn dɛn it am; wɛn di ɔda uman in yon tɔn rich fɔ it insɛf yon pikin, i ayd am.

³⁰ Wɛn di kiŋ yɛri dat i chɛr in klos. Da tɛm de di kiŋ bin stil de waka pantap di wɔl, ɛn ɛnibɔdi we bin de pas we luk am bin de si se na saklɔth i wɛr ɔnda in klos.

³¹ So i swɛ se lɛ PAPA GƆD kil am if in nɔ kɔt Shafat in bɔypikin we na Ilaɛlsha in ed kɔmɔt da de de.

³² Da tɛm de Ilaɛlsha bin gɛt sɔm bigman dɛn we bin de wit am nain os. Di kiŋ sɛn mɛsenja go bifo am, bɔt bifo di mɛsenja de rich, Ilaɛlsha dɔn tɛl di man dɛn se da kilman dɔn sɛn sɔmbɔdi fɔ kam kɔt in ed. I tɛl dɛn se lɛ dɛn de luk fɔ am; ɛn wɛn i kam lɛ dɛn lɔk di do pan am. I se infakt in masta de biɛn am fut-to-fut.

³³ Ilaɛlsha nɔ tɔk dɔn nain di mɛsenja rich de. Di kiŋ tɛl Ilaɛlsha se di dombolo we dɔn mit dɛn so na PAPA GƆD sɛn am, so nid nɔ de fɔ wet igen