2 Kiŋ 4 - Krio Fɔs Oli Baybul

Ilaɛlsha Ɛp Wan Po Uman We In Man Dɔn Day

¹ Wande, wan prɔfɛt in wɛf go kray to Ilaɛlsha fɔ lɛ i ɛp am. I tɛl am se in man dɔn day ɛn i no se na man we bin de rɛspɛkt ɛn ɔna PAPA GƆD, bɔt i bin o dɛt; i se di man we i o de kam fɔ kɛr in tu bɔypikin dɛn go fɔ go tɔn dɛn to slev.

² Ilaɛlsha aks di uman wetin in want am fɔ du fɔ am; i aks am bak wetin i gɛt nain os. Di uman ansa am se in nɔ gɛt natin pas wan smɔl bɔtul ɔyl.

³ Ilaɛlsha tɛl am se lɛ i go lɛnt bɔku ɛmti kɔntena dɛn to in neba dɛn.

⁴ Dɔn lɛ i go insay in os wit in bɔypikin dɛn, lɔk di do, tek di ɔyl we i gɛt ɛn bigin tɔn am insay di kɔntena dɛn. Wɛn wan dɔn ful i fɔ put am na kɔna.

⁵ Di uman go fɛn di kɔntena dɛn ɛn lɔk insay in os wit in bɔypikin dɛn. As i de tɔn di ɔyl na so dɛn de briŋ mɔ kɔntena to am.

⁶ Wɛn ɔl di kɔntena dɛn dɔn ful, i tɛl dɛn se lɛ dɛn go briŋ mɔ kam, bɔt dɛn se mɔ nɔ de. Na da tɛm de di ɔyl tap fɔ flo.

⁷ I go tɛl di prɔfɛt wetin apin, so i tɛl am se lɛ i go sɛl di ɔyl ɛn pe in dɛt, dɔn di balans mɔni, in ɛn in bɔypikin dɛn kin manej layf wit am.

Aw Ilaɛlsha Ɛn Da Jɛntri Uman Na Shunɛm Pas

⁸ Wande Ilaɛlsha go na Shunɛm. Wan jɛntri uman bin de de we kin de mɔna am ɔltɛm fɔ de it to am bifo i go in we. Ɛnitɛm we i de pas da say de, i kin de bɛn de fɔ it.

⁹ Di uman tɛl in man wande se in si se dis man we kin de pas frɔnt to dɛn na prɔfɛt,

¹⁰ so lɛ dɛn mek wan smɔl rum ɔp dɛn os fɔ am ɛn put bed, tebul, chia ɛn lamp, so dat ɛnitɛm we i bɛn to dɛn, i go de lidɔm de.

¹¹ Wande wɛn Ilaɛlsha bɛn de, i go ɔp di rum go lidɔm,

¹² dɔn i sɛn in wokman Gɛazi fɔ go kɔl di uman. Wɛn di uman kam i tinap bifo am;

¹³ i tɛl Gɛazi fɔ tɛl di uman se in si se i dɔn du bɔku tin fɔ dɛn, so lɛ i tɔk wetin i want. I se if na fɔ lɛ i tɔk to di kiŋ ɔ di ami kɔmanda, in go tɔk to dɛn fɔ am. Di uman ansa se nain yon pipul dɛn i de wit.

¹⁴ Ilaɛlsha aks wetin fɔ du fɔ am. Gɛazi ansa se di uman nɔ gɛt pikin ɛn in man dɔn ol.

¹⁵ Ilaɛlsha tɛl Gɛazi fɔ kɔl di uman, ɛn wɛn i kam i tinap na di domɔt.

¹⁶ Dɔn Ilaɛlsha tɛl am se da sem tɛm de di nɛks ia i go bɔn bɔypikin. Di uman ansa se lɛ di prɔfɛt nɔ lay to am.

¹⁷ Di uman gɛt bɛlɛ ɛn bɔn bɔypikin di sem tɛm we Ilaɛlsha tɛl am se i go bɔn am.

¹⁸ Wɛn di pikin dɔn big, i go fɛn in papa wande usay in ɛn in wokman dɛn bin de avɛst.

¹⁹ Wantɛm nain i kɔmplen to in papa se in ed, in ed. Na de in papa se lɛ dɛn kɛr am go to in mama.

²⁰ Wan pan di wokman dɛn tot am kɛr am go to in mama. Di pikin sidɔm nain lap te aftanun, dɔn i day.

²¹ Di uman kɛr am go ɔp, le am na di prɔfɛt in bed, lɔk di do ɛn kɔmɔt de.

²² Dɔn i sɛn mɛsej to in man se lɛ i sɛn wan wokman wit dɔŋki fɔ am, in wan go ɛn kam kwik to di prɔfɛt.

²³ Bɔt in man aks wetin mek i wan go to am da de de we nɔto di de fɔ pre ɛn blo ɛn nɔto di nyu mun ɔlide. Di uman ansa am se lɛ i nɔ wɔri bɔt dat.

²⁴ So i jomp pantap di dɔŋki ɛn tɛl di wokman se lɛ i go wit spid lɛ i nɔ slo, pas if in tɛl am fɔ slo.

²⁵ I go te i kech di prɔfɛt na Mawnt Kamɛl. Wɛn di prɔfɛt si am de kam,

²⁶ i sɛn in wokman Gɛazi fɔ go mit am na rod ɛn aks am if ɔltin ɔlrayt wit in, in man ɛn in pikin. Di uman ansa am se ɔltin ɔlrayt.

²⁷ Wɛn di uman rich ɔp di mawnten to di prɔfɛt, i ol di prɔfɛt in fut, bɔt Gɛazi tray fɔ push am, so Ilaɛlsha tɛl am se lɛ i lɛf am bikɔs i gɛt tin we de mɔna am. I se PAPA GƆD ayd di tin pan in we na prɔfɛt.

²⁸ Di uman aks Ilaɛlsha if in bin aks am fɔ pikin ɛn if in nɔ bin dɔn tɛl am se lɛ i nɔ lay to am.

²⁹ Ilaɛlsha tɛl Gɛazi se lɛ i rɛdi wantɛm fɔ go dɔŋ wit in wɔkinstik. I se if i mit ɛnibɔdi na rod, lɛ i nɔ tɛl am adu, ɛn if ɛnibɔdi tɛl am adu lɛ i nɔ ansa; lɛ i put in wɔkinstik pan di pikin in fes.

³⁰ Na de di uman tɛl am se wans PAPA GƆD de alayv ɛn in di Ilaɛlsha insɛf de alayv, in nɔ go lɛf am; so Ilaɛlsha insɛf grap fala am go.

³¹ Na Gɛazi in fɔs rich ɛn put di tik pan di pikin in fes bɔt wan layf nɔ bin de pan am, so i tɔn bak go tɛl Ilaɛlsha se di pikin nɔ wek.

³² Wɛn Ilaɛlsha rich na di os, i mit di pikin lidɔm day wan nain bed;

³³ so i go insay ɛn lɔk di do lɛ dɛn tu de insay ɛn pre to PAPA GƆD.

³⁴ I klem pantap di bed ɛn lidɔm pan di bɔbɔ. I put in mɔt to di bɔbɔ in mɔt, in yay to in yay, ɛn in an dɛn pan in yon dɛn; ɛn as i bigin tret insɛf pan am so, di bɔbɔ in bɔdi bigin wam.

³⁵ I grap pan am ɛn bigin waka ɔp ɛn dɔŋ insay di os, dɔn i klem pantap di bed ɛn tret insɛf bak pan am; di bɔbɔ sniz sɛvin tɛm dɔn i opin in yay.

³⁶ Na de Ilaɛlsha tɛl Gɛazi fɔ kɔl di uman. Wɛn i kam insay,

³⁷ i tɛl am se lɛ i tek in pikin. Di uman fɔdɔm nain fut ɛn butu na grɔn. Dɔn i tek in pikin ɛn kɔmɔt na do.

Ilaɛlsha Ple Wɔnda

³⁸ Ilaɛlsha go bak na Gilgal ɛn mit it biznɛs traŋa de. Wɛn i bin de ol mitin wit di ɔda prɔfɛt dɛn, i tɛl in asistant fɔ put di big pɔt na faya fɔ kuk styu fɔ dɛn fɔ it.

³⁹ Wan pan di prɔfɛt dɛn go na gadin fɔ go fɛn vɛjitebul bɔt i pik sɔm frut we dɛn nɔ kin put na it, put nain pɔkit, kɛr am go, kɔt kɔt am ɛn put am na di pɔt; bɔt nɔbɔdi nɔ no wetin i put de.

⁴⁰ Di pɔt bwɛl ɛn wɛn i pul di it fɔ it, ɔlman it. As dɛn de it nain dɛn bigin ala Ilaɛlsha se di it gɛt pɔyzin.

⁴¹ So dɛn nɔ ebul it di it igen. Na de Ilaɛlsha tɛl dɛn se lɛ dɛn gi am sɔm wit flawa. I tek di flawa put am insay di pɔt, dɔn i se lɛ dɛn sheb di it. Dɛn du dat ɛn natin nɔ du di it igen

⁴² Wan man we kɔmɔt na Beal Shalisha kɛr twɛnti lof bred we dɛn bek wit kɔn flawa we dɛn jɛs avɛst wit frɛsh kɔn to Ilaɛlsha. Ilaɛlsha tɛl am se lɛ i gi di pipul dɛn lɛ dɛn it.

⁴³ Ilaɛlsha in wokman aks am aw fɔ sheb di it to wan ɔndrɛd mɔtalman. Bɔt Ilaɛlsha tɛl am se lɛ i jɛs gi di pipul dɛn nɔmɔ lɛ dɛn it, bikɔs PAPA GƆD se dɛn go it ɛn wɛrɛ go lɛf. Di wokman insɛf sheb di it.

⁴⁴ Ɔlman it ɛn wɛrɛ lɛf jɛs lɛkɛ aw PAPA GƆD se.